ਲੰਡਨ, 17 ਫਰਵਰੀ (ਪੋਸਟ ਬਿਊਰੋ) : ਤਬੀਅਤ ਖਰਾਬ ਹੋਣ ਕਾਰਨ 99 ਸਾਲਾ ਪ੍ਰਿੰਸ ਫਿਲਿਪ ਨੂੰ ਲੰਡਨ ਦੇ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।
ਪੈਲੈਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਮਹਾਰਾਣੀ ਐਲਿਜ਼ਾਬੈੱਥ ਦੇ ਪਤੀ ਨੂੰ ਮੰਗਲਵਾਰ ਸ਼ਾਮ ਨੂੰ ਹੀ ਪ੍ਰ੍ਰਾਈਵੇਟ ਕਿੰਗ ਐਡਵਰਡ (ਸੱਤਵੇਂ) ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਸੀ। ਇਹ ਵੀ ਆਖਿਆ ਗਿਆ ਹੈ ਕਿ ਪ੍ਰਿੰਸ ਫਿਲਿਪ ਦੇ ਡਾਕਟਰ ਦੀ ਸਲਾਹ ਉੱਤੇ ਅਹਿਤਿਆਤਨ ਇਹ ਕਦਮ ਚੁੱਕਿਆ ਜਾ ਰਿਹਾ ਹੈ। ਇਹ ਵੀ ਦੱਸਿਆ ਗਿਆ ਕਿ ਕੁੱਝ ਦਿਨਾਂ ਲਈ ਆਰਾਮ ਤੇ ਆਬਜ਼ਰਵੇਸ਼ਨ ਵਾਸਤੇ ਪ੍ਰਿੰਸ ਫਿਲਿਪ ਨੂੰ ਹਸਪਤਾਲ ਵਿੱਚ ਹੀ ਰੱਖਿਆ ਜਾਵੇਗਾ।
ਇਹ ਵੀ ਜਾਣਕਾਰੀ ਦਿੱਤੀ ਗਈ ਹੈ ਕਿ ਉਨ੍ਹਾਂ ਦੀ ਸਮੱਸਿਆ ਕੋਵਿਡ-19 ਨਾਲ ਸਬੰਧਤ ਨਹੀਂ ਹੈ। ਜਨਵਰੀ ਦੇ ਸੁ਼ਰੂ ਵਿੱਚ ਹੀ ਕੁਈਨ ਤੇ ਪਿੰ੍ਰਸ ਫਿਲਿਪ ਦਾ ਕੋਵਿਡ-19 ਸਬੰਧੀ ਟੀਕਾਕਰਣ ਹੋ ਗਿਆ ਸੀ। ਡਿਊਕ ਆਫ ਐਡਿਨਬਰਗ ਦੇ ਨਾਂ ਨਾਲ ਵੀ ਜਾਣੇ ਜਾਂਦੇ ਪ੍ਰਿੰਸ ਫਿਲਿਪ 2017 ਵਿੱਚ ਆਪਣੀਆਂ ਪਬਲਿਕ ਡਿਊਟੀਜ਼ ਤੋਂ ਰਿਟਾਇਰ ਹੋ ਚੁੱਕੇ ਹਨ ਤੇ ਉਹ ਬਹੁਤ ਘੱਟ ਹੀ ਜਨਤਕ ਤੌਰ ਉੱਤੇ ਵਿਚਰਦੇ ਹਨ। ਕਰੋਨਾਵਾਇਰਸ ਲਾਕਡਾਊਨ ਦੌਰਾਨ ਵੀ ਉਹ ਲੰਡਨ ਦੇ ਪੱਛਮ ਵਿੱਚ ਸਥਿਤ ਵਿੰਡਸਰ ਕਾਸਲ ਵਿੱਚ ਮਹਾਂਰਾਣੀ ਨਾਲ ਰਹਿ ਰਹੇ ਸਨ।