ਬਰਲਿੰਗਟਨ, 26 ਜਨਵਰੀ (ਪੋਸਟ ਬਿਊਰੋ) : ਬਰਲਿੰਗਟਨ ਵਿੱਚ ਕਿਊਈਡਬਲਿਊ ਉੱਤੇ ਕਈ ਗੱਡੀਆਂ ਦਰਮਿਆਨ ਹੋਈ ਟੱਕਰ ਵਿੱਚ ਦੋ ਲੜਕੀਆਂ ਦੀ ਮੌਤ ਹੋ ਗਈ।
ਪੁਲਿਸ ਨੇ ਦੱਸਿਆ ਕਿ ਸਵੇਰੇ 6:00 ਵਜੇ ਤੋਂ ਠੀਕ ਪਹਿਲਾਂ ਬਰਲਿੰਗਟਨ ਓਪੀਪੀ ਦੀ ਇੱਕ ਟੀਮ ਮੌਕੇ ਉੱਤੇ ਪਹੁੰਚੀ ਤੇ ਉਨ੍ਹਾਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਬਰੈਂਟ ਸਟਰੀਟ ਉੱਤੇ ਕਿਊਈਡਬਲਿਊ ਉੱਤੇ ਹੋਏ ਹਾਦਸੇ ਵਿੱਚ ਚਾਰ ਗੱਡੀਆਂ ਸ਼ਾਮਲ ਹਨ। ਓਪੀਪੀ ਨੇ ਦੱਸਿਆ ਕਿ ਉਨ੍ਹਾਂ ਮੁਤਾਬਕ ਇਸ ਹਾਦਸੇ ਵਿੱਚ ਮਾਰੀਆਂ ਗਈਆਂ ਲੜਕੀਆਂ ਆਪਣੇ 20ਵਿਆਂ ਵਿੱਚ ਸਨ ਤੇ ਇੱਕੋ ਗੱਡੀ ਵਿੱਚ ਸਨ। ਪੁਲਿਸ ਨੇ ਦੱਸਿਆ ਕਿ ਉਹ ਪੱਛਮ ਵੱਲ ਜਾ ਰਹੀਆਂ ਸਨ ਤੇ ਜਿਵੇਂ ਹੀ ਪੂਰਬ ਵਾਲੀਆਂ ਲੇਨਜ਼ ਵੱਲ ਮੁੜੀਆਂ ਤਾਂ ਉਨ੍ਹਾਂ ਦੀ ਆਹਮੋ ਸਾਹਮਣੀ ਟੱਕਰ ਇੱਕ ਕਾਰ ਤੇ ਪਿੱਕਅੱਪ ਟਰੱਕ ਨਾਲ ਹੋ ਗਈ।
ਦੋਵਾਂ ਲੜਕੀਆਂ ਦੀ ਮੌਕੇ ਉੱਤੇ ਹੀ ਮੌਤ ਹੋ ਗਈ ਤੇ ਟੱਕਰ ਕਾਰਨ ਇੱਕ ਲੜਕੀ ਗੱਡੀ ਵਿੱਚੋਂ ਹੀ ਬਾਹਰ ਜਾ ਡਿੱਗੀ। ਓਪੀਪੀ ਨੇ ਦੱਸਿਆ ਕਿ ਮ੍ਰਿਤਕ ਲੜਕੀਆਂ ਓਵਨ ਸਾਊਂਡ ਤੇ ਕੈਂਬ੍ਰਿਜ ਇਲਾਕੇ ਤੋਂ ਸਨ। ਇੱਕ ਚੌਥੀ ਗੱਡੀ ਵੀ ਇਸ ਹਾਦਸੇ ਵਿੱਚ ਸ਼ਾਮਲ ਸੀ। ਪਰ ਉਹ ਪਲਟ ਕੇ ਖੱਡ ਵਿੱਚ ਜਾ ਡਿੱਗੀ।ਪੁਲਿਸ ਅਧਿਕਾਰੀ ਇਸ ਹਾਦਸੇ ਲਈ ਤੇਜ ਰਫਤਾਰ ਨੂੰ ਕਾਰਨ ਮੰਨਣ ਤੋਂ ਵੀ ਇਨਕਾਰ ਨਹੀਂ ਕਰ ਰਹੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਜਿਸ ਸਮੇਂ ਹਾਦਸਾ ਹੋਇਆ ਉਸ ਸਮੇਂ ਨਾ ਹੀ ਬਹੁਤਾ ਟਰੈਫਿਕ ਸੀ ਤੇ ਨਾ ਹੀ ਮੌਸਮ ਖਰਾਬ ਸੀ। ਇਸ ਹਾਦਸੇ ਵਿੱਚ ਤਿੰਨ ਹੋਰ ਵਿਅਕਤੀ ਜ਼ਖ਼ਮੀ ਹੋਏ ਤੇ ਉਨ੍ਹਾਂ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ।