ਸਟਾਕਹੋਮ, 3 ਦਸੰਬਰ, (ਪੋਸਟ ਬਿਊਰੋ)- ਸਾਹਿਤ ਦਾ ਨੋਬਲ ਐਵਾਰਡ ਦੇਣ ਵਾਲੀ ਸਵੀਡਿਸ਼ ਅਕੈਡਮੀ ਨਾਲ ਸੰਬੰਧਤ ਫੋਟੋਗ੍ਰਾਫਰ ਜੀਨ ਕਲਾਊਡ ਅਰਨਾਲਟ ਨੂੰ ਅਪੀਲੀ ਅਦਾਲਤ ਨੇ ਬਲਾਤਕਾਰ ਦੇ ਇਕ ਹੋਰ ਕੇਸ `ਚ ਦੋਸ਼ੀ ਕਰਾਰ ਦਿੱਤਾ ਤੇ ਉਨ੍ਹਾਂ ਨੂੰ ਢਾਈ ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ। ਇਸ ਤੋਂ ਪਹਿਲਾਂ ਹੇਠਲੀ ਅਦਾਲਤ ਨੇ ਉਨ੍ਹਾਂ ਨੂੰ ਇਕ ਕੇਸ `ਚ ਦੋਸ਼ੀ ਮੰਨਦੇ ਹੋਏ ਦੋ ਸਾਲ ਦੀ ਸਜ਼ਾ ਸੁਣਾਈ ਸੀ।
ਵਰਨਣ ਯੋਗ ਹੈ ਕਿ ਅਰਨਾਲਟ ਨਵੰਬਰ 2017 `ਚ ਓਦੋਂ ਖਬਰਾਂ ਵਿੱਚ ਆਏ ਸਨ, ਜਦੋਂ ‘ਮੀ ਟੂ` ਮੁਹਿੰਮ ਵਜੋਂ 18 ਔਰਤਾਂ ਨੇ ਉਨ੍ਹਾਂ ਉੱਤੇ ਬਲਾਤਕਾਰ ਦਾ ਦੋਸ਼ ਲਾਇਆ ਸੀ। ਇਸ ਸਾਲ ਅਕਤੂਬਰ `ਚ ਇਕ ਅਦਾਲਤ ਨੇ 72 ਸਾਲਾ ਅਰਨਾਲਟ ਨੂੰ ਬਲਾਤਕਾਰ ਦੇ ਇਕ ਕੇਸ ਦਾ ਦੋਸ਼ੀ ਮੰਨਦੇ ਹੋਏ ਦੋ ਸਾਲ ਦੀ ਸਜ਼ਾ ਕੀਤੀ ਸੀ। ਇਹ ਬਲਾਤਕਾਰ ਮਾਮਲਾ ਸਾਲ 2011 ਦਾ ਹੈ। ਪੀੜਤ ਔਰਤ ਨੇ ਅਰਨਾਲਟ ਉਤੇ ਦੋ ਵਾਰੀ ਬਲਾਤਕਾਰ ਕਰਨ ਦਾ ਦੋਸ਼ ਲਾਇਆ ਸੀ। ਅਦਾਲਤ ਨੇ ਦੂਸਰਾ ਦੋਸ਼ ਇਹ ਕਹਿ ਕੇ ਰੱਦ ਕਰ ਦਿੱਤਾ ਕਿ ਪੀੜਤਾ ਦੀ ਦਲੀਲ ਭਰੋਸੇ ਯੋਗ ਨਹੀਂ। ਅਪੀਲੀ ਅਦਾਲਤ ਨੇ ਸੁਣਵਾਈ ਕਰਦੇ ਹੋਏ ਕਿਹਾ ਕਿ ਇਸ ਵਿੱਚ ਸ਼ੱਕ ਨਹੀਂ ਕਿ ਉਹ ਬਲਾਤਕਾਰ ਦਾ ਦੋਸ਼ੀ ਹੈ। ਪੀੜਤਾ ਦਾ ਬਿਆਨ ਵੀ ਮਿਲਦੇ ਸਬੂਤਾਂ ਨਾਲ ਮੇਲ ਖਾਂਦਾ ਹੈ। ਸਜ਼ਾ ਦੇਂਦੇ ਹੋਏ ਅਦਾਲਤ ਨੇ ਕਿਹਾ ਕਿ ਅਰਨਾਲਟ ਦੀ ਉਮਰ ਧਿਆਨ `ਚ ਰੱਖੀ ਗਈ ਹੈ। ਅਦਾਲਤ ਨੇ ਇਸ ਗੱਲ ਦਾ ਨੋਟਿਸ ਲਿਆ ਕਿ ਕੇਸ ਬੜੇ ਲੰਬੇ ਸਮੇਂ ਬਾਅਦ ਜਾਂਚ ਲਈ ਆਇਆ ਹੈ।
ਅਰਨਾਲਟ ਉੱਤੇ ਇਹੋ ਜਿਹੇ ਦੋਸ਼ ਲੱਗਣ ਤੋਂ ਬਾਅਦ ਨੋਬਲ ਕਮੇਟੀ ਨਾਲ ਜੁੜੇ ਕੁਝ ਹੋਰ ਬਲਾਤਕਾਰ ਕੇਸ ਵੀ ਪਤਾ ਲੱਗੇ ਸਨ। ਇਨ੍ਹਾਂ ਵਿਵਾਦਾਂ ਕਾਰਨ ਸਾਹਿਤ ਦੇ ਨੋਬਲ ਇਨਾਮਾਂ ਦਾ ਫ਼ੈਸਲਾ ਕਰਨ ਵਾਲੇ 18 ਮੈਂਬਰੀ ਬੋਰਡ ਦੇ ਅੱਠ ਮੈਂਬਰਾਂ ਨੇ ਆਪਣੇ ਆਪ ਨੂੰ ਅਕੈਡਮੀ ਤੋਂ ਵੱਖ ਕਰ ਕਰ ਲਿਆ ਸੀ। ਉਨ੍ਹਾਂ ਨੇ ਕਿਹਾ ਸੀ ਕਿ ਇਨ੍ਹਾਂ ਦੋਸ਼ਾਂ ਕਾਰਨ ਐਵਾਰਡ ਅਤੇ ਅਕੈਡਮੀ ਨੂੰ ਧੱਕਾ ਲੱਗਾ ਹੈ। ਅਰਨਾਲਟ ਉੱਤੇ ਇਹ ਵੀ ਦੋਸ਼ ਲੱਗਦਾ ਹੈ ਕਿ ਉਨ੍ਹਾਂ ਨੇ ਸੱਤ ਵਾਰੀ ਨੋਬਲ ਜੇਤੂਆਂ ਦਾ ਨਾਂ ਨਤੀਜਾ ਐਲਾਨੇ ਜਾਣ ਤੋਂ ਪਹਿਲਾਂ ਹੀ ਲੀਕ ਕਰ ਦਿੱਤਾ ਸੀ।