ਓਟਵਾ, 26 ਜਨਵਰੀ (ਪੋਸਟ ਬਿਊਰੋ) : ਹਾਊਸ ਆਫ ਕਾਮਨਜ਼ ਵੱਲੋਂ ਸਰਬਸੰਮਤੀ ਨਾਲ ਮਤਾ ਪਾਸ ਕਰਕੇ ਫੈਡਰਲ ਸਰਕਾਰ ਤੋਂ ਪ੍ਰਾਊਡ ਬੌਇਜ਼ ਨਾਂ ਦੇ ਸੱਜੇ ਪੱਖੀ ਗਰੁੱਪ ਨੂੰ ਅੱਤਵਾਦੀ ਜਥੇਬੰਦੀ ਐਲਾਨੇ ਜਾਣ ਦੀ ਮੰਗ ਕੀਤੀ ਗਈ ਹੈ।
ਇਹ ਮਤਾ ਆਪਣੇ ਆਪ ਵਿੱਚ ਕਾਫੀ ਨਹੀਂ ਹੈ ਤੇ ਇਸ ਨਾਲ ਰਸਮੀ ਤੌਰ ਉੱਤੇ ਕੋਈ ਤਬਦੀਲੀ ਨਹੀਂ ਹੋ ਸਕੇਗੀ, ਹਾਲਾਂਕਿ ਸੱਜੇ ਪੱਖੀ ਅੱਤਵਾਦ ਖਿਲਾਫ ਇਹ ਕਾਫੀ ਸਖ਼ਤ ਕਦਮ ਹੈ। ਮੂਲ ਰੂਪ ਵਿੱਚ ਕੈਨੇਡਾ ਵਿੱਚ ਕਾਇਮ ਕੀਤੇ ਗਏ ਇਸ ਪ੍ਰਾਊਡ ਬੌਇਜ਼ ਗਰੁੱਪ ਨੇ ਬੜੇ ਹੀ ਨਾਟਕੀ ਢੰਗ ਨਾਲ ਅਮਰੀਕਾ ਵਿੱਚ ਆਪਣੀਆਂ ਜੜ੍ਹਾਂ ਮਜ਼ਬੂਤ ਕੀਤੀਆਂ। ਇਹ ਗਰੁੱਪ ਵਾਸਿ਼ੰਗਟਨ ਵਿੱਚ ਕੈਪੀਟਲ ਹਿੱਲ ਉੱਤੇ ਬੋਲੇ ਗਏ ਧਾਵੇ ਦੌਰਾਨ ਵੀ ਮੌਜੂੂਦ ਸੀ। ਇਸ ਦੇ ਕੁੱਝ ਹਾਈ ਪ੍ਰੋਫਾਈਲ ਮੈਂਬਰਾਂ ਨੂੰ ਵੀ ਉਦੋਂ ਤੋਂ ਗ੍ਰਿਫਤਾਰ ਕੀਤਾ ਜਾ ਚੁੱਕਿਆ ਹੈ।
ਹਾਲਾਂਕਿ ਇਸ ਮਤੇ ਦੇ ਪਾਸ ਹੋਣ ਨਾਲ ਕੋਈ ਤਬਦੀਲੀਆਂ ਨਹੀਂ ਹੋ ਸਕਣਗੀਆਂ ਪਰ ਫੈਡਰਲ ਪਬਲਿਕ ਸੇਫਟੀ ਮੰਤਰੀ ਪਹਿਲਾਂ ਹੀ ਇਹ ਆਖ ਚੁੱਕੇ ਹਨ ਕਿ ਉਹ ਸਬੂਤ ਇੱਕਠੇ ਕਰ ਰਹੇ ਹਨ ਤੇ ਲਾਅ ਐਨਫੋਰਸਮੈਂਟ ਏਜੰਸੀਆਂ ਨਾਲ ਵੀ ਉਨ੍ਹਾਂ ਵੱਲੋਂ ਵਿਚਾਰ ਵਟਾਂਦਰਾ ਕੀਤਾ ਜਾ ਰਿਹਾ ਹੈ ਤਾਂ ਕਿ ਇਸ ਤਰ੍ਹਾਂ ਦਾ ਰਸਮੀ ਐਲਾਨ ਕੀਤਾ ਜਾ ਸਕੇ।ਮਾਹਿਰਾਂ ਅਨੁਸਾਰ ਦੋ ਕੈਨੇਡੀਅਨ ਪ੍ਰਾਊਡ ਬੌਇਜ਼ ਧੜ੍ਹਿਆਂ ਦੇ ਆਨਲਾਈਨ ਪਲੇਟਫਾਰਮਜ਼ ਉੱਤੇ ਕਾਰਵਾਈ ਕੀਤੇ ਜਾਣ ਤੋਂ ਬਾਅਦ ਉਨ੍ਹਾਂ ਨੂੰ ਖਤਮ ਕਰ ਦਿੱਤਾ ਗਿਆ ਹੈ।