ਟੋਰਾਂਟੋ, 21 ਫਰਵਰੀ (ਪੋਸਟ ਬਿਊਰੋ) : ਡਾਊਨਟਾਊਨ ਟੋਰਾਂਟੋ ਦੀ 35ਵੀਂ ਮੰਜਿ਼ਲ ਦੀ ਬਾਲਕਨੀ ਵਿੱਚੋਂ ਸ਼ਰਾਬ ਦੀਆਂ ਬੋਤਲਾਂ ਹੇਠਾਂ ਸੁੱਟਣ ਵਾਲੇ ਤਿੰਨ ਵਿਅਕਤੀਆਂ ਨੂੰ ਪੁਲਿਸ ਨੇ ਗ੍ਰਿਫਤਾਰ ਕਰ ਲਿਆ।
ਪੁਲਿਸ ਨੂੰ ਦੁਪਹਿਰੇ 2:30 ਵਜੇ ਲੇਕ ਸ਼ੋਰ ਬੋਲੀਵੀਆਰਡ ਤੇ ਯੌਰਕ ਸਟਰੀਟ ਦੇ ਲਾਂਘੇ ਉੱਤੇ ਇਹ ਦੱਸ ਕੇ ਸੱਦਿਆ ਗਿਆ ਕਿ ਕੁੱਝ ਲੋਕ ਪਾਰਟੀ ਕਰਨ ਤੋਂ ਬਾਅਦ ਸ਼ਰਾਬ ਦੀਆਂ ਬੋਤਲਾਂ ਹੇਠਾਂ ਸੁੱਟ ਰਹੇ ਹਨ। ਮੌਕੇ ਉੱਤੇ ਪਹੁੰਚ ਕੇ ਪੁਲਿਸ ਨੇ ਵੇਖਿਆ ਕਿ ਬੋਤਲਾਂ ਯੌਰਕ ਸਟਰੀਟ ਉੱਤੇ ਸੁੱਟੀਆਂ ਜਾ ਰਹੀਆਂ ਸਨ।ਅੰਤਰਿਮ ਪੁਲਿਸ ਚੀਫ ਜੇਮਜ਼ ਰੈਮਰ ਵੱਲੋਂ ਕੀਤੇ ਗਏ ਟਵੀਟ ਅਨੁਸਾਰ ਜ਼ਮੀਨ ਉੱਤੇ ਮੌਜੂਦ ਪੁਲਿਸ ਅਧਿਕਾਰੀ ਵੀ ਸੱਟ ਖਾਣ ਤੋਂ ਮਸ੍ਹਾਂ ਬਚੇ।
ਫਿਰ ਪੁਲਿਸ 35ਵੀਂ ਮੰਜਿ਼ਲ ਉੱਤੇ ਸਥਿਤ ਕੌਂਡੋ ਪਹੁੰਚੀ ਤੇ 14 ਵਿਅਕਤੀਆਂ ਨੂੰ ਗੈਰਕਾਨੂੰਨੀ ਤੌਰ ਉੱਤੇ ਇੱਕਠੇ ਹੋਣ ਲਈ ਜੁਰਮਾਨਾ ਕੀਤਾ। ਕੁੱਝ ਪਲ ਬਾਅਦ ਤਿੰਨ ਵਿਅਕਤੀਆਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਕੋਈ ਖਬਰ ਨਹੀਂ ਹੈ।