ਅੰਮ੍ਰਿਤਸਰ, 25 ਜਨਵਰੀ (ਪੋਸਟ ਬਿਊਰੋ)- ਪੁਤਲੀਘਰ ਦੇ ਗੁਰੂ ਅਰਜਨ ਦੇਵ ਨਗਰ `ਚ ਇੱਕ ਪਰਵਾਰ ਨੂੰ ਬੰਦੀ ਬਣਾ ਕੇ ਉਨ੍ਹਾਂ ਤੋਂ ਹੋਈ ਲੱਖਾਂ ਦੀ ਲੁੱਟ ਦੀ ਗੁੱਥੀ ਪੁਲਸ ਨੇ ਸੁਲਝਾ ਲਈ ਹੈ ਅਤੇ ਇਸ ਵਿੱਚ ਲੁੱਟ ਖੋਹ ਕਰਨ ਵਾਲਿਆਂ `ਚ ਕੋਈ ਹੋਰ ਨਹੀਂ, ਡਾ. ਸ਼ਿਵਾਂਗੀ ਨੂੰ ਬੰਦੀ ਬਣਾ ਕੇ ਲੁੱਟ ਖੋਹ ਕਰਨ ਵਾਲੇ ਹੀ ਨਿਕਲੇ ਹਨ।
ਏ ਸੀ ਪੀ ਪੱਛਮੀ ਦੇਵ ਦੱਤ ਸ਼ਰਮਾ ਨੇ ਇੱਥੇ ਪ੍ਰੈਸ ਕਾਨਫੰਰਸ `ਚ ਦੱਸਿਆ ਕਿ ਪੁਲਸ ਨੇ ਉਕਤ ਦੋਸ਼ੀ ਨੂੰ ਜੇਲ੍ਹ ਤੋਂ ਪ੍ਰੋਡਕਸ਼ਨ ਵਾਰੰਟ `ਤੇ ਲਿਆ ਕੇ ਗ਼੍ਰਿਫ਼ਤਾਰ ਕੀਤਾ, ਜਿਸ ਦੀ ਪਛਾਣ ਸ਼ੰਮੀ ਉਰਫ਼ ਅਮਨ ਉਰਫ਼ ਕਾਲਾ ਵਾਸੀ ਗਲੀ ਤੇਜਾ ਸਿੰਘ ਮੌਜੂਦਾ ਵਾਸੀ ਰਾਮਨਗਰ ਕਲੋਨੀ ਇਸਲਾਮਾਬਾਦ ਵਜੋਂ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਪ੍ਰੋਡਕਸ਼ਨ ਵਾਰੰਟ ਉੱਤੇ ਲਿਆਂਦੇ ਦੋਸ਼ੀ ਨੇ ਮੰਨਿਆਂ ਕਿ 6 ਨਵੰਬਰ ਨੂੰ ਉਸ ਨੇ ਆਪਣੇ ਇੱਕ ਸਾਥੀ ਦਿਲਦਾਰ ਸਿੰਘ ਵਾਸੀ ਕ੍ਰਿਸ਼ਨਾ ਨਗਰ 22 ਨੰਬਰ ਫਾਟਕ, ਵਿਕਰਮਜੀਤ ਸਿੰਘ ਉਰਫ ਟੀ ਟੀ ਵਾਸੀ ਇੰਦਰਾ ਕਲੋਨੀ ਬਟਾਲਾ ਰੋਡ, ਸ਼ੇਰਾ ਵਾਸੀ ਬਾਜ਼ਾਰ ਬੋਰੀਆਂ ਤੇ ਇੱਕ ਹੋਰ ਵਿਅਕਤੀ ਨਾਲ ਰਲ ਕੇ ਇੱਥੇ ਇੱਕ ਪਰਵਾਰ ਨੂੰ ਬੰਦੀ ਬਣਾ ਕੇ 8 ਲੱਖ 50 ਹਜ਼ਾਰ ਨਕਦੀ ਤੇ ਸੋਨੇ ਦੇ ਗਹਿਣੇ ਲੁੱਟੇ ਸਨ। ਦੇਵ ਦੱਤ ਨੇ ਦੱਸਿਆ ਕਿ ਇਨ੍ਹਾਂ `ਚੋਂ ਦਿਲਦਾਰ ਸਿੰਘ ਤੇ ਵਿਕਰਮਜੀਤ ਸਿੰਘ ਦਾ ਨਾਮ ਡਾ. ਸ਼ਿਵਾਂਗੀ ਵਾਲੀ ਵਾਰਦਾਤ `ਚ ਵੀ ਸ਼ਾਮਲ ਹੈ। ਇਲ ਮੌਕੇ ਥਾਣਾ ਛਾਉਣੀ ਦੇ ਮੁਖੀ ਇੰਸ. ਜਸਪਾਲ ਸਿੰਘ ਵੀ ਹਾਜ਼ਰ ਸਨ।