ਲੰਡਨ, 25 ਜਨਵਰੀ (ਪੋਸਟ ਬਿਊਰੋ)- ਬ੍ਰਿਟੇਨ ਦੀ ਸਪੈਸ਼ਲ ਏਅਰ ਸਰਵਿਸ (ਐਸ ਏ ਐਸ) ਦੇ ਜਾਂਬਾਜ਼ ਸਨਾਈਪਰ ਨੇ ਆਪਣੇ ਨਿਸ਼ਾਨੇ ਨਾਲ ਅੱਤਵਾਦੀਆਂ ਵਿੱਚ ਭਾਜੜ ਮਚਾ ਦਿੱਤੀ ਹੈ। ਇਸ ਜਵਾਨ ਨੇ ਸੀਰੀਆ ਵਿੱਚ ਲਗਭਗ 900 ਮੀਟਰ ਦੂਰੀ ਤੋਂ ਸਟੀਕ ਨਿਸ਼ਾਨਾ ਲਾ ਕੇ ਇੱਕੋ ਗੋਲੀ ਨਾਲ ਆਈ ਐਸ ਦੇ ਪੰਜ ਅੱਤਵਾਦੀ ਮਾਰ ਸੁੱਟੇ। ਇਨ੍ਹਾਂ ਵਿੱਚ ਇੱਕ ਅੱਤਵਾਦੀ ਜਥੇਬੰਦੀ ਦਾ ਸੀਨੀਅਰ ਕਮਾਂਡਰ ਦੱਸਿਆ ਜਾ ਰਿਹਾ ਹੈ।
ਇੱਕ ਰਿਪੋਰਟ ਅਨੁਸਾਰ ਸਪੈਸ਼ਲ ਏਅਰ ਸਰਵਿਸ (ਐਸ ਏ ਐਸ) ਦੇ ਇਸ ਸਾਰਜੈਂਟ ਨੇ ਸੀਰੀਆ ਵਿੱਚ ਤੈਨਾਤੀ ਵੇਲੇ ਇਹ ਕਾਰਨਾਮਾ ਕੀਤਾ। ਇਸ ਸਨਾਈਪਰ ਨੇ ਸੀਰੀਆ ਵਿੱਚ ਜੇਹਾਦੀ ਆਤਮਘਾਤੀ ਕਾਤਲ ਦੀ ਧਮਾਕਾ ਖੇਜ ਬਾਰੂਦ ਨਾਲ ਭਰੀ ਜੈਕੇਟ `ਤੇ ਲਗਭਗ 900 ਮੀਟਰ ਦੂਰੀ ਤੋਂ ਨਿਸ਼ਾਨਾ ਲਾਇਆ। ਓਦੋਂ ਉਹ ਜੇਹਾਦੀ ਇੱਕ ਕੈਮਰੇ `ਤੇ ਧਮਾਕੇ ਦੇ ਪਹਿਲੇ ਸੰਦੇਸ਼ ਨੂੰ ਰਿਕਾਰਡ ਕਰ ਰਿਹਾ ਸੀ। ਗੋਲੀ ਲੱਗਣ ਨਾਲ ਉਸ ਦੀ ਜੈਕੇਟ ਵਿੱਚ ਧਮਾਕਾ ਹੋ ਗਿਆ, ਜਿਸ ਕਾਰਨ ਉਥੇ ਮੌਜੂਦ ਚਾਰ ਹੋਰ ਅੱਤਵਾਦੀ ਵੀ ਮਾਰੇ ਗਏ। ਪਤਾ ਲੱਗਾ ਹੈ ਕਿ ਬ੍ਰਿਟਿਸ਼ ਐਸ ਏ ਐਸ ਕਮਾਂਡੋ ਕਈ ਦਿਨਾਂ ਤੋਂ ਆਈ ਐਸ ਦੀ ਇਸ ਸੀਕ੍ਰੇਟ ਬੰਬ ਫੈਕਟਰੀ `ਤੇ ਨਜ਼ਰ ਰੱਖ ਰਹੇ ਸਨ। ਨਵੰਬਰ ਵਿੱਚ ਉਨ੍ਹਾਂ ਨੂੰ ਇਸ ਫੈਕਟਰੀ ਵਿੱਚ ਜ਼ਿਆਦਾ ਹੀ ਸ਼ੱਕੀ ਗਤੀਵਿਧੀਆਂ ਦਿੱਸਣ ਲੱਗੀਆਂ ਸਨ ਜਿਸ ਦੇ ਬਾਅਦ ਐਕਸ਼ਨ ਦਾ ਫੈਸਲਾ ਕੀਤਾ ਗਿਆ। ਕਮਾਂਡੋ ਦੀ ਟੀਮ ਨੇ ਇਸ ਫੈਕਟਰੀ ਤੋਂ ਪੰਜ ਅੱਤਵਾਦੀਆਂ ਨੂੰ ਬਾਹਰ ਆਉਂਦੇ ਦੇਖਿਆ। ਉਨ੍ਹਾਂ ਵਿੱਚੋਂ ਇੱਕ ਆਤਮਘਾਤੀ ਕਾਤਲ ਨੂੰ ਫਿਲਮਾ ਰਿਹਾ ਸੀ, ਜੋ ਮੁਸਕੁਰਾਉਂਦੇ ਹੋਏ ਕੈਮਰੇ `ਤੇ ਗੱਲਾਂ ਕਰ ਰਿਹਾ ਸੀ।ਐਸ ਏ ਐਸ ਦੇ ਕਮਾਂਡੋ ਨੇ ਇਸ ਦੀ ਸੂਚਨਾ ਆਪਣੇ ਬੇਸ ਨੂੰ ਦਿੱਤੀ ਕਿ ਉਸ ਦੇ ਨਿਸ਼ਾਨੇ `ਤੇ ਇੱਕ ਆਤਮਘਾਤੀ ਹਮਲਾਵਰ ਹੈ। ਪਹਿਲਾਂ ਇਹ ਯੋਜਨਾ ਬਣਾਈ ਗਈ ਕਿ ਇੱਕ ਗੋਲੀ ਨਾਲ ਕੇਵਲ ਉਹੋ ਹਮਲਾਵਰ ਮਾਰ ਦਿੱਤਾ ਜਾਏ, ਜਿਸ ਤੋਂ ਉਸ ਦੀ ਪਛਾਣ ਹੋ ਸਕੇ, ਪਰ ਟੀਚੇ ਦੀ ਦੂਰੀ ਜ਼ਿਆਦਾ ਹੋਣ ਦੇ ਕਾਰਨ ਅਤੇ ਹਵਾ ਵਿੱਚ ਅਚਾਨਕ ਹੋਏ ਬਦਲਾਅ ਨਾਲ ਗੋਲੀ ਉਸ ਆਤਮਘਾਤੀ ਹਮਲਾਵਰ ਦੀ ਧਮਾਕਿਆਂ ਨਾਲ ਭਰੀ ਜੈਕੇਟ `ਤੇ ਜਾ ਲੱਗੀ, ਜਿਸ ਦੇ ਕਾਰਨ ਹੋਏ ਧਮਾਕੇ ਵਿੱਚ ਸਾਰੇ ਪੰਜ ਅੱਤਵਾਦੀ ਮਾਰੇ ਗਏ।