ਨਵੀਂ ਦਿੱਲੀ, 20 ਜਨਵਰੀ (ਪੋਸਟ ਬਿਊਰੋ)- ਭਾਰਤ ਸਰਕਾਰ ਨੂੰ ਵਟਸਐਪ ਦੀ ਨਵੀਂ ਤਜਵੀਜ਼ ਪ੍ਰਾਈਵੇਸੀ ਪਾਲਿਸੀ ਮਨਜ਼ੂਰ ਨਹੀਂ। ਵਟਸਐਪ ਦੀ ਇਸ ਪਾਲਿਸੀ ਨਾਲ ਭਾਰਤੀ ਯੂਜ਼ਰਜ਼ ਦੀ ਨਿੱਜਤਾ ਦੀ ਉਲੰਘਣਾ ਅਤੇ ਸੁਰੱਖਿਆ ਦੇ ਸ਼ੱਕ ਦੇ ਕਾਰਨਨਜ਼ਰ ਸਰਕਾਰ ਨੇ ਕੰਪਨੀ ਨੂੰ ਆਪਣੀ ਪਾਲਿਸੀ ਵਾਪਸ ਲੈਣ ਨੂੰ ਕਿਹਾ ਹੈ। ਪ੍ਰਾਈਵੇਸੀ ਪਾਲਿਸੀ ਦੇ ਕੇਸ ਵਿੱਚ ਭਾਰਤੀ ਯੂਜ਼ਰਜ਼ ਨਾਲ ਵਿਤਕਰਾ ਕਰਨ `ਤੇ ਵੀ ਸਰਕਾਰ ਨੇ ਸਖਤ ਇਤਰਾਜ਼ ਪ੍ਰਗਟਾਇਆ ਹੈ।
ਇਲੈਕਟ੍ਰਾਨਿਕਸ ਐਂਡ ਆਈ ਟੀ ਮੰਤਰਾਲੇ ਨੇ ਵਟਸਐਪ ਤੋਂ 14 ਸਵਾਲਾਂ ਦੇ ਜਵਾਬ ਮੰਗੇ ਹਨ। ਅਗਲੀ ਅੱਠ ਫਰਵਰੀ ਤੋਂ ਵਟਸਐਪ ਨੇ ਭਾਰਤ ਵਿੱਚ ਆਪਣੀ ਪ੍ਰਾਈਵੇਸੀ ਪਾਲਿਸੀ ਨੂੰ ਲਾਗੂ ਕਰਨ ਦਾ ਐਲਾਨ ਕੀਤਾ ਸੀ, ਪਰ ਇਸ ਮਾਮਲੇ ਵਿੱਚ ਡਾਟਾ ਸੁਰੱਖਿਆ ਦੀ ਉਲੰਘਣਾ ਦੇ ਸ਼ੱਕ ਅਤੇ ਉਸ ਦੇ ਵਿਰੋਧ ਨੂੰ ਦੇਖਦੇ ਹੋਏ ਕੰਪਨੀ ਨੇ ਅਗਲੀ 15 ਮਈ ਤੱਕ ਪਾਲਿਸੀ ਨੂੰ ਲਾਗੂ ਕਰਨ ਤੋਂ ਟਾਲ ਦਿੱਤਾ ਹੈ। ਇਲੈਕਟ੍ਰਾਨਿਕਸ ਅਤੇ ਆਈ ਟੀ ਮੰਤਰੀ ਰਵੀਸ਼ੰਕਰ ਪ੍ਰਸਾਦ ਨੇ ਟਵੀਟ ਕਰ ਕੇ ਕਿਹਾ ਕਿ ਵਟਸਐਪ ਹੋਵੇ ਜਾਂ ਫੇਸਬੁੱਕ ਜਾਂ ਫਿਰ ਕੋਈ ਹੋਰ ਸੋਸ਼ਲ ਮੀਡੀਆ ਉਹ ਭਾਰਤ ਵਿੱਚ ਬਿਜ਼ਨਸ ਕਰ ਸਕਦੇ ਹਨ, ਪਰ ਭਾਰਤੀਆਂ ਦੇ ਅਧਿਕਾਰਾਂ ਦੀ ਉਲੰਘਣਾ ਨਹੀਂ ਹੋਣੀ ਚਾਹੀਦੀ।