ਨਵੀਂ ਦਿੱਲੀ, 2 ਦਸੰਬਰ (ਪੋਸਟ ਬਿਊਰੋ)- ਦੋ ਔਰਤਾਂ ਕੰਮ ਦੀ ਭਾਲ ਵਿੱਚ ਆਈਆਂ ਅਤੇ ਘਰ ਦੀ ਮਾਲਕ ਨੂੰ ਕਹਿਣ ਲੱਗੀਆਂ: ਦੀਦੀ ਤੁਸੀਂ ਸਾਡੀ ਸੈਲਰੀ ਬਾਅਦ 'ਚ ਤੈਅ ਕਰ ਲੈਣਾ, ਪਹਿਲਾਂ ਸਾਡੇ ਕੰਮ ਦਾ ਹੁਨਰ ਤਾਂ ਦੇਖ ਲਓ ਕਿ ਅਸੀਂ ਕਿੰਨਾ ਵਧੀਆ ਕੰਮ ਕਰਦੇ ਹਾਂ। ਭਾਂਡਿਆਂ ਨੂੰ ਇੰਝ ਚਮਕਾਵਾਂਗੇ ਕਿ ਤੁਸੀਂ ਆਪਣੀ ਤਸਵੀਰ ਦੇਖ ਸਕੋਗੇ।
ਅਜਿਹੀਆਂ ਮਿੱਠੀਆਂ ਗੱਲਾਂ ਕਰ ਕੇ ਦੋ ਔਰਤਾਂ ਖੁਦ ਨੂੰ ਮੇਡ ਦੱਸਦੇ ਹੋਏ ਸਾਊਥ ਐਕਸਟੈਂਸ਼ਨ ਇਲਾਕੇ ਦੀ ਇੱਕ ਕੋਠੀ ਵਿੱਚ ਦਾਖਲ ਹੋ ਗਈਆਂ। ਇੱਕ ਔਰਤ ਰਸੋਈ ਵਿੱਚ ਭਾਂਡੇ ਸਾਫ ਕਰਨ ਲੱਗ ਗਈ ਅਤੇ ਦੂਜੀ ਨੇ ਸਫਾਈ ਕਰਨੀ ਸ਼ੁਰੂ ਕਰ ਦਿੱਤੀ। ਝਾੜੂ ਲਾਉਂਦੇ ਹੋਏ ਉਹ ਕੁਝ ਹੀ ਮਿੰਟ ਵਿੱਚ ਡਰਾਇੰਗ ਰੂਮ ਅਤੇ ਬੈੱਡਰੂਮ ਤੱਕ ਜਾ ਪਹੁੰਚੀ ਅਤੇ ਉਥੇ ਰੱਖੀ ਜਿਊਲਰੀ ਤੇ ਲਗਭਗ ਚਾਰ ਲੱਖ ਰੁਪਏ ਉੱਤੇ ਹੱਥ ਸਾਫ ਕਰ ਦਿੱਤਾ। ਉਸ ਸਮੇਂ ਘਰ ਵਿੱਚ ਅੱਠ ਜਣੇ ਸਨ, ਪਰ ਦੋਵੇਂ ਔਰਤਾਂ ਨੇ ਬਹੁਤ ਚਲਾਕੀ ਨਾਲ 10 ਮਿੰਟ ਦੇ ਅੰਦਰ ਲੱਖਾਂ ਦੀ ਜਿਊਲਰੀ ਅਤੇ ਕੈਸ਼ ਉਡਾ ਲਿਆ। ਇਸ ਤੋਂ ਬਾਅਦ ਇਹ ਕਹਿ ਕੇ ਘਰੋਂ ਚਲੀਆਂ ਗਈਆਂ ਕਿ ਗੁਆਂਢ ਵਾਲੀ ਆਂਟੀ ਦਾ ਧੰਨਵਾਦ ਕਰ ਕੇ ਆਉਂਦੀਆਂ ਹਾਂ ਕਿ ਸਾਨੂੰ ਕੰਮ ਮਿਲ ਗਿਆ ਹੈ। ਬਾਅਦ ਵਿੱਚ ਘਰ ਵਾਲਿਆਂ ਨੇ ਜਦੋਂ ਅਲਮਾਰੀ ਖੁੱਲ੍ਹੀ ਦੇਖੀ ਤਾਂ ਉਨ੍ਹਾਂ ਨੂੰ ਚੋਰੀ ਦਾ ਪਤਾ ਲੱਗਾ।
ਘਟਨਾ ਸਾਊਥ ਐਕਸਟੈਂਸ਼ਨ ਪਾਰਟ 1 ਦੇ ਸੀ ਬਲਾਕ ਦੀ ਕੋਠੀ ਵਿੱਚ ਮੰਗਲਵਾਰ ਸਵੇਰੇ ਵਾਪਰੀ। ਕੋਠੀ ਵਿੱਚ ਰਹਿਣ ਵਾਲੇ ਅਸ਼ੋਕ ਨੇ ਦੱਸਿਆ ਕਿ ਉਹ ਇੱਕ ਮਹੀਨਾ ਪਹਿਲਾਂ ਸ਼ਿਫਟ ਹੋਏ ਹਨ। ਉਨ੍ਹਾਂ ਨੇ ਮੇਡ ਲਈ ਗੁਆਂਢੀਆਂ ਨੂੰ ਵੀ ਕਿਹਾ ਹੋਇਆ ਸੀ। ਮੰਗਲਵਾਰ ਸਵੇਰੇ ਦੋ ਔਰਤਾਂ ਨੇ ਘਰ ਦੀ ਘੰਟੀ ਵਜਾਈ ਅਤੇ ਕੰਮ ਮੰਗਣ ਲੱਗੀਆਂ ਅਤੇ ਅਸੀਂ ਇਸ ਝਾਂਸੇ ਵਿੱਚ ਆ ਗਏ ਤੇ ਫਿਰ ਸਾਰਾ ਕੁਝ ਲੁੱਟਿਆ ਗਿਆ।