ਉਦੈਪੁਰ, 2 ਦਸੰਬਰ (ਪੋਸਟ ਬਿਊਰੋ)- ਰਾਜਸਥਾਨ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਭਾਜਪਾ ਅਤੇ ਕਾਂਗਰਸ ਵੱਲੋਂ ਇੱਕ ਦੂਜੇ ਵਿਰੁੱਧ ਜ਼ੋਰਦਾਰ ਸਿਆਸੀ ਹਮਲੇ ਹਾਲੇ ਵੀ ਜਾਰੀ ਹਨ। ਇੱਕ ਚੋਣ ਜਲਸੇ ਵਿੱਚ ਕਾਂਗਰਸ ਦੇ ਪ੍ਰਧਾਨ ਰਾਹੁਲ ਗਾਂਧੀ ਨੇ ਇਹ ਕਹਿ ਦਿੱਤਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਹਿੰਦੂਤਵ ਦੀ ਨੀਂਹ ਬਾਰੇ ਵੀ ਨਹੀਂ ਜਾਣਦੇ।
ਰਾਹੁਲ ਗਾਂਧੀ ਨੇ ਕਿਹਾ ਕਿ ਮੋਦੀ ਨੇ ਸਰਜੀਕਲ ਸਟਰਾਈਕ ਨੂੰ ਸਿਆਸੀ ਰੂਪ ਦੇ ਦਿੱਤਾ, ਜਦ ਕਿ ਫੈਸਲਾ ਦੇਸ਼ ਦੀ ਫੌਜ ਦਾ ਸੀ। ਉਨ੍ਹਾ ਕਿਹਾ ਕਿ ਪ੍ਰਧਾਨ ਮੰਤਰੀ ਕਹਿੰਦੇ ਹਨ ਕਿ ਉਹ ਹਿੰਦੂ ਹਨ, ਪਰ ਉਹ ਹਿੰਦੂਤਵ ਦਾ ਨਿਚੋੜ ਨਹੀਂ ਜਾਣਦੇ। ਉਨ੍ਹਾਂ ਨੂੰ ਇਸ ਦੀ ਨੀਂਹ ਦਾ ਨਹੀਂ ਪਤਾ। ਫਿਰ ਉਹ ਕਿਸ ਤਰ੍ਹਾਂ ਹਿੰਦੂ ਹਨ? ਰਾਹੁਲ ਨੇ ਕਿਹਾ ਕਿ ਨਰਿੰਦਰ ਮੋਦੀ ਦੀ ਸਰਜੀਕਲ ਸਟਰਾਈਕ ਵਾਂਗ ਮਨਮੋਹਨ ਸਿੰਘ ਨੇ ਤਿੰਨ ਵਾਰ ਇੰਝ ਕੀਤਾ ਸੀ। ਫੌਜ ਜਦੋਂ ਮਨਮੋਹਨ ਸਿੰਘ ਦੇ ਕੋਲ ਆਈ ਅਤੇ ਕਿਹਾ ਕਿ ਪਾਕਿਸਤਾਨ ਜੋ ਕੁਝ ਕਰ ਰਿਹਾ ਹੈ, ਉਸ ਦਾ ਸਾਨੂੰ ਬਦਲਾ ਚਾਹੀਦਾ ਹੈ ਤਾਂ ਮਨਮੋਹਨ ਸਿੰਘ ਨੇ ਕਿਹਾ ਕਿ ਸਾਨੂੰ ਆਪਣੇ ਮੰਤਵਾਂ ਲਈ ਗੁਪਤ ਰੱਖ ਕੇ ਕੰਮ ਕਰਨਾ ਚਾਹੀਦਾ ਹੈ।
ਨਰਿੰਦਰ ਮੋਦੀ ਸਰਕਾਰ ਦੀਆਂ ਨੀਤੀਆਂ ਉੱਤੇ ਹਮਲੇ ਕਰਦਿਆਂ ਰਾਹੁਲ ਨੇ ਕਿਹਾ ਕਿ ਮੋਦੀ ਇਹ ਸਮਝਦੇ ਹਨ ਕਿ ਦੁਨੀਆ ਦਾ ਸਾਰਾ ਗਿਆਨ ਉਨ੍ਹਾਂ ਦੇ ਦਿਮਾਗ ਵਿੱਚੋਂ ਨਿਕਲਦਾ ਹੈ, ਹੋਰਨਾਂ ਨੂੰ ਕੁਝ ਨਹੀਂ ਪਤਾ। ਯੂ ਪੀ ਏ ਸਰਕਾਰ ਵੇਲੇ ਐੱਨ ਪੀ ਏ ਦੋ ਲੱਖ ਕਰੋੜ ਰੁਪਏ ਦਾ ਸੀ, ਜਿਹੜਾ ਅੱਜ ਕੱਲ੍ਹ 12 ਲੱਖ ਕਰੋੜ ਰੁਪਏ ਦਾ ਹੋ ਗਿਆ ਹੈ।
ਰਾਹੁਲ ਗਾਂਧੀ ਵੱਲੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 'ਤੇ ਹਿੰਦੂਤਵ ਨੂੰ ਲੈ ਕੇ ਕੀਤੇ ਹਮਲੇ ਵਿਰੁੱਧ ਵਿਦੇਸ਼ ਮੰਤਰੀ ਸੁਸ਼ਮਾ ਸਵਰਾਜ ਨੇ ਜਵਾਬੀ ਹਮਲਾ ਕੀਤਾ। ਉਨ੍ਹਾਂ ਕਿਹਾ ਕਿ ਰਾਹੁਲ ਦਾ ਕਹਿਣਾ ਹੈ ਕਿ ਨਰਿੰਦਰ ਮੋਦੀ ਨੂੰ ਹਿੰਦੂ ਹੋਣ ਦਾ ਮਤਲਬ ਨਹੀਂ ਪਤਾ। ਅਸਲ ਵਿੱਚ ਰਾਹੁਲ ਨੇ ਇਹ ਗੱਲ ਇਸ ਲਈ ਕਹੀ ਹੈ ਕਿ ਉਹ ਅਤੇ ਕਾਂਗਰਸ ਆਪਣੇ ਧਰਮ ਦੇ ਜਾਤੀ ਬਾਰੇ ਕਨਫਿਊਜ਼ਡ ਹਨ। ਕਈ ਸਾਲਾਂ ਤੋਂ ਰਾਹੁਲ ਨੂੰ ਧਰਮ ਨਿਰਪੱਖ ਨੇਤਾ ਵਜੋਂ ਪੇਸ਼ ਕੀਤਾ ਗਿਆ, ਚੋਣਾਂ ਨੇੜੇ ਆਉਣ 'ਤੇ ਉਨ੍ਹਾਂ ਨੂੰ ਅਹਿਸਾਸ ਹੋਇਆ ਕਿ ਹਿੰਦੂ ਬਹੁ ਗਿਣਤੀ ਹਨ, ਇਸ ਲਈ ਉਹ ਅਜਿਹਾ ਅਕਸ ਬਣਾ ਰਹੇ ਹਨ।