ਮਾਰਖਮ, 23 ਫਰਵਰੀ (ਪੋਸਟ ਬਿਊਰੋ) : ਯੌਰਕ ਰੀਜਨਲ ਪੁਲਿਸ ਵੱਲੋਂ ਮਾਪਿਆਂ ਨੂੰ ਇਹ ਚੇਤਾਵਨੀ ਦਿੱਤੀ ਜਾ ਰਹੀ ਹੈ ਕਿ ਮਾਰਖਮ ਦੇ ਇੱਕ ਕਨਵੇਐਂਸ ਸਟੋਰ ਵਿੱਚ ਗੈਰਕਾਨੂੰਨੀ ਢੰਗ ਨਾਲ ਭੰਗ ਦੇ ਉਤਪਾਦ ਨਾਬਾਲਗ ਟੀਨੇਜਰਜ਼ ਨੂੰ ਵੇਚੇ ਜਾ ਰਹੇ ਹਨ। ਇਨ੍ਹਾਂ ਵਿੱਚ ਕੈਂਡੀ ਨਾਲ ਮੇਲ ਖਾਂਦੇ ਭੰਗ ਵਾਲੇ ਉਤਪਾਦ ਵੀ ਹਨ।
ਪੁਲਿਸ ਨੇ ਦੱਸਿਆ ਕਿ ਇੱਕ ਸਥਾਨਕ ਰੈਜ਼ੀਡੈਂਟ ਵੱਲੋਂ ਜਨਵਰੀ ਦੇ ਸ਼ੁਰੂ ਵਿੱਚ ਰਿਪੋਰਟ ਫਾਈਲ ਕੀਤੀ ਗਈ ਸੀ ਕਿ ਇਸ ਸਟੋਰ ਵਿੱਚ 19 ਸਾਲਾਂ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਵੇਪ ਉਤਪਾਦ ਵੇਚੇ ਜਾ ਰਹੇ ਹਨ। 18 ਫਰਵਰੀ ਨੂੰ ਅਧਿਕਾਰੀਆਂ ਨੇ ਮੇਜਰ ਮੈਕੈਂਜੀ ਡਰਾਈਵ ਈਸਟ ਦੇ ਦੱਖਣ ਵਿੱਚ ਕੈਨੇਡੀ ਰੋਡ ਉੱਤੇ ਸਥਿਤ ਐਂਗਸ ਗਲੈਨ ਕਨਵੇਐਂਸ ਸਟੋਰ ਉੱਤੇ ਸਰਚ ਵਾਰੰਟ ਰਾਹੀਂ ਤਲਾਸ਼ੀ ਲਈ ਗਈ। ਇਸ ਸਟੋਰ ਵਿੱਚੋਂ ਪੁਲਿਸ ਨੂੰ ਭੰਗ ਵਾਲੇ ਖਾਣ ਵਾਲੇ ਪਦਾਰਥ, ਡਿਸਪੋਜੇ਼ਬਲ ਕੈਨਾਬਿਸ ਵੇਪ ਪੈਨ ਤੇ ਕੈਨਾਬਿਸ ਦੇ ਬੀਜ ਵੀ ਮਿਲੇ।
ਇਸ ਸਟੋਰ ਵਿੱਚੋਂ ਬਰਾਮਦ ਕੀਤੀਆਂ ਗਈਆਂ ਆਈਟਮਾਂ ਦੀ ਕੀਮਤ 10,000 ਡਾਲਰ ਦੇ ਨੇੜੇ ਤੇੜੇ ਹੈ। ਇਸ ਦੌਰਾਨ ਏਅਰਹੈੱਡਜ਼, ਸਾਈਕੋ ਬੀਅਰਜ਼ ਤੇ ਸਟੋਨਰ ਪੈਚ ਵਰਗੇ ਉਤਪਾਦ ਮਿਲੇ ਹਨ। ਇਹ ਉਤਪਾਦ ਹੂ ਬ ਹੂ ਉਨ੍ਹਾਂ ਕੈਂਡੀ ਉਤਪਾਦਾਂ ਨਾਲ ਮੇਲ ਖਾਂਦੇ ਹਨ ਜਿਨ੍ਹਾਂ ਨੂੰ ਬੱਚਿਆਂ ਲਈ ਤਿਆਰ ਕੀਤਾ ਜਾਂਦਾ ਤੇ ਵੇਚਿਆ ਜਾਂਦਾ ਹੈ। ਸਟੋਰ ਦੇ ਮੈਨੇਜਰ ਤੇ ਹੋਰ ਕਰਮਚਾਰੀਆਂ ਨੂੰ ਵੇਚਣ ਦੇ ਇਰਾਦੇ ਨਾਲ ਭੰਗ ਕੋਲ ਰੱਖਣ ਲਈ ਚਾਰਜ ਕੀਤਾ ਗਿਆ ਹੈ।