ਲੰਡਨ, 2 ਦਸੰਬਰ (ਪੋਸਟ ਬਿਊਰੋ)- ਬ੍ਰੈਗਜ਼ਿਟ ਮੁੱਦੇ 'ਤੇ ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਥੈਰੇਸਾ ਮੇ ਦੀਆਂ ਮੁਸ਼ਕਲਾਂ ਵਧਦੀਆਂ ਜਾ ਰਹੀਆਂ ਹਨ। ਪ੍ਰਸਤਾਵਤ ਬ੍ਰੈਗਜ਼ਿਟ ਸਮਝੌਤੇ ਦੇ ਵਿਰੋਧ ਵਿੱਚ ਥੈਰੇਸਾ ਸਰਕਾਰ 'ਚ ਵਿਗਿਆਨ ਤੇ ਯੂਨੀਵਰਸਿਟੀਆਂ ਬਾਰੇ ਮੰਤਰੀ ਸੈਮ ਗਿਮਾਹ ਨੇ ਅਸਤੀਫਾ ਦੇ ਦਿੱਤਾ ਹੈ। ਉਸ ਨੂੰ ਮਿਲਾ ਕੇ ਕੁੱਲ ਸੱਤ ਮੰਤਰੀ ਅਸਤੀਫਾ ਦੇ ਚੁੱਕੇ ਹਨ। ਸਾਲ 2016 'ਚ ਗਿਮਾਹ ਨੇ ਬ੍ਰਿਟੇਨ ਦੇ ਯੂਰਪੀ ਯੂਨੀਅਨ (ਈ ਯੂ) ਵਿੱਚ ਰਹਿਣ ਦੀ ਮੁਹਿੰਮ ਚਲਾਈ ਸੀ।
ਗਿਮਾਹ ਨੇ ਅਸਤੀਫੇ ਵਿੱਚ ਲਿਖਿਆ, ਬ੍ਰੈਗਜ਼ਿਟ ਸਮਝੌਤਾ ਬ੍ਰਿਟੇਨ ਦੇ ਹਿੱਤ ਵਿੱਚ ਨਹੀਂ। ਇਸ ਸਮਝੌਤੇ ਦੇ ਪੱਖ ਵਿੱਚ ਵੋਟ ਦੇਣਾ ਦੇਸ਼ ਨੂੰ ਅਸਫਲਤਾ ਵੱਲ ਲਿਜਾਣਾ ਹੈ। ਇਹ ਬ੍ਰਿਟੇਨ ਨੂੰ ਨਿਯਮ ਨਿਰਮਾਤਾ ਦੇ ਬਦਲੇ ਸਿਰਫ ਨਿਯਮ ਪਾਲਣ ਕਰਨ ਵਾਲਾ ਦੇਸ਼ ਬਣਾ ਦੇਵੇਗਾ। ਉਨ੍ਹਾਂ ਕਿਹਾ ਕਿ ਸਾਨੂੰ ਈ ਯੂ ਤੋਂ ਬਾਹਰ ਨਿਕਲਣ 'ਤੇ ਦੁਬਾਰਾ ਵਿਚਾਰ ਕਰਨ ਦੀ ਜ਼ਰੂਰਤ ਹੈ। ਬ੍ਰੈਗਜ਼ਿਟ ਨੂੰ ਲੈ ਕੇ ਸਾਨੂੰ ਫਿਰ ਤੋਂ ਰਾਏਸ਼ੁਮਾਰੀ ਕਰਨੀ ਚਾਹੀਦੀ ਹੈ। ਗਿਮਾਹ ਨੇ ਕਿਹਾ ਕਿ ਬ੍ਰੈਗਜ਼ਿਟ ਤੋਂ ਬਾਅਦ ਅਸੀਂ ਈ ਯੂ ਦੇ ਜੀ ਪੀ ਐੱਸ ਯਾਨੀ ਗੈਲੀਲਿਓ ਦਾ ਇਸਤੇਮਾਲ ਨਹੀਂ ਕਰ ਸਕਾਂਗੇ, ਜਦ ਕਿ ਇਸ ਵਿੱਚ 150 ਕਰੋੜ ਡਾਲਰ (ਕਰੀਬ 10 ਹਜ਼ਾਰ ਕਰੋੜ ਰੁਪਏ) ਦਾ ਨਿਵੇਸ਼ ਕੀਤਾ ਗਿਆ ਹੈ। ਜੀ-20 ਬੈਠਕ ਲਈ ਅਰਜਨਟੀਨਾ ਗਈ ਥੈਰੇਸਾ ਮੇ ਦੇ ਹੌਸਲੇ ਅਤੇ ਦਿ੍ਰੜ੍ਹਤਾ ਦੀ ਗਿਮਾਹ ਨੇ ਤਾਰੀਫ ਵੀ ਕੀਤੀ।
ਪਿਛਲੇ ਹਫਤੇ ਈ ਯੂ ਤੋਂ ਇਸ ਸਮਝੌਤੇ ਨੂੰ ਮਨਜ਼ੂਰੀ ਮਿਲ ਗਈ ਸੀ। ਸਮਝੌਤੇ ਨੂੰ ਲੈ ਕੇ ਆਪਣੇ ਹੀ ਸੰਸਦ ਮੈਂਬਰਾਂ ਦਾ ਵਿਰੋਧ ਝੱਲ ਰਹੀ ਥੈਰੇਸਾ ਲਈ ਇਸ ਸਮਝੌਤੇ ਨੂੰ ਪਾਰਲੀਮੈਂਟ ਤੋਂ ਮਨਜ਼ੂਰੀ ਦਿਵਾਉਣਾ ਟੇਢੀ ਖੀਰ ਹੈ। ਬ੍ਰੈਗਜ਼ਿਟ ਦੀ ਤਰੀਕ ਅਗਲੇ ਸਾਲ 29 ਮਾਰਚ ਤੈਅ ਹੈ।