ਸਿੰਗਾਪੁਰ, 17 ਫਰਵਰੀ (ਪੋਸਟ ਬਿਊਰੋ)- ਸਿੰਗਾਪੁਰ ਦੇ ਸਭ ਤੋਂ ਪ੍ਰਾਚੀਨ ਹਿੰਦੂ ਮੰਦਰ ਦੇ ਗਹਿਣੇ ਗਿਰਵੀ ਰੱਖ ਕੇ ਰਕਮ ਇਕੱਠੀ ਕਰਨ ਲਈ ਭਾਰਤੀ ਪੁਜਾਰੀ ਉੱਤੇ ਅਪਰਾਧਿਕ ਵਿਸ਼ਵਾਸਘਾਤ ਦਾ ਦੋਸ਼ ਲਾਇਆ ਗਿਆ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਕੰਡਾਸਾਮੀ ਸੈਨਾਪਤੀ (37) ਉੱਤੇ ਭ੍ਰਿਸ਼ਟਾਚਾਰ, ਨਸ਼ੀਲੇ ਪਦਾਰਥ ਦੀ ਸਮਗਲਿੰਗ ਤੇ ਹੋਰ ਗੰਭੀਰ ਅਪਰਾਧਾਂ ਦੇ ਕਾਨੂੰਨ ਹੇਠ ਕਰਮਚਾਰੀ ਵਜੋਂ ਅਪਰਾਧਿਕ ਵਿਸ਼ਵਾਸਘਾਤ ਦੇ ਦੋਸ਼ ਵਿੱਚ ਕੇਸ ਦਰਜ ਕੀਤਾ ਗਿਆ ਹੈ। ਸ਼੍ਰੀ ਮਰੀਅੰਮਨ ਮੰਦਰ ਵਿੱਚ ਮੁੱਖ ਪੁਜਾਰੀ ਕੰਡਾਸਾਮੀ ਉੱਤੇ 2016 ਤੋਂ 2020 ਦੇ ਦੌਰਾਨ ਮੰਦਰ ਤੋਂ ਸੋਨੇ ਦੇ ਗਹਿਣੇ ਕੱਢਣ ਅਤੇ ਉਨ੍ਹਾਂ ਨੂੰ ਦੁਕਾਨਾਂ ਵਿੱਚ ਗਿਰਵੀ ਰੱਖ ਕੇ ਰਕਮ ਇਕੱਠੀ ਕਰਨ ਦਾ ਦੋਸ਼ ਹੈ। ਵਕੀਲਾਂ ਨੇ ਅਦਾਲਤ ਨੂੰ ਦੱਸਿਆ ਕਿ ਗਿਰਵੀ ਰੱਖੇ ਗਹਿਣਿਆਂ ਦੀ ਕੀਮਤ 20 ਲੱਖ ਸਿੰਗਾਪੁਰ ਡਾਲਰ (15 ਲੱਖ ਅਮਰੀਕੀ ਡਾਲਰ) ਤੋਂ ਵੱਧ ਸੀ। ਵਕੀਲ ਨੇ ਅਦਾਲਤ ਨੂੰ ਦੱਸਿਆ ਕਿ ਕੰਡਾਸਾਮੀ ਨੇ 141,000 ਡਾਲਰ ਰਕਮ ਦੇਸ਼ ਤੋਂ ਬਾਹਰ ਭੇਜੀ ਹੈ। ਪਿੱਛਲੇ ਸਾਲ ਪੁਲਸ ਨੇ ਕਿਹਾ ਸੀ ਕਿ ਕੰਡਾਸਾਮੀ ਦੇ ਕੋਲ ਕੁਝ ਗਹਿਣੇ ਗੁੰਮ ਹੋਣ ਪਿੱਛੋਂ ਜਾਂਚ ਸ਼ੁਰੂ ਕੀਤੀ ਸੀ। ਕੰਡਾਸਾਮੀ ਦੇ ਵਕੀਲ ਨੇ ਜਮਾਨਤ ਲਈ ਘੱਟ ਜੁਰਮਾਨਾ ਰਾਸ਼ੀ ਰੱਖਣ ਦੀ ਬੇਨਤੀ ਕਰਦੇ ਹੋਏ ਕਿਹਾ ਕਿ ਉਨ੍ਹਾਂ ਦਾ ਕਲਾਈਂਟ ਵਿਦੇਸ਼ੀ ਹੈ ਅਤੇ ਉਹ ਜਮਾਨਤ ਲਈ ਜ਼ਿਆਦਾ ਰਾਸ਼ੀ ਨਹੀਂ ਦੇ ਸਕਦਾ। ਜੱਜ ਨੇ ਉਸ ਨੂੰ ਜਮਾਨਤ ਲਈ ਇੱਕ ਲੱਖ ਸਿੰਗਾਪੁਰ ਡਾਲਰ ਚੁਕਾਉਣ ਨੂੰ ਕਿਹਾ। ਉਸ ਦੇ ਦੋਸ਼ੀ ਪਾਏ ਜਾਣ ਉੱਤੇ ਉਸ ਨੂੰ 15 ਸਾਲ ਤੱਕ ਜੇਲ੍ਹ ਦੀ ਸਜ਼ਾ ਹੋ ਸਕਦੀ ਹੈ।