ਟੋਰਾਂਟੋ, 26 ਜਨਵਰੀ (ਪੋਸਟ ਬਿਊਰੋ) : ਸੇਫਟੀ ਸਬੰਧੀ ਚਿੰਤਾਵਾਂ ਨੂੰ ਲੈ ਕੇ 22 ਐਜੂਕੇਸ਼ਨਲ ਅਸਿਸਟੈਂਟਸ ਦੇ ਵਿਸ਼ੇਸ਼ ਲੋੜਾਂ ਵਾਲੇ ਵਿਦਿਆਰਥੀਆਂ ਨੂੰ ਸੇਵਾਵਾਂ ਦੇਣ ਤੋਂ ਮਨ੍ਹਾਂ ਕਰਨ ਉਪਰੰਤ ਟੋਰਾਂਟੋ ਦੇ ਪਬਲਿਕ ਸਕੂਲ ਵਿੱਚ ਪ੍ਰਿੰਸੀਪਲ ਤੇ ਵਾਈਸ ਪ੍ਰਿੰਸੀਪਲ ਨੂੰ ਹੋਰਨਾਂ ਸਕੂਲਾਂ ਤੋਂਂ ਲਿਆਂਦਾ ਗਿਆ।
45 ਅਜਿਹੇ ਵਿਦਿਆਰਥੀ ਇਸ ਸਮੇਂ ਬਾਲਡਵਿਨ ਸਟਰੀਟ ਉੱਤੇ ਸਥਿਤ ਬੈਵਰਲੀ ਸਕੂਲ ਜਾਂਦੇ ਹਨ। ਟੋਰਾਂਟੋ ਐਜੂਕੇਸ਼ਨ ਵਰਕਰਜ਼ ਯੂਨੀਅਨ ਦੇ ਪ੍ਰੈਜ਼ੀਡੈਂਟ ਜੌਹਨ ਵੈਦਰਅੱਪ ਦਾ ਕਹਿਣਾ ਹੈ ਕਿ ਸਟਾਫ ਤੇ ਮਾਪੇ ਸਕੂਲ ਵਿੱਚ ਰੈਪਿਡ ਟੈਸਟਿੰਗ ਮੰਗਦੇ ਹਨ। ਵੈਦਰਅੱਪ ਨੇ ਆਖਿਆ ਕਿ ਇਹ ਸੱਭ ਸਪੈਸ਼ਲ ਸਿੱਖਿਆ ਤੇ ਕੋਵਿਡ-19 ਕਾਰਨ ਹੋ ਰਿਹਾ ਹੈ। ਸਰਕਾਰ ਵੱਲੋਂ ਸਕੂਲ ਬੋਰਡ ਨੂੰ ਸਹੀ ਢੰਗ ਨਾਲ ਫੰਡ ਮੁਹੱਈਆ ਨਹੀਂ ਕਰਵਾਏ ਜਾ ਰਹੇ ਤੇ ਸਪੈਸ਼ਲ ਸਿੱਖਿਆ ਲਈ ਤਾਂ ਖਾਸਤੌਰ ਉੱਤੇ ਫੰਡ ਨਹੀਂ ਦਿੱਤੇ ਜਾ ਰਹੇ।
ਵਿਸ਼ੇਸ਼ ਲੋੜਾਂ ਵਾਲੇ ਵਿਦਿਆਰਥੀਆਂ ਨਾਲ ਦਿੱਕਤ ਇਹ ਹੈ ਕਿ ਉਹ ਮਾਸਕ ਫਾੜ ਦਿੰਦੇ ਹਨ ਤੇ ਇਹ ਸਟਾਫ ਲਈ ਵੀ ਦਿੱਕਤ ਵਾਲੀ ਗੱਲ ਹੈ। ਟੋਰਾਂਟੋ ਡਿਸਟ੍ਰਿਕਟ ਸਕੂਲ ਬੋਰਡ (ਟੀਡੀਐਸਬੀ) ਦਾ ਕਹਿਣਾ ਹੈ ਕਿ ਇਸ ਸਮੱਸਿਆ ਨੂੰ ਹੱਲ ਕਰਨ ਲਈ ਗੱਲਬਾਤ ਚੱਲ ਰਹੀ ਹੈ। ਟੀਡੀਐਸਬ ਦੇ ਤਰਜ਼ਮਾਨ ਸੈ਼ਰੀ ਸ਼ਵਾਰਟਜ਼-ਮਾਲਟਜ਼ ਦਾ ਕਹਿਣਾ ਹੈ ਕਿ ਲੋਕਲ ਸਕੂਲ ਦੇ ਐਡਮਨਿਸਟ੍ਰੇਟਰਜ਼ ਵੱਲੋਂ ਮਦਦ ਕੀਤੀ ਜਾ ਰਹੀ ਹੈ।  
ਮਾਲਟਜ਼ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਆਖਿਆ ਕਿ ਜਿਹੜੇ ਐਜੂਕੇਸ਼ਨ ਅਸਿਸਟੈਂਟ ਇਨ੍ਹਾਂ ਵਿਸ਼ੇਸ਼ ਲੋੜਾਂ ਵਾਲੇ ਬੱਚਿਆਂ ਦਾ ਖਿਆਲ ਰੱਖਦੇ ਹਨ ਉਹ ਕਮਾਲ ਦੇ ਹਨ ਪਰ ਜਿਨ੍ਹਾਂ ਅਧਿਆਪਕਾਂ ਤੇ ਪ੍ਰਿੰਸੀਪਲਜ਼ ਤੇ ਵਾਈਸ ਪ੍ਰਿੰਸੀਪਲਜ਼ ਨੂੰ ਅਸੀਂ ਲੋਕਲ ਸਕੂਲਾਂ ਤੋਂ ਲੈ ਕੇ ਆਏ ਹਾਂ ਉਹ ਵੀ ਕਮਾਲ ਹਨ ਤੇ ਸਾਡੇ ਇਨ੍ਹਾਂ ਬੱਚਿਆਂ ਨੂੰ ਨਵਾਂ ਸਿੱਖਣ ਵਿੱਚ ਮਦਦ ਕਰ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਇਸ ਸਮੱਸਿਆ ਦੇ ਹੱਲ ਲਈ ਸਾਡੇ ਕੋਲ ਬੋਰਡ ਵਿੱਚ ਕਈ ਹੋਰ ਸਰੋਤ ਹਨ ਜਿਵੇਂ ਕਿ ਸਪੀਚ ਪੈਥੌਲੋਜਿਸਟ, ਬਿਹੇਵੀਅਰਲ ਥੈਰੇਪਿਸਟ ਤੇ ਹੈਲਥ ਤੇ ਸੇਫਟੀ ਥੈਰੇਪਿਸਟ ਆਦਿ।