ਜਲੰਧਰ, 20 ਜਨਵਰੀ (ਪੋਸਟ ਬਿਊਰੋ)- ਵਧੀਕ ਸੈਸ਼ਨ ਜੱਜ ਪ੍ਰੀਤੀ ਸਾਹਨੀ ਦੀ ਅਦਾਲਤ ਵਿੱਚ ਲੁਧਿਆਣੇ ਤੋਂ ਵਕੀਲ ਜਤਿੰਦਰ ਅਰੋੜਾ ਨੇ ਬਿਗ ਬੌਸ ਕਨਟੈਸਟੈਂਟ ਸਾਰਾ ਗੁਰਪਾਲ ਉਰਫ ਰਚਨਾ ਦੇਵੀ ਦੇ ਕੇਸ ਵਿੱਚ ਅਰਜ਼ੀ ਦਾਇਰ ਕੀਤੀ ਹੈ। ਕੱਲ੍ਹ ਸਾਰਾ ਗੁਰਪਾਲ ਦੇ ਖਿਲਾਫ ਐਕਸ ਪਾਰਟੀ ਐਲਾਨ ਕੀਤਾ ਜਾਣਾ ਸੀ, ਪਰ ਵਕੀਲ ਵੱਲੋਂ ਅਰਜ਼ੀ ਪੇਸ਼ ਕਰਨ ਦੇ ਬਾਅਦ ਕੇਸ ਦੀ ਸੁਣਵਾਈ ਇੱਕ ਵਾਰ ਫਿਰ ਟਾਲ ਦਿੱਤੀ ਗਈ ਹੈ।
ਵਰਨਣ ਯੋਗ ਹੈ ਕਿ ਸਾਰਾ ਗੁਰਪਾਲ ਉਰਫ ਰਚਨਾ ਦੇਵੀ ਦੇ ਵਿਰੁੱਧ ਅਮਰੀਕਾ ਵਾਸੀ ਤੁਸ਼ਾਰ ਨੇ ਅਦਾਲਤ ਵਿੱਚ ਅਰਜ਼ੀ ਦਾਖਲ ਕਰ ਕੇ ਕਿਹਾ ਸੀ ਕਿ ਅਗਸਤ 2014 ਵਿੱਚ ਉਨ੍ਹਾਂ ਦਾ ਵਿਆਹ ਰਚਨਾ ਦੇਵੀ ਉਰਫ ਸਾਰਾ ਨਾਲ ਜਲੰਧਰ ਵਿੱਚ ਹੋਇਆ ਸੀ। ਵਿਆਹ ਦੇ ਦੋਦਿਨ ਬਾਅਦ ਉਸ ਨੂੰ ਅਚਾਨਕ ਕਿਸੇ ਕਾਰਨ ਵਾਪਸ ਅਮਰੀਕਾ ਜਾਣਾ ਪਿਆ ਤੇ ਇਸ ਦੇ ਕੁਝ ਸਮੇਂ ਬਾਅਦ ਸਾਰਾ ਵੀ ਅਮਰੀਕਾ ਪਹੁੰਚ ਗਈ ਅਤੇ ਉਸ ਨੇ ਉਥੇ ਜਾ ਕੇ ਉਸ ਨੂੰ ਤੰਗ ਕਰਨਾ ਸ਼ੁਰੂ ਕਰ ਦਿੱਤਾ ਅਤੇ ਪਰਵਾਰ ਨਾਲ ਝਗੜਾ ਕਰਨ ਲੱਗੀ। ਇਸ ਕਾਰਨ ਮਜਬੂਰਨ ਉਸ ਨੂੰ ਮੋਟਲ ਕਿਰਾਏ ਉੱਤੇ ਲੈ ਕੇ ਰਹਿਣਾ ਪਿਆ। ਨਵੰਬਰ 2016 ਵਿੱਚ ਸਾਰਾ ਵਾਪਸ ਭਾਰਤ ਆ ਗਈ ਅਤੇ ਉਸ ਨੇ ਸ਼ਰਤ ਰੱਖੀ ਕਿ ਉਸ ਨੂੰ ਵੱਖਰੀ ਕੋਠੀ ਲੈ ਕੇ ਦੇਓ।ਤੁਸ਼ਾਰ ਨੇ ਫੈਮਿਲੀ ਕੋਰਟ ਵਿੱਚ ਇਸ ਦੀ ਅਰਜ਼ੀ ਪੇਸ਼ ਕੀਤੀ ਹੈ। ਇਸ ਕੇਸ ਵਿੱਚ ਸਾਰਾ ਦੇ ਵਕੀਲ ਨੇ ਮੀਡੀਆ ਨੂੰਕੁਝ ਵੀ ਕਹਿਣ ਤੋਂ ਇਨਕਾਰ ਕਰ ਦਿੱਤਾ ਅਤੇ ਸਿਰਫ ਏਨਾ ਕਿਹਾ ਕਿ ਕੇਸ ਅਦਾਲਤ ਵਿੱਚ ਵਿਚਾਰ ਅਧੀਨ ਹੈ।
ਇਸ ਤੋਂ ਪਹਿਲਾਂ ਵਾਰ-ਵਾਰ ਸੰਮਨ ਭੇਜਣ ਦੇ ਬਾਅਦ ਵੀ ਸਾਰਾ ਨੇ ਅਦਾਲਤ ਵਿੱਚ ਪੱਖ ਪੇਸ਼ ਨਹੀਂ ਕੀਤਾ ਸੀ ਅਤੇ ਨਾ ਕੋਈ ਵਕੀਲ ਪੇਸ਼ ਕੀਤਾ ਸੀ। ਇਸ ਹਾਲਤ ਵਿੱਚ ਕੱਲ੍ਹ ਸੁਣਵਾਈ ਦੌਰਾਨ ਸਾਰਾ ਵਿਰੁੱਧ ਐਕਸ ਪਾਰਟੀ ਐਲਾਨ ਕਰ ਕੇ ਅਦਾਲਤ ਵੱਲੋਂ ਫੈਸਲਾ ਦੇਣ ਜਾਣਾ ਸੀ, ਪਰ ਸਾਰਾ ਵੱਲੋਂ ਵਕੀਲ ਨੇ ਪੇਸ਼ ਹੋ ਕੇ ਆਪਣਾ ਪੱਖ ਰੱਖਿਆ, ਜਿਸ ਦੇ ਕਾਰਨ ਮਾਮਲਾ ਇੱਕ ਵਾਰ ਫਿਰ ਅਗਲੀ ਸੁਣਵਾਈ ਤੱਕ ਟਲ ਗਿਆ ਹੈ।