ਬਰੈਂਪਟਨ, 4 ਦਸੰਬਰ (ਪੋਸਟ ਬਿਊਰੋ) : ਸਿਟੀ ਆਫ ਬਰੈਂਪਟਨ ਕੋਲ ਹੁਣ 2018-22 ਲਈ ਰਸਮੀ ਤੌਰ ਉੱਤੇ ਨਵੀਂ ਕਾਉਂਸਲ ਹੈ।
ਸੋਮਵਾਰ ਰਾਤ ਨੂੰ ਸੈਂਕੜੇ ਬਰੈਂਪਟਨ ਵਾਸੀ ਰੋਜ਼ ਥਿਏਟਰ ਵਿੱਚ ਸਿਟੀ ਕਲਰਕ ਪੀਅਰ ਫੇਅ ਨੂੰ ਸੰਹੁ ਚੁੱਕਦਾ ਵੇਖਣ ਲਈ ਇੱਕਠੇ ਹੋਏ। ਇਹ ਸੰਹੁ ਚੁੱਕ ਸਮਾਗਮ ਘੰਟਾ ਭਰ ਚੱਲਿਆ। 22 ਅਕਤੂਬਰ ਨੂੰ ਹੋਈਆਂ ਚੋਣਾਂ ਦੌਰਾਨ ਬਰੈਂਪਟਨ ਦੇ ਵੋਟਰਾਂ ਨੇ ਕਾਉਂਸਲ ਦੇ ਪੰਜ ਨਵੇਂ ਮੈਂਬਰਾਂ ਨੂੰ ਚੁਣਿਆ। ਇਨ੍ਹਾਂ ਵਿੱਚ ਮੇਅਰ ਪੈਟ੍ਰਿਕ ਬ੍ਰਾਊਨ ਵੀ ਸ਼ਾਮਲ ਸਨ। ਇਨ੍ਹਾਂ ਤੋਂ ਇਲਾਵਾ ਵਾਰਡਜ਼ 1 ਤੇ 5 ਤੋਂ ਸਿਟੀ ਕਾਉਂਸਲਰ ਰੋਵੇਨਾ ਸੈਂਟੋਸ ਤੇ ਰੀਜਨਲ ਕਾਉਂਸਲਰ ਪਾਲ ਵਿਸੈਂਟ, ਵਾਰਡ 7 ਤੇ 8 ਤੋਂ ਸਿਟੀ ਕਾਉਂਸਲਰ ਚਾਰਮੇਨ ਵਿਲੀਅਮਜ਼ ਅਤੇ ਵਾਰਡ 9 ਤੇ 10 ਤੋਂ ਸਿਟੀ ਕਾਉਂਸਲਰ ਹਰਕੀਰਤ ਸਿੰਘ ਦੀ ਚੋਣ ਕੀਤੀ ਗਈ।
ਹੁਣ ਇਹ ਸਾਰੇ ਵਾਰਡ 2 ਤੇ 6 ਦੇ ਰਿਟਰਨਿੰਗ ਕਾਉਂਸਲਰਜ਼ ਡੱਗ ਵ੍ਹਿਲਾਨਜ਼ (ਸਿਟੀ) ਤੇ ਮਾਈਕਲ ਪਾਲੇਸੀ (ਰੀਜਨ), ਵਾਰਡਜ਼ 3 ਤੇ 4 ਤੋਂ ਜੈੱਫ ਬੋਅਮੈਨ (ਸਿਟੀ) ਤੇ ਮਾਰਟਿਨ ਮੇਡੇਰੌਸ (ਰੀਜਨ), ਦੇ ਨਾਲ ਨਾਲ ਵਾਰਡਜ਼ 7 ਤੇ 8 ਲਈ ਨਵੇਂ ਚੁਣੇ ਗਏ ਰੀਜਨਲ ਕਾਉਂਸਲਰਜ਼ ਪੈਟ ਫੋਰਟਿਨੀ ਅਤੇ ਵਾਰਡਜ਼ 9 ਤੇ 10 ਤੋਂ ਗੁਰਪ੍ਰੀਤ ਢਿੱਲੋਂ ਨਾਲ ਕੰਮ ਕਰਨਗੇ। ਆਪਣੇ ਪਿਛਲੇ ਕਾਰਜ ਕਾਲ ਵਿੱਚ ਸਿਟੀ ਕਾਉਂਸਲਰਜ਼ ਵਜੋਂ ਸੇਵਾ ਨਿਭਾਉਣ ਤੋਂ ਬਾਅਦ ਢਿੱਲੋਂ ਤੇ ਫੋਰਟਿਨੀ ਰੀਜਨਲ ਕਾਉਂਸਲ ਵਿੱਚ ਸ਼ਾਮਲ ਹੋ ਗਏ ਹਨ। ਰੀਜਨਲ ਕਾਉਂਸਲਰਜ਼ ਸਿਟੀ ਤੇ ਪੀਲ ਰੀਜਨ ਕਾਉਂਸਲ ਦੋਵਾਂ ਲਈ ਹੀ ਸੇਵਾ ਨਿਭਾਉਣਗੇ।
ਬ੍ਰਾਊਨ ਨੂੰ ਸ਼ਨਿੱਚਰਵਾਰ ਨੂੰ ਓਨਟਾਰੀਓ ਦੇ ਸਾਬਕਾ ਪ੍ਰੀਮੀਅਰ ਬਿੱਲ ਡੇਵਿਸ ਨੇ ਸੰਹੁ ਚੁਕਾਈ ਸੀ। ਇਸ ਸਬੰਧੀ ਵੀਡੀਓ ਸਾਰੇ ਦੇ ਸਾਰੇ 10 ਕਾਉਂਸਲਰਜ਼ ਵੱਲੋਂ ਸੰਹੁ ਚੁੱਕ ਲਏ ਜਾਣ ਤੋਂ ਬਾਅਦ ਵਿਖਾਈ ਗਈ। ਬ੍ਰਾਊਨ ਨੇ ਆਪਣੇ ਸ਼ੁਰੂਆਤੀ ਭਾਸ਼ਣ ਵਿੱਚ ਆਖਿਆ ਕਿ ਉਹ ਨਵੀਂ ਟੀਮ ਨਾਲ ਕੰਮ ਕਰਨ ਲਈ ਬਹੁਤ ਉਤਸ਼ਾਹਿਤ ਹਨ। ਉਨ੍ਹਾਂ ਆਖਿਆ ਕਿ ਸਾਡੇ ਕੋਲ ਅਜਿਹੀ ਸਿਟੀ ਕਾਉਂਸਲ ਹੈ ਜਿਹੜੀ ਸ਼ਹਿਰ ਵਿਚਲੀ ਵੰਨ ਸੁਵੰਨਤਾ ਨੂੰ ਦਰਸਾਉਂਦੀ ਹੈ। ਇੱਥੇ ਦੱਸਣਾ ਬਣਦਾ ਹੈ ਕਿ ਵਿਲੀਅਮਜ਼ ਸਿਆਹ ਨਸਲ ਦੀ ਪਹਿਲੀ ਮਹਿਲਾ ਹੈ ਜਿਸਦੀ ਬਰੈਂਪਟਨ ਕਾਉਂਸਲ ਵਿੱਚ ਚੋਣ ਕੀਤੀ ਗਈ ਹੈ ਤੇ ਸੈਂਟੋਸ ਫਿਲੀਪੀਨੋ ਵਜੋਂ ਸੀਟ ਸਾਂਭਣ ਵਾਲੇ ਪਹਿਲੇ ਸ਼ਖ਼ਸ ਹਨ।