ਨਵੀਂ ਦਿੱਲੀ, 2 ਦਸੰਬਰ (ਪੋਸਟ ਬਿਊਰੋ)- ਭਾਰਤ ਦੇ ਰੱਖਿਆ ਮੰਤਰਾਲੇ ਨੇ ਬੀਤੇ ਦਿਨ ਸਮੁੰਦਰੀ ਫੌਜ ਦੇ ਦੋ ਸਟੀਲਥ ਫ੍ਰੀਗੇਟ ਲਈ ਬ੍ਰਹਿਮੋਸ ਸੁਪਰਸੋਨਿਕ ਕਰੂਜ਼ ਮਿਜ਼ਾਈਲਾਂ ਅਤੇ ਫੌਜ ਦੇ ਮੁੱਖ ਲੜਾਕੂ ਟੈਂਕ ‘ਅਰਜੁਨ’ ਲਈ ਬਕਤਰਬੰਦ ਰਿਕਵਰੀ ਵਾਹਨ ਸਮੇਤ ਵੱਖ-ਵੱਖ ਫੌਜੀ ਸਾਜ਼ੋ-ਸਾਮਾਨ ਖਰੀਦਣ ਲਈ 3000 ਕਰੋੜ ਰੁਪਏ ਦੇ ਖਰਚੇ ਨੂੰ ਪ੍ਰਵਾਨਗੀ ਦਿੱਤੀ ਹੈ, ਜਿਹੜੀ ਕਾਫੀ ਚਿਰ ਤੋਂ ਰੁਕੀ ਹੋਈ ਸੀ।
ਇੱਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਇਸ ਖਰੀਦ ਲਈ ਡੀ ਏ ਸੀ ਨੇ ਪ੍ਰਵਾਨਗੀ ਦੇ ਦਿੱਤੀ ਹੈ। ਡੀ ਏ ਸੀ ਅਸਲ ਵਿੱਚ ਫੌਜੀ ਖਰੀਦ ਬਾਰੇ ਫੈਸਲਾ ਕਰਨ ਵਾਲੀ ਇਸ ਮੰਤਰਾਲਾ ਦੀ ਵੱਡੀ ਸੰਸਥਾ ਹੈ। ਇਸ ਦੇ ਮੁਤਾਬਕ ਰੱਖਿਆ ਮੰਤਰੀ ਨਿਰਮਲਾ ਸੀਤਾਰਮਨ ਦੀ ਅਗਵਾਈ ਹੇਠ ਹੋਈ ਬੈਠਕ ਵਿੱਚ 3000 ਕਰੋੜ ਰੁਪਏ ਦੇ ਰੱਖਿਆ ਜੰਤਰ ਖਰੀਦਣ ਬਾਰੇ ਪ੍ਰਵਾਨਗੀ ਦਿੱਤੀ ਗਈ। ਭਾਰਤ ਇੱਕ ਅਰਬ ਡਾਲਰ ਦੀ ਕੀਮਤ ਦੇ ਦੋ ਸਟੇਲਥ ਫ੍ਰਿਗੇਟ ਖਰੀਦੇਗਾ। ਇਹ ਰਾਡਾਰ ਦੀ ਨਜ਼ਰ ਨਾ ਆਉਣ ਵਾਲੇ ਜੰਗੀ ਬੇੜੇ ਹਨ। ਦੋਵੇਂ ਬ੍ਰਹਿਮੋਸ਼ ਮਿਜ਼ਾਈਲਾਂ ਨਾਲ ਲੈਸ ਹੋਣਗੇ।