ਲਾਹੌਰ, 3 ਦਸੰਬਰ (ਪੋਸਟ ਬਿਊਰੋ)- ਪਾਕਿਸਤਾਨ ਸਰਕਾਰ ਦੇ ਗਰੀਬੀ ਹਟਾਓ ਪ੍ਰੋਗਰਾਮ ਹੇਠ ਪੇਂਡੂ ਔਰਤਾਂ ਨੂੰ ਆਂਡੇ ਅਤੇ ਚੂਚੇ ਵੰਡਣ ਦੀ ਤਜਵੀਜ਼ 'ਤੇ ਹੰਗਾਮਾ ਕਰਨ ਵਾਲੇ ਆਪਣੇ ਵਿਰੋਧੀਆਂ ਨੂੰ ਜਵਾਬ ਦਿੰਦੇ ਹੋਏ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੇ ਕਿਹਾ ਕਿ ਬਸਤੀਵਾਦੀ ਸੋਚ ਰੱਖਣ ਵਾਲੇ ਇਸ ਗੱਲ 'ਤੇ ਉਨ੍ਹਾਂ ਦੀ ਆਲੋਚਨਾ ਕਰ ਰਹੇ ਹਨ, ਪਰ ਜੇ ਇਹੀ ਕੰਮ ਕਿਸੇ ਵਿਲਾਇਤੀ ਨੇ ਕੀਤਾ ਹੁੰਦਾ ਤਾਂ ਉਹ ਉਸ ਦੀਆਂ ਤਾਰੀਫਾਂ ਦੇ ਪੁਲ ਬੰਨ੍ਹਦੇ।
ਆਪਣੀ ਸਰਕਾਰ ਦੇ 100 ਦਿਨ ਮੁਕੰਮਲ ਹੋਣ 'ਤੇ ਆਪਣੇ ਦਫਤਰ 'ਚ ਰੱਖੇ ਗਏ ਸਮਾਗਮ 'ਚ ਇਮਰਾਨ ਖਾਨ ਨੇ ਕਿਹਾ ਕਿ ਸਰਕਾਰ ਗਰੀਬ ਵਰਗ ਨਾਲ ਸਬੰਧਤ ਔਰਤਾਂ ਨੂੰ ਕਾਰੋਬਾਰ ਸ਼ੁਰੂ ਕਰਨ ਲਈ ਆਂਡੇ ਤੇ ਚੂਚੇ ਅਤੇ ਚੂਚਿਆਂ ਦੇ ਛੇਤੀ ਵਾਧੇ ਲਈ ਟੀਕੇ (ਵੈਕਸੀਨ) ਦੇਵੇਗੀ। ਉਨ੍ਹਾਂ ਕਿਹਾ, ‘ਇਸ ਢੰਗ ਨਾਲ ਉਨ੍ਹਾਂ ਕੋਲ ਖਾਣ ਲਈ ਸਿਹਤਮੰਦ ਖਾਣਾ ਵੀ ਹੋਵੇਗਾ ਤੇ ਨਾਲ ਵੇਚਣ ਲਈ ਵਾਧੂ ਮੁਰਗੇ ਮੁਰਗੀਆਂ ਤੇ ਆਂਡੇ ਵੀ ਹੋਣਗੇ।' ਸਰਕਾਰ ਦੀ ਇਸ ਤਵੀਜ਼ ਦਾ ਵਿਰੋਧੀ ਧਿਰਾਂ ਨੇ ‘ਸੀਰੀਅਸ ਕਾਮੇਡੀ' ਕਹਿ ਕੇ ਮਜ਼ਾਕ ਉਡਾਇਆ ਸੀ। ਵਿਰੋਧੀਆਂ ਦੀ ਆਲੋਚਨਾ ਦਾ ਜਵਾਬ ਦਿੰਦਿਆਂ ਕੱਲ੍ਹ ਇਮਰਾਨ ਖਾਨ ਨੇ ਟਵੀਟ ਕੀਤਾ, ‘ਜਦੋਂ ਕੋਈ ਦੇਸੀ (ਇਮਰਾਨ ਖਾਨ) ਬੰਦਾ ਮੁਰਗਿਆਂ ਰਾਹੀਂ ਗਰੀਬੀ ਦੂਰ ਕਰਨ ਦੀ ਗੱਲ ਕਰਦਾ ਹੈ ਕਿ ਬਸਤੀਵਾਦੀ ਸੋਚ ਰੱਖਦੇ ਲੋਕ ਉਸ ਦਾ ਮਜ਼ਾਕ ਉਡਾਉਂਦੇ ਹਨ, ਪਰ ਜਦੋਂ ਕੋਈ ਵਿਲਾਇਤੀ (ਬਿੱਲ ਗੇਟਸ ਵਰਗੇ) ਮੁਰਗਿਆਂ ਤੇ ਗਰੀਬੀ ਬਾਰੇ ਬੋਲਣ ਤਾਂ ਉਨ੍ਹਾਂ ਨੂੰ ਇਸ 'ਚ ਮਹਾਨਤਾ ਦਿੱਸਦੀ ਹੈ।' ਉਨ੍ਹਾਂ ਨਾਲ ਹੀ ਬਿੱਲ ਗੇਟਸ ਦੇ ਲੇਖ ਦਾ ਹਵਾਲਾ ਦਿੱਤਾ, ਜਿਸ 'ਚ ਉਸ ਨੇ ਕਿਹਾ ਸੀ ਕਿ ਪੋਲਟਰੀ ਲੋਕਾਂ ਨੂੰ ਗਰੀਬੀ 'ਚੋਂ ਕੱਢਣ ਦਾ ਰਾਹ ਹੈ।