ਵਾਸਿ਼ੰਗਟਨ, 18 ਫਰਵਰੀ (ਪੋਸਟ ਬਿਊਰੋ) : ਬਾਇਡਨ ਪ੍ਰਸ਼ਾਸਨ ਵੱਲੋਂ ਗਰੀਬ ਦੇਸ਼ਾਂ ਲਈ ਕਰੋਨਾਵਾਇਰਸ ਵੈਕਸੀਨੇਸ਼ਨ ਪ੍ਰੋਗਰਾਮ ਲਈ 4 ਬਿਲੀਅਨ ਅਮਰੀਕੀ ਡਾਲਰ ਦੇਣ ਦਾ ਤਹੱਈਆ ਪ੍ਰਗਟਾਇਆ ਗਿਆ ਹੈ। ਇਹ ਖੁਲਾਸਾ ਅਮਰੀਕੀ ਅਧਿਕਾਰੀਆਂ ਵੱਲੋਂ ਕੀਤਾ ਗਿਆ।
ਅਧਿਕਾਰੀਆਂ ਨੇ ਦੱਸਿਆ ਕਿ ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਸ਼ੁੱਕਰਵਾਰ ਨੂੰ ਹੋਣ ਜਾ ਰਹੀ ਜੀ-7 ( ਸੱਤ ਐਡਵਾਂਸ ਅਰਥਚਾਰਿਆਂ ਦੇ ਗਰੁੱਪ ) ਆਗੂਆਂ ਦੀ ਆਪਣੀ ਪਹਿਲੀ ਮੀਟਿੰਗ ਵਿੱਚ ਕੋਵੈਕਸ ਪ੍ਰੋਗਰਾਮ, ਜਿਸ ਦੀ ਸਹਿ ਅਗਵਾਈ ਵਰਲਡ ਹੈਲਥ ਆਰਗੇਨਾਈਜ਼ੇਸ਼ਨ ਵੱਲੋਂ ਕੀਤੀ ਜਾ ਰਹੀ ਹੈ, ਲਈ ਫੌਰੀ 2 ਬਿਲੀਅਨ ਡਾਲਰ ਡੋਨੇਸ਼ਨ ਦੇਣ ਦਾ ਐਲਾਨ ਕਰ ਸਕਦੇ ਹਨ। ਕੋਵੈਕਸ ਪ੍ਰੋਗਰਾਮ ਦੁਨੀਆ ਭਰ ਵਿੱਚ ਕਰੋਨਾਵਾਇਰਸ ਵੈਕਸੀਨ ਦੀ ਸਹੀ ਸਪਲਾਈ ਯਕੀਨੀ ਬਣਾਉਣ ਲਈ ਸ਼ੁਰੂ ਕੀਤਾ ਗਿਆ ਹੈ।
ਅਧਿਕਾਰੀਆਂ ਨੇ ਆਖਿਆ ਕਿ ਅਮਰੀਕਾ ਬਾਕੀ ਰਹਿੰਦੇ 2 ਬਿਲੀਅਨ ਡਾਲਰ ਅਗਲੇ ਦੋ ਸਾਲਾਂ ਵਿੱਚ ਮੁਹੱਈਆ ਕਰਾਵੇਗਾ।ਉਸ ਸਮੇਂ ਤੱਕ ਹੋਰ ਦੇਸ਼ ਵੀ ਆਪਣੇ ਵਾਅਦੇ ਕਰਕੇ ਉਨ੍ਹਾਂ ਨੂੰ ਨਿਭਾਉਣ ਵੱਲ ਵੱਧ ਰਹੇ ਹੋਣਗੇ।ਅਮਰੀਕਾ ਦੀ ਇਸ ਫੰਡਿੰਗ ਨੂੰ ਪਹਿਲਾਂ ਹੀ ਕਾਂਗਰਸ ਵੱਲੋਂ ਮਨਜ਼ੂਰੀ ਦੇ ਦਿੱਤੀ ਗਈ ਹੈ। ਬਾਇਡਨ ਵੱਲੋਂ ਚੁੱਕਿਆ ਜਾ ਰਿਹਾ ਇਹ ਕਦਮ ਸਾਬਕਾ ਰਾਸ਼ਟਰਪਤੀ ਟਰੰਪ ਤੋਂ ਬਿਲਕੁਲ ਉਲਟ ਹੈ। ਜਿ਼ਕਰਯੋਗ ਹੈ ਕਿ ਟਰੰਪ ਨੇ ਡਬਲਿਊਐਚਓ ਤੋਂ ਇਹ ਆਖਦਿਆਂ ਹੋਇਆਂ ਕਿਨਾਰਾ ਕਰਨ ਦੀ ਧਮਕੀ ਦਿੱਤੀ ਸੀ ਕਿ ਉਹ ਚੀਨ ਦੇ ਕਾਫੀ ਨੇੜੇ ਹੈ ਤੇ ਚੀਨ ਵਿੱਚ ਹੀ 2019 ਦੇ ਅੰਤ ਵਿੱਚ ਕਰੋਨਾਵਾਇਰਸ ਪੈਦਾ ਹੋਇਆ।
ਕੋਵੈਕਸ ਵੱਲੋਂ 2021 ਦੇ ਅੰਤ ਤੱਕ ਗਰੀਬ ਤੇ ਦਰਮਿਆਨੀ ਆਮਦਨ ਵਾਲੇ ਮੁਲਕਾਂ ਦੀ 20 ਫੀ ਸਦੀ ਆਬਾਦੀ ਨੂੰ 2021 ਦੇ ਅੰਤ ਤੱਕ ਕਵਰ ਕਰਨ ਲਈ 2 ਬਿਲੀਅਨ ਵੈਕਸੀਨ ਡੋਜ਼ਾਂ ਡਲਿਵਰ ਕਰਨ ਦਾ ਟੀਚਾ ਮਿਥਿਆ ਗਿਆ ਹੈ। ਫੰਡਾਂ ਦੀ ਘਾਟ ਕਾਰਨ ਇਸ ਪ੍ਰੋਗਰਾਮ ਦੇ ਅਸਫਲ ਹੋਣ ਦਾ ਖਤਰਾ ਵੀ ਬਣਿਆ ਹੋਇਆ ਹੈ। ਇਸ ਪ੍ਰੋਗਰਾਮ ਦੇ ਸਹਿ-ਸੰਚਾਲਕ ਗੈਵੀ ਵੈਕਸੀਨ ਅਲਾਇੰਸ ਨੇ ਇਹ ਵੀ ਆਖਿਆ ਕਿ ਹੈ ਕਿ ਇਸ ਪ੍ਰੋਗਰਾਮ ਨੂੰ ਸਫਲ ਕਰਨ ਲਈ ਫੰਡਾਂ ਦੇ ਨਾਲ ਨਾਲ ਸਿਆਸੀ ਸਹਿਯੋਗ ਦੀ ਵੀ ਲੋੜ ਹੈ।