ਬਰਨ, 2 ਦਸੰਬਰ, (ਪੋਸਟ ਬਿਊਰੋ)- ਕਾਲੇ ਧਨ ਵਾਲਿਆਂ ਲਈ ਸੁਰੱਖਿਅਤ ਅੱਡਾ ਮੰਨੇ ਜਾਂਦੇ ਸਵਿਟਜ਼ਰਲੈਂਡ ਨੇ ਭਾਰਤ ਦੀਆਂ ਦੋ ਕੰਪਨੀਆਂ ਤੇ ਤਿੰਨ ਵਿਅਕਤੀਆਂ ਦੇ ਵੇਰਵੇ ਦੇਣ ਨੂੰ ਸਹਿਮਤੀ ਦੇ ਦਿੱਤੀ ਹੈ, ਜਿਨ੍ਹਾਂ ਖ਼ਿਲਾਫ਼ ਭਾਰਤ ਵਿਚ ਕਈ ਤਰ੍ਹਾਂ ਦੀ ਜਾਂਚ ਚੱਲ ਰਹੀ ਹੈ। ਇਨ੍ਹਾਂ ਵਿੱਚੋਂ ਇਕ ਕੰਪਨੀ ਜਨਤਕ ਤੌਰ `ਤੇ ਲਿਸਟਿਡ ਹੈ ਅਤੇ ਵੱਖ ਵੱਖ ਉਲੰਘਣਾਵਾਂ ਕਰ ਕੇ ਸ਼ੇਅਰ ਬਾਜ਼ਾਰ ਦੇ ਰੈਗੂਲੇਟਰ ‘ਸਕਿਓਰਟੀਜ਼ ਐਂਡ ਐਕਸਚੇਂਜ ਬੋਰਡ ਆਫ ਇੰਡੀਆ’ (ਸੇਬੀ) ਨੇ ਇਸ ਦੀ ਖਿਚਾਈ ਕੀਤੀ ਹੈ। ਦੂਸਰੀ ਕੰਪਨੀ ਦੇ ਤਾਮਿਲ ਨਾਡੂ ਦੇ ਲੀਡਰਾਂ ਨਾਲ ਸਿਆਸੀ ਸੰਪਰਕ ਦੱਸੇ ਜਾਂਦੇ ਹਨ।
ਇਸ ਸੰਬੰਧ ਵਿੱਚ ਸਵਿਸ ਸਰਕਾਰ ਵਲੋਂ ਜਾਰੀ ਕੀਤੇ ਗਏ ਵੱਖੋ ਵੱਖਰੇ ਗਜ਼ਟ ਨੋਟੀਫਿਕੇਸ਼ਨਾਂ ਵਿਚ ਉਸ ਦੇਸ਼ ਦੇ ਫੈਡਰਲ ਟੈਕਸ ਵਿਭਾਗ ਨੇ ਜੀਓਡੈਸਿਕ ਲਿਮਟਿਡ ਅਤੇ ਆਦੀ ਐਂਟਰਪ੍ਰਾਈਜਿਜ਼ ਪ੍ਰਾਈਵੇਟ ਲਿਮਟਿਡ ਬਾਰੇ ਭਾਰਤ ਵੱਲੋਂ ਕੀਤੀਆਂ ਬੇਨਤੀਆਂਂ ਉੱਤੇ ਪ੍ਰਸ਼ਾਸਕੀ ਮਦਦ ਦੇਣ ਦੀ ਹਾਮੀ ਭਰੀ ਹੈ। ਜੀਓਡੈਸਿਕ ਲਿਮਟਿਡ ਨਾਲ ਜੁੜਦੇ ਤਿੰਨ ਜਣਿਆਂ: ਪੰਕਜ ਕੁਮਾਰ ਓਂਕਾਰ ਸ੍ਰੀਵਾਸਤਵ, ਪ੍ਰਸ਼ਾਂਤ ਸ਼ਰਦ ਮੁਲੇਕਰ ਤੇ ਕਿਰਨ ਕੁਲਕਰਨੀ ਬਾਰੇ ਵੀ ਸੂਚਨਾ ਦੇਣ ਦੀ ਸਹਿਮਤੀ ਪ੍ਰਗਟਾਈ ਗਈ ਹੈ। ਉਂਜ ਸਵਿਸ ਸਰਕਾਰ ਨੇ ਭਾਰਤੀ ਅਧਿਕਾਰੀਆਂ ਵਲੋਂ ਦੋਵੇਂ ਕੰਪਨੀਆਂ ਤੇ ਤਿੰਨ ਵਿਅਕਤੀਆਂ ਬਾਰੇ ਮੰਗੀਆਂ ਸੂਚਨਾਵਾਂ ਦੇ ਵੇਰਵੇ ਜਾਰੀ ਨਹੀਂ ਕੀਤੇ, ਪਰ ਆਮ ਤੌਰ `ਤੇ ਪ੍ਰਸ਼ਾਸਕੀ ਮਦਦ ਹੇਠ ਵਿੱਤੀ ਅਤੇ ਟੈਕਸ ਗੜਬੜ ਨਾਲ ਸਬੰਧਤ ਬੈਂਕ ਖਾਤੇ ਦੇ ਵੇਰਵੇ ਤੇ ਹੋਰ ਵਿੱਤੀ ਅੰਕੜੇ ਮੰਗੇ ਜਾਂਦੇ ਹਨ।
ਭਾਰਤ ਦੀਆਂ ਇਹ ਕੰਪਨੀਆਂ ਤੇ ਵਿਅਕਤੀ ਸਵਿਟਜ਼ਰਲੈਂਡ ਦੇ ਫੈਡਰਲ ਟੈਕਸ ਐਡਮਿਨਿਸਟ੍ਰੇਸ਼ਨ ਐਫ ਟੀ ਏ ਦੇ ਫ਼ੈਸਲੇ ਖਿਲਾਫ਼ ਅਪੀਲ ਕਰ ਸਕਦੇ ਹਨ। ਬੀਤੇ ਸਮੇਂ ਵਿੱਚ ਇਹ ਕੰਪਨੀਆਂ ਹਰ ਕਿਸਮ ਦੀ ਗੜਬੜ ਨੂੰ ਰੱਦ ਕਰਦੀਆਂ ਰਹੀਆਂ ਹਨ। ਸਾਲ 1982 ਵਿਚ ਬਣਾਈ ਗਈ ਜੀਓਡੈਸਿਕ, ਜੋ ਕਦੇ ਤੇਜੀ ਨਾਲ ਵਿਕਾਸ ਕਰਨ ਵਾਲੀ ਅਤੇ ਉਚ ਪਾਏ ਦੀ ਆਈ ਟੀ ਟੈਕਨੀਕ ਦਾ ਬਦਲ ਪੇਸ਼ ਕਰਨ ਵਾਲੀ ਕੰਪਨੀ ਵਜੋਂ ਜਾਣੀ ਜਾਂਦੀ ਸੀ, ਦੀ ਵੈੱਬਸਾਈਟ ਵੀ ਅੱਜ ਕੱਲ੍ਹ ਕੰਮ ਨਹੀਂ ਕਰ ਰਹੀ ਅਤੇ ਰਸਮੀ ਤੌਰ `ਤੇ ਸ਼ੇਅਰ ਬਾਜ਼ਾਰ ਵਿਚ ਇਸ ਦਾ ਬਿਜ਼ਨਿਸ ਸਸਪੈਂਡ ਕੀਤਾ ਗਿਆ ਹੈ। ਇਸ ਕੰਪਨੀ ਤੇ ਇਸ ਦੇ ਡਾਇਰੈਕਟਰਾਂ ਨੂੰ ਸੇਬੀ ਦੀ ਕਾਰਵਾਈ ਤੋਂ ਇਲਾਵਾ ਇਨਫੋਰਸਮੈਂਟ ਡਾਇਰੈਕਟੋਰੇਟ ਤੇ ਮੁੰਬਈ ਪੁਲੀਸ ਦੀ ਆਰਥਿਕ ਜੁਰਮ ਸ਼ਾਖਾ ਦੀ ਜਾਂਚ ਵੀ ਭੁਗਤਣੀ ਪੈ ਰਹੀ ਹੈ। ਸਟਾਕ ਐਕਸਚੇਂਜ ਵਿਚ ਕੰਪਨੀ ਦੇ ਵੇਰਵੇ ਮੁਤਾਬਕ ਪੰਕਜ ਕੁਮਾਰ ਜੀਓਡੈਸਿਕ ਦਾ ਚੇਅਰਮੈਨ, ਕਿਰਨ ਕੁਲਕਰਨੀ ਮੈਨੇਜਿੰਗ ਡਾਇਰੈਕਟਰ ਤੇ ਪ੍ਰਸ਼ਾਂਤ ਮੁਲੇਕਰ ਐਗਜ਼ੈਕਟਿਵ ਡਾਇਰੈਕਟਰ ਹੈ। ਦੂਸਰੀ ਆਦੀ ਐਂਟਰਪ੍ਰਾਈਜ਼ਜ਼ ਪ੍ਰਾਈਵੇਟ ਲਿਮਟਿਡ ਨਵੰਬਰ 2014 ਵਿਚ ਚੇਨਈ ਵਿਚ ਬਣਾਈ ਗਈ ਸੀ ਤੇ ਇਸ ਨੇ ਰੀਅਲ ਅਸਟੇਟ ਅਤੇ ਹੋਰ ਧੰਦਿਆਂ ਵਿਚ ਕਾਫੀ ਚੜ੍ਹਾਈ ਕੀਤੀ ਸੀ ਪਰ ਜਲਦੀ ਹੀ ਇਸ ਦੇ ਕੁਝ ਦਾਗ਼ੀ ਸਿਆਸਤਦਾਨਾਂ ਨਾਲ ਸਬੰਧ ਹੋਣ ਅਤੇ ਮਨੀ ਲਾਂਡਰਿੰਗ ਧੰਦੇ ਨਾਲ ਜੁੜੇ ਹੋਣ ਦੇ ਖੁਲਾਸੇ ਹੋ ਗਏ। ਰਿਪੋਰਟਾਂ ਮੁਤਾਬਕ ਆਮਦਨ ਟੈਕਸ ਵਿਭਾਗ ਨੇ ਕੰਪਨੀ ਦੇ ਪ੍ਰੋਮੋਟਰਾਂ ਦੇ ਟਿਕਾਣਿਆਂਂ ਉੱਤੇ ਛਾਪੇ ਮਾਰੇ ਸਨ।