ਓਨਟਾਰੀਓ, 21 ਜਨਵਰੀ (ਪੋਸਟ ਬਿਊਰੋ) : ਬੈਰੀ ਦੇ ਲਾਂਗ ਟਰਮ ਕੇਅਰ ਹੋਮ ਵਿੱਚ ਕੋਵਿਡ-19 ਵੇਰੀਐਂਟ ਪਾਇਆ ਗਿਆ ਹੈ।
ਇਹ ਸਟਰੇਨ ਛੇ ਟੈਸਟ ਵਿੱਚ ਪਾਇਆ ਗਿਆ ਤੇ ਰੌਬਰਟਾ ਪਲੇਸ ਲੌਂਗ ਟਰਮ ਕੇਅਰ ਵਿੱਚ ਆਊਟਬ੍ਰੇਕ ਐਲਾਨ ਦਿੱਤੀ ਗਈ। ਅਜੇ ਵੀ ਸਟਰੇਨ ਦਾ ਸਹੀ ਪਤਾ ਲਾਉਣ ਲਈ ਦੂਜਾ ਟੈਸਟ ਕੀਤੇ ਜਾਣ ਦੀ ਲੋੜ ਹੈ ਪਰ ਸਿਮਕੋਅ ਮਸਕੋਕਾ ਡਿਸਟ੍ਰਿਕਟ ਹੈਲਥ ਯੂਨਿਟ ਦਾ ਕਹਿਣਾ ਹੈ ਕਿ ਮੁੱਢਲੇ ਟੈਸਟਾਂ ਤੋਂ ਪਤਾ ਲੱਗਿਆ ਹੈ ਕਿ ਇਹ ਸਟਰੇਨ ਚਿੰਤਾ ਵਾਲੀ ਗੱਲ ਹੈ।
ਇਸ ਸਬੰਧੀ ਸੈਕਿੰਡ ਟੈਸਟ ਦੇ ਨਤੀਜੇ ਅਗਲੇ ਤਿੰਨ ਜਾਂ ਚਾਰ ਦਿਨਾਂ ਵਿੱਚ ਆਉਣ ਦੀ ਉਮੀਦ ਹੈ। ਸਿਮਕੋਅ ਮਸਕੋਕਾ ਡਿਸਟ੍ਰਿਕਟ ਹੈਲਥ ਯੂਨਿਟ ਦੇ ਮੈਡੀਕਲ ਆਫੀਸਰ ਆਫ ਹੈਲਥ ਡਾ· ਚਾਰਲਸ ਗਾਰਡਨਰ ਨੇ ਆਖਿਆ ਕਿ ਇਸ ਆਊਟਬ੍ਰੇਕ ਦਾ ਅਸਰ ਕਾਫੀ ਤ੍ਰਾਸਦਿਕ ਹੈ ਤੇ ਇਸ ਵੇਰੀਐਂਟ ਦੇ ਨਤੀਜੇ ਸਾਰਿਆਂ ਲਈ ਹੀ ਚਿੰਤਾ ਦਾ ਕਾਰਨ ਹਨ। ਸੱਭ ਤੋਂ ਪਹਿਲਾਂ 8 ਜਨਵਰੀ ਨੂੰ ਰੌਬਰਟਾ ਪਲੇਸ ਵਿੱਚ ਆਊਟਬ੍ਰੇਕ ਐਲਾਨੀ ਗਈ ਫਿਰ 16 ਜਨਵਰੀ ਨੂੰ ਗਾਰਡਨਰ ਨੇ ਹਾਲਾਤ ਉੱਤੇ ਕਾਬੂ ਪਾਉਣ ਲਈ ਫੈਸਿਲਿਟੀ ਦੀ ਲੀਡਰਸਿ਼ਪ ਓਰਿਲਾ ਸੋਲਜਰਜ਼ ਮੈਮੋਰੀਅਲ ਹੌਸਪਿਟਲ (ਓਐਸਐਮਐਚ) ਨੂੰ ਸੌਂਪ ਦਿੱਤੀ।
ਓਐਸਐਮਐਚ ਦੇ ਪ੍ਰੈਜ਼ੀਡੈਂਟ ਤੇ ਸੀਈਓ ਕੈਰਮਾਈਨ ਸਟੰਪੋ ਨੇ ਆਖਿਆ ਕਿ ਅੱਜ ਵਾਲੀ ਖਬਰ ਤੋਂ ਅਸੀਂ ਕਾਫੀ ਉਦਾਸ ਤੇ ਪਰੇਸ਼ਾਨ ਹਾਂ ਤੇ ਉਨ੍ਹਾਂ ਸਾਰੇ ਪੀੜਤਾਂ ਨੂੰ ਦਿਲਾਸਾ ਵੀ ਦਿੱਤਾ। ਇੱਕ ਮੋਬਾਈਲ ਵੈਕਸੀਨੇਸ਼ਨ ਕਲੀਨਿਕ ਨੂੰ ਵੀਕੈਂਡ ਉੱਤੇ ਹੋਮ ਸੱਦ ਕੇ 71 ਰੈਜ਼ੀਡੈਂਟਸ ਨੂੰ ਕੋਵਿਡ-19 ਵੈਕਸੀਨ ਦੀ ਪਹਿਲੀ ਡੋਜ਼ ਦਿੱਤੀ ਜਾ ਚੁੱਕੀ ਹੈ।ਇਸ ਸਮੇਂ ਚੱਲ ਰਹੀ ਆਊਟਬ੍ਰੇਕ ਨੂੰ ਰੋਕਣ ਲਈ ਕੈਨੇਡੀਅਨ ਰੈੱਡ ਕਰੌਸ ਨੂੰ ਹੋਮ ਵਿੱਚ ਤਾਇਨਾਤ ਕੀਤਾ ਗਿਆ ਹੈ।
ਇਸ ਫੈਸਿਲਿਟੀ ਵਿੱਚ 122 ਰੈਜ਼ੀਡੈਂਟਸ ਹਨ ਤੇ ਐਤਵਾਰ ਤੱਕ 62 ਰੈਜ਼ੀਡੈਂਟਸ ਤੇ 43 ਸਟਾਫ ਮੈਂਬਰ ਕੋਵਿਡ-19 ਪਾਜ਼ੀਟਿਵ ਪਾਏ ਜਾ ਚੁੱਕੇ ਹਨ। ਵਾਇਰਸ ਕਾਰਨ ਹੋਮ ਦੇ ਨੌਂ ਰੈਜ਼ੀਡੈਂਟਸ ਦੀ ਮੌਤ ਵੀ ਹੋ ਚੁੱਕੀ ਹੈ।