ਚੰਡੀਗੜ੍ਹ, 5 ਦਸੰਬਰ (ਪੋਸਟ ਬਿਊਰੋ)- ਸੱਤਰ ਸਾਲਾ ਐੱਨ ਆਰ ਆਈ ਮਹਿਲਾ ਜੋਗਿੰਦਰ ਕੌਰ ਸੰਧੂ ਦੀਆਂ ਲੁਧਿਆਣਾ ਦੇ ਪੱਖੋਵਾਲ ਰੋਡ ਉੱਤੇ ਕਰੋੜਾਂ ਦੀਆਂ ਦੋ ਕੋਠੀਆਂ ਉਤੇ ਲੁਧਿਆਣਾ ਦੇ ਲੈਂਡ ਮਾਫੀਆ ਅਤੇ ਸਥਾਨਕ ਪੁਲਸ ਅਫਸਰਾਂ ਨੇ ਮਿਲੀਭੁਗਤ ਕਰ ਕੇ 14 ਸਾਲ ਪਹਿਲਾਂ ਕਬਜ਼ਾ ਕਰ ਲਿਆ ਸੀ। ਫਰਾਂਸ ਦੀ ਰਹਿਣ ਵਾਲੀ ਐੱਨ ਆਰ ਆਈ ਜੋਗਿੰਦਰ ਕੌਰ ਨੇ ਭਾਰਤ ਆ ਕੇ ਇਨ੍ਹਾਂ ਦੇ ਖਿਲਾਫ ਆਵਾਜ਼ ਚੁੱਕੀ। ਦੋਸ਼ੀਆਂ ਨੇ ਸਾਜ਼ਿਸ਼ ਹੇਠ ਉਸ ਨੂੰ ਡਰਾਉਣ ਲਈ ਜਾਅਲਸਾਜ਼ੀ ਕਰ ਕੇ ਪੰਜਾਬ ਤੇ ਹਰਿਆਣਾ ਦੇ ਵੱਖ-ਵੱਖ ਥਾਣਿਆਂ ਵਿੱਚ ਉਨ੍ਹਾਂ ਦੇ ਖਿਲਾਫ ਅਗਵਾ, ਲੁੱਟ-ਖੋਹ, ਫਰਾਡ, ਕਬੂਤਰਬਾਜ਼ੀ ਦੇ 13 ਝੂਠੇ ਕੇਸ ਪੁਆ ਦਿੱਤੇ। ਜੋਗਿੰਦਰ ਕੌਰ ਨੂੰ ਅਦਾਲਤ ਨੇ 13 ਸਾਲ ਬਾਅਦ 2017 ਵਿੱਚ ਇਨ੍ਹਾਂ ਸਾਰੇ ਕੇਸਾਂ ਵਿੱਚ ਬਾ-ਇੱਜ਼ਤ ਬਰੀ ਕਰ ਦਿੱਤਾ ਅਤੇ ਉਹ ਇੱਕ ਕੋਠੀ ਨੂੰ ਵੀ ਲੈਂਡ ਮਾਫੀਆ ਤੋਂ ਖਾਲੀ ਕਰਵਾਉਣ ਵਿੱਚ ਸਫਲ ਰਹੀ।
ਲਗਭਗ 14 ਸਾਲ ਪੁਲਸ ਦੀ ਜ਼ਿਆਦਤੀ, ਆਰਥਿਕ ਨੁਕਸਾਨ ਤੇ ਮਾਨਸਿਕ ਪੀੜ ਸਹਿਣ ਬਦਲੇ ਸਤੰਬਰ 2017 ਵਿੱਚ ਜੋਗਿੰਦਰ ਕੌਰ ਸੰਧੂ ਨੇ ਉਨ੍ਹਾਂ ਪੁਲਸ ਅਫਸਰਾਂ, ਜਿਨ੍ਹਾਂ ਨੇ ਉਨ੍ਹਾਂ ਦੇ ਖਿਲਾਫ ਝੂਠੇ ਪਰਚੇ ਬਣਾਏ ਸਨ, ਉਤੇ 50-50 ਲੱਖ ਰੁਪਏ ਮਾਣਹਾਨੀ ਦੇ ਕੇਸ ਪਾਏ, ਜਿਸ ਕਾਰਨ ਇਨ੍ਹਾਂ ਸਾਰੇ ਦੋਸ਼ੀ ਪੁਲਸ ਅਫਸਰਾਂ ਉੱਤੇ ਗਾਜ ਡਿੱਗਣੀ ਤੈਅ ਹੈ। ਜੋਗਿੰਦਰ ਕੌਰ ਨੇ ਕਿਹਾ ਕਿ ਇਸੇ ਡਰ ਕਾਰਨ ਉਕਤ ਅਧਿਕਾਰੀ ਮੇਰੇ ਪਿੱਛੇ ਹੱਥ ਧੋ ਕੇ ਪੈ ਗਏ ਹਨ ਤੇ ਮੈਨੂੰ ਬਿਨਾਂ ਵਜ੍ਹਾ ਪੁਰਾਣੇ ਅਤੇ ਨਵੇਂ ਕੇਸ ਪਾ ਕੇ ਪ੍ਰੇਸ਼ਾਨ ਕਰਨਾ ਸ਼ੁਰੂ ਕਰ ਦਿੱਤਾ ਹੈ ਅਤੇ ਦਬਾਅ ਬਣਾਇਆ ਜਾ ਰਿਹਾ ਹੈ ਕਿ ਸਾਨੂੰ ਲਿਖ ਕੇ ਦੇਵੇ ਕਿ ਪੁਲਸ ਦੀ ਕਾਰਵਾਈ ਤੋਂ ਮੈਂ ਸੰਤੁਸ਼ਟ ਹਾਂ, ਪੁਲਸ ਨੇ ਮੇਰਾ ਪੂਰਾ ਸਾਥ ਦਿੱਤਾ ਤੇ ਮੈਂ ਕੇਸ ਵਾਪਸ ਲੈ ਲਵਾਂ। ਉਨ੍ਹਾਂ ਦੋਸ਼ ਲਾਇਆ ਕਿ ਮਾਰਚ 2018 ਵਿੱਚ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਅਤੇ ਛੇ ਅਪ੍ਰੈਲ 2018 ਨੂੰ ਲੁਧਿਆਣਾ ਪੁਲਸ ਕਮਿਸ਼ਨਰ ਸਮੇਤ ਕਈ ਸ਼ਿਕਾਇਤਾਂ ਪੁਲਸ ਦੇ ਅਧਿਕਾਰੀਆਂ ਨੂੰ ਦੇ ਚੁੱਕੀ ਹਾਂ ਕਿ ਦੋਸ਼ੀ ਮੇਰੀ ਜਾਨ ਲੈਣਾ ਚਾਹੁੰਦੇ ਹਨ, ਪੁਲਸ ਵੱਲੋਂ ਮੈਨੂੰ ਸਕਿਓਰਿਟੀ ਦੇਣ ਦੀ ਗੱਲ ਹੋਈ, ਪਰ ਕਾਗਜ਼ੀ ਕਾਰਵਾਈ ਤੋਂ ਇਲਾਵਾ ਕਿਸੇ ਵੀ ਦੋਸ਼ੀ ਨੂੰ ਪੁਲਸ ਅੱਜ ਤੱਕ ਫੜ ਨਹੀਂ ਸਕੀ। ਉਨ੍ਹਾਂ ਦੋਸ਼ ਲਾਇਆ ਕਿ ਪੁਲਸ ਦੋਸ਼ੀਆਂ ਦੀ ਪੈਰਵੀ ਕਰਦੇ ਹੋਏ ਉਨ੍ਹਾਂ ਖਿਲਾਫ ਦਰਜ ਸਾਰੇ ਕੇਸਾਂ ਦੀ ਰਿਪੋਰਟ ਨੂੰ ਬੇਬੁਨਿਆਦ ਦੱਸ ਕੇ ਦੁਬਾਰਾ ਖੋਲ੍ਹ ਰਹੀ ਹੈ। ਉਸ ਨੇ ਕਿਹਾ ਕਿ ਮੇਰੀ ਮੰਗ ਤੇ ਚਿਤਾਵਨੀ ਹੈ ਕਿ ਮੈਂ ਪੁਲਸ ਤੋਂ ਇਨਸਾਫ ਮੰਗਦੇ-ਮੰਗਦੇ ਥੱਕ ਚੁੱਕੀ ਹਾਂ। ਜੇ 13 ਦਸੰਬਰ ਤੋਂ ਪਹਿਲਾਂ ਮੈਨੂੰ ਇਨਸਾਫ ਨਾ ਮਿਲਿਆ ਤਾਂ ਮੈਂ ਡੀ ਜੀ ਪੀ ਪੰਜਾਬ ਦੇ ਦਫਤਰ ਦੇ ਬਾਹਰ ਬੈਠ ਜਾਵਾਂਗੀ ਅਤੇ ਉਦੋਂ ਤੱਕ ਨਹੀਂ ਉਠਾਂਗੀ, ਜਦੋਂ ਤੱਕ ਇਨਸਾਫ ਨਹੀਂ ਮਿਲਦਾ।