ਟੋਰਾਂਟੋ, 18 ਫਰਵਰੀ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਵਿਧਾਇਕਾਂ ਨੇ ਬੁੱਧਵਾਰ ਨੂੰ ਮਹਾਂਮਾਰੀ ਦਰਮਿਆਨ ਇੱਕ ਸਿਆਸਤਦਾਨ ਦੀ ਤਨਖਾਹ ਘਟਾਉਣ ਦੇ ਪੱਖ ਵਿੱਚ ਵੋਟ ਪਾਈ। ਅਜਿਹਾ ਉਸ ਸਮੇਂ ਹੋਇਆ ਜਦੋਂ ਇਸੇ ਸਿਆਸਤਦਾਨਾਂ ਵੱਲੋਂ ਸਾਰੇ ਮੈਂਬਰਾਂ ਦੀ ਤਨਖਾਹ ਘਟਾਉਣ ਦਾ ਪ੍ਰਸਤਾਵ ਪੇਸ਼ ਕੀਤਾ ਸੀ।
ਸਪੀਕਰ ਟੈੱਡ ਆਰਨੌਟ ਨੇ ਇਸ ਮਤੇ ਨੂੰ ਬੇਤੁਕਾ ਦੱਸਦਿਆਂ ਆਖਿਆ ਕਿ ਵਿਧਾਇਕਾਂ ਦੀ ਤਨਖਾਹ ਵਿੱਚ ਕਟੌਤੀ ਬਿੱਲ ਲਿਆ ਕੇ ਹੀ ਕੀਤੀ ਜਾ ਸਕਦੀ ਹੈ।ਸਾਬਕਾ ਪ੍ਰੋਗਰੈਸਿਵ ਕੰ਼ਜਰਵੇਟਿਵ ਰੋਮਨ ਬਾਬਰ, ਜੋ ਕਿ ਹੁਣ ਆਜ਼ਾਦਾਨਾ ਤੌਰ ਉੱਤੇ ਵਿਚਰਦਾ ਹੈ, ਨੇ ਸਰਕਾਰ ਦੇ ਹਾਊਸ ਲੀਡਰ ਉੱਤੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਮੌਜੂਦਾ ਹਾਲਾਤ ਨਾਲ ਇੱਕ ਪਾਸੇ ਜਿੱਥੇ ਓਨਟਾਰੀਓ ਵਾਸੀ ਸੰਘਰਸ਼ ਕਰ ਰਹੇ ਹਨ ਉੱਥੇ ਹੀ ਉਹ ਹਾਲਾਤ ਨੂੰ ਹਲਕਿਆਂ ਵਿੱਚ ਲੈ ਰਹੇ ਹਨ।
ਪਰ ਹਾਊਸ ਲੀਡਰ ਪਾਲ ਕੈਲੈਂਡਰਾ ਨੇ ਆਖਿਆ ਕਿ ਉਹ ਇਸ ਗੱਲ ਨੂੰ ਲੈ ਕੇ ਚਿੰਤਤ ਹਨ ਕਿ ਉਨ੍ਹਾਂ ਨੂੰ ਬਿਨਾਂ ਢੁਕਵੀਂ ਬਹਿਸ ਕਰਵਾਇਆਂ ਬਿੱਲ ਪਾਸ ਕਰਨੇ ਪੈ ਰਹੇ ਹਨ। ਜਿ਼ਕਰਯੋਗ ਹੈ ਕਿ ਬਾਬਰ ਨੇ ਹਰ ਹਫਤੇ ਮੈਂਬਰਾਂ ਦੀਆਂ ਤਨਖਾਹਾਂ ਵਿੱਚ 500 ਡਾਲਰ ਦੀ ਕਟੌਤੀ ਕਰਨ ਲਈ ਬਿੱਲ ਪੇਸ਼ ਕੀਤਾ ਸੀ। ਇਹ ਓਨੀ ਹੀ ਰਕਮ ਹੈ ਜਿੰਨੀ ਕਿ ਪਿਛਲੇ ਸਾਲ ਪਹਿਲੀ ਵੇਵ ਦੌਰਾਨ ਲਾਏ ਗਏ ਲਾਕਡਾਊਨਜ਼ ਦੌਰਾਨ ਕੰਮ ਤੋਂ ਹੱਥ ਧੁਆਉਣ ਵਾਲੇ ਕੈਨੇਡੀਅਨਾਂ ਲਈ ਉਪਲਬਧ ਕਰਵਾਈ ਗਈ ਫੈਡਰਲ ਮਦਦ ਸੀ।