ਏਲਨਾਬਾਦ, 4 ਦਸੰਬਰ, (ਪੋਸਟ ਬਿਊਰੋ)- ਰਾਜਸਥਾਨ ਵਿਧਾਨ ਸਭਾ ਚੋਣਾਂ ਵਿਚ ਕਾਂਗਰਸ `ਤੇ ਸ਼ਬਦੀ ਹਮਲੇ ਕਰ ਰਹੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਕਿਹਾ ਕਿ ਵੰਡ ਵੇਲੇ ਗੁਰਦੁਆਰਾ ਕਰਤਾਰਪੁਰ ਸਾਹਿਬ ਪਾਕਿਸਤਾਨ ਵਿਚ ਇਸ ਲਈ ਚਲਿਆ ਗਿਆ ਸੀ ਕਿ ਉਦੋਂ ਰਾਜ ਕਰਨ ਲਈ ਤਿਆਰ ਕਾਂਗਰਸ ਪਾਰਟੀ ਦੇ ਆਗੂਆਂ ਦਾ ਨਾ ਕੋਈ ਨਜ਼ਰੀਆ ਸੀ, ਨਾ ਸਿੱਖ ਜਜ਼ਬਾਤ ਪ੍ਰਤੀ ਉਨ੍ਹਾਂ ਵਿੱਚ ਕੋਈ ਸਤਿਕਾਰ ਸੀ।
ਬੀਤੇ ਦਿਨੀਂ ਭਾਰਤ-ਪਾਕਿ ਸਰਹੱਦ ਉੱਤੇ ਕਰੀਬ ਚਾਰ ਕਿਲੋਮੀਟਰ ਲੰਮੇ ਗੁਰਦੁਆਰਾ ਕਰਤਾਰਪੁਰ ਸਾਹਿਬ ਤੱਕ ਦੇ ਲਾਂਘੇ ਦਾ ਜ਼ਿਕਰ ਕਰਦਿਆਂ ਨਰਿੰਦਰ ਮੋਦੀ ਨੇ ਹਨੂੰਮਾਨਗੜ੍ਹ ਦੀ ਚੋਣ ਰੈਲੀ ਵਿੱਚ ਕਿਹਾ, ‘ਕਾਂਗਰਸ ਦੀਆਂ ਗ਼ਲਤੀਆਂ ਸੁਧਾਰਨਾ ਹੀ ਮੇਰੀ ਹੋਣੀ ਹੈ। ਕਾਂਗਰਸ ਨੂੰ ਜਵਾਬ ਦੇਣਾ ਪਵੇਗਾ ਕਿ 70 ਸਾਲ ਪਹਿਲਾਂ ਇਹ ਕਿਉਂ ਨਾ ਕੀਤਾ। ਕਾਂਗਰਸ ਆਗੂ ਰਾਜਗੱਦੀ ਤੋਂ ਪਰ੍ਹੇ ਦੇਖਦੇ ਨਹੀਂ ਸਨ, ਜਿਸ ਕਰ ਕੇ ਕਰਤਾਰਪੁਰ ਪਾਕਿਸਤਾਨ ਵਿਚ ਚਲਾ ਗਿਆ।`
ਇਸ ਮੌਕੇ ਮੋਦੀ ਨੇ ਕਿਹਾ ਕਿ ਪੰਜਾਬ ਤੇ ਰਾਜਸਥਾਨ ਵਿੱਚ ਕਾਂਗਰਸ ਦੀਆਂ ਸਰਕਾਰਾਂ ਦੇ ਬਾਵਜੂਦ ਰਾਜਸਥਾਨ ਦੇ ਲੋਕ ਪਾਣੀ ਨੂੰ ਤਰਸਦੇ ਰਹੇ, ਸਾਡੀ ਸਰਕਾਰ ਨੇ ਸਰਹਿੰਦ ਫੀਡਰ ਅਤੇ ਰਾਜਸਥਾਨ ਕੈਨਾਲ ਦੀ 2000 ਕਰੋੜ ਰੁਪਏ ਦੀ ਲਾਗਤ ਨਾਲ ਮੁਰੰਮਤ ਕਰਵਾ ਕੇ ਇਨ੍ਹਾਂ ਨਹਿਰਾਂ ਤੋਂ ਪਾਣੀ ਦੀ ਲੀਕੇਜ ਰੋਕੀ ਅਤੇ 800 ਕਿਊਸਿਕ ਤੋਂ ਵੱਧ ਪਾਣੀ ਦੀ ਬੱਚਤ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ 2009 ਦੀਆਂ ਚੋਣਾਂ ਸਮੇ ਕਿਸਾਨੀ ਕਰਜ਼ੇ ਮੁਆਫ਼ ਕਰਨ ਦਾ ਝੂਠ ਬੋਲ ਕੇ ਕਾਂਗਰਸ ਸੱਤਾ ਵਿੱਚ ਆਈ ਸੀ, ਕਿਸਾਨੀ ਕਰਜ਼ਾ 6 ਲੱਖ ਕਰੋੜ ਸੀ, ਕਾਂਗਰਸ ਸਰਕਾਰ ਨੇ 58 ਹਜ਼ਾਰ ਕਰੋੜ ਮੁਆਫ਼ ਕਰਨ ਦਾ ਦਾਅਵਾ ਕੀਤਾ, ਪਰ ਰਿਪੋਰਟ ਆਈ ਤਾਂ ਪਤਾ ਲੱਗਾ ਕਿ ਇਸ ਵਿੱਚ 35 ਲੱਖ ਲੋਕ ਉਹ ਸਨ, ਜਪ ਕਿਸਾਨ ਨਹੀਂ ਸਨ।