ਜਲੰਧਰ, 15 ਜਨਵਰੀ (ਪੋਸਟ ਬਿਊਰੋ)- ਜਲੰਧਰ ਦੇ ਇੱਕ ਜਾਅਲੀ ਟਰੈਵਲ ਏਜੰਟ ਵੱਲੋਂ ਅੰਮ੍ਰਿਤਸਰ ਦੇ ਨੌਜਵਾਨ ਨਾਲ ਵਿਦੇਸ਼ ਭੇਜਣ ਦੇ ਨਾਂ `ਤੇ ਠੱਗੀ ਮਾਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ।
ਐਸ ਐਚ ਓ ਗਗਨਦੀਪ ਸਿੰਘ ਸੇਖੋਂ ਨੇ ਦੱਸਿਆ ਕਿ ਸੁਮਿਤ ਸਿੰਘ ਨੇ ਪੁਲਸ ਨੇ ਸ਼ਿਕਾਇਤ ਦਰਜ ਦਿੱਤੀ ਸੀ ਕਿ ਉਸਦੇ ਇੱਕ ਦੋਸਤ ਨੇ ਉਸ ਨੂੰ ਜਲੰਧਰ ਦੇ ਬਸਤੀ ਪੀਰਦਾਦ ਦੇ ਵਸਨੀਕ ਮਨਦੀਪ ਸਿੰਘ ਨਾਲ ਮਿਲਾਇਆ ਸੀ।ਉਹ ਕੈਨੇਡਾ ਜਾਣਾ ਚਾਹੁੰਦਾ ਸੀ ਤਾਂ ਏਜੰਟ ਨੇ ਉਸ ਨੂੰ ਕਿਹਾ ਕਿ ਟੂਰਿਸਟ ਵੀਜ਼ੇ `ਤੇ ਜਾਣ ਲਈ ਸੱਤ ਲੱਖ ਰੁਪਏ ਦਾ ਖਰਚਾ ਆਵੇਗਾ। ਉਸ ਨੇ ਕਿਹਾ ਕਿ 15 ਦਿਨਾਂ ਬਾਅਦ ਕੈਨੇਡਾ ਪਹੁੰਚ ਕੇ ਉਹ ਉਸ ਦੇ ਵੀਜ਼ੇ ਨੂੰ ਵਰਕ ਪਰਮਿਟ ਵਿੱਚ ਬਦਲਵਾ ਦੇਵੇਗਾ, ਜਿਸ ਤੋਂ ਬਾਅਦ ਉਸ ਨੇ 2.16 ਲੱਖ ਰੁਪਏ ਉਸਦੇ ਅਕਾਊਂਟ ਵਿੱਚ ਪੁਆ ਦਿੱਤੇ ਅਤੇ ਬਾਕੀ ਦੇ ਪੈਸੇ ਏਜੰਟ ਨੂੰ ਨਕਦ ਦੇ ਦਿੱਤੇ।ਪੀੜਤ ਨੇ ਦਾਅਵਾ ਕੀਤਾ ਕਿ ਨਕਦ ਪੈਸੇ ਦੇਣ ਸਮੇਂ ਉਸਨੇ ਵੀਡੀਓ ਬਣਾਈ ਅਤੇ ਫੋਟੋਆਂ ਖਿੱਚੀਆਂ ਸਨ। ਪੈਸੇ ਦੇਣ ਪਿੱਛੋਂ ਏਜੰਟ ਨੇ ਕਿਹਾ ਕਿ ਵਰਕ ਪਰਮਿਟ ਵਿੱਚ ਵੀਜ਼ਾ ਬਦਲਾਉਣ ਲਈ 10 ਲੱਖ ਰੁਪਏ ਹੋਰ ਦੇਣੇ ਹਨ, ਜਿਸ ਦੇ ਬਾਅਦ ਉਹ ਉਸ ਨੂੰ ਟਾਲਦਾ ਰਿਹਾ ਅਤੇ ਕਰੀਬ ਇੱਕ ਸਾਲ ਤੱਕ ਪੈਸੇ ਵਾਪਸ ਨਹੀਂ ਕੀਤੇ।ਸੁਮਿਤ ਸਿੰਘ ਨੇ ਦੱਸਿਆ ਕਿ ਪੈਸੇ ਵਾਪਸ ਮੰਗਣ `ਤੇ ਏਜੰਟ ਨੇ ਧਮਕੀ ਦਿੱਤੀ ਕਿ ਉਹ ਉਸਦਾ ਕੁਝ ਨਹੀਂ ਵਿਗਾੜ ਸਕੇਗਾ ਕਿਉਂਕਿ ਸਾਰੀ ਪੁਲਸ ਉਸ ਦੀ ਜੇਬ ਵਿੱਚ ਹੈ। ਏਜੰਟ `ਤੇ ਦਬਾਅ ਬਣਾਉਣ ਉਤੇ ਉਸਨੇ 2 ਚੈਕ ਦੇ ਦਿੱਤੇ, ਜਿਨ੍ਹਾਂ ਵਿੱਚੋਂ ਇੱਕ ਫੇਲ ਹੋ ਗਿਆ। ਇਸ ਤੋਂ ਬਾਅਦ ਉਹ ਅੰਡਰਗਰਾਊਂਡ ਹੋ ਗਿਆ। ਪੀੜਤ ਦਾ ਦਾਅਵਾ ਹੈ ਕਿ ਪੁਲਸ ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਉਕਤ ਟਰੈਵਲ ਏਜੰਟ ਕੋਲ ਲਾਇਸੈਂਸ ਨਹੀਂ ਹੈ।