ਵਾਸ਼ਿੰਗਟਨ, 2 ਦਸੰਬਰ (ਪੋਸਟ ਬਿਊਰੋ)- ਅਮਰੀਕਾ ਦੇ ਵਿਦਿਆਕ ਅਦਾਰਿਆਂ ਤੋਂ ਪੋਸਟ ਗ੍ਰੈਜੂਏਟ ਤੇ ਇਸ ਤੋਂ ਉਪਰ ਸਿਖਿਆ ਲੈਣ ਵਾਲਿਆਂ ਲਈ ਐੱਚ1 ਬੀ ਵੀਜ਼ਾ ਦਾ ਰਾਹ ਸੌਖਾ ਹੋਣ ਲੱਗਾ ਹੈ। ਰਾਸ਼ਟਰਪਤੀ ਟਰੰਪ ਦੀ ਅਗਵਾਈ ਵਿੱਚ ਅਮਰੀਕੀ ਪ੍ਰ੍ਰਸ਼ਾਸਨ ਨੇ ਵੀਜ਼ਾ ਸ਼ਰਤਾਂ ਵਿੱਚ ਬਦਲਾਅ ਦਾ ਪ੍ਰਸਤਾਵ ਦਿੱਤਾ ਹੈ। ਇਸ ਨਾਲ ਹੁਨਰਮੰਦ ਤੇ ਉਚ ਸਿਖਿਆ ਪ੍ਰਾਪਤ ਲੋਕਾਂ ਨੂੰ ਜ਼ਿਆਦਾ ਮੌਕਾ ਮਿਲ ਸਕੇਗਾ। ਅਮਰੀਕਾ ਦੇ ਡਿਪਾਰਟਮੈਂਟ ਆਫ ਹੋਮਲੈਂਡ ਸਕਿਓਰਿਟੀ (ਡੀ ਐੱਚ ਐੱਸ) ਨੇ ਇਹ ਗੱਲ ਕਹੀ।
ਐੱਚ1 ਬੀ ਵੀਜ਼ਾ ਇੱਕ ਨਾਨ ਰੈਜ਼ੀਡੈਂਟ ਵੀਜ਼ਾ ਹੈ, ਜੋ ਅਮਰੀਕਾ ਵਿੱਚ ਕੰਮ ਕਰਦੀਆਂ ਕੰਪਨੀਆਂ ਨੂੰ ਵਿਦੇਸ਼ੀ ਮੁਲਾਜ਼ਮਾਂ ਨੂੰ ਨੌਕਰੀ ਉੱਤੇ ਰੱਖਣ ਦੀ ਖੁੱਲ੍ਹ ਦਿੰਦਾ ਹੈ। ਅਮਰੀਕਾ ਵਿੱਚ ਟੈਕ ਕੰਪਨੀਆਂ ਹਰ ਸਾਲ ਇਸੇ ਵੀਜ਼ਾ ਮੁਲਾਜ਼ਮਾਂ ਨੂੰ ਆਪਣੇ ਕੋਲ ਨਿਯੁਕਤੀ ਦਿੰਦੀਆਂ ਹਨ। ਹਰ ਵਰ੍ਹੇ 'ਚ ਇਸ ਸ਼੍ਰੇਣੀ ਲਈ 65,000 ਵੀਜ਼ਾ ਜਾਰੀ ਕੀਤੇ ਜਾਂਦੇ ਹਨ। ਅਮਰੀਕੀ ਸੰਸਥਾਨਾਂ ਤੋਂ ਮਾਸਟਰ ਡਿਗਰੀ ਜਾਂ ਇਸ ਤੋਂ ਉੱਚ ਸਿਖਿਆ ਪ੍ਰਾਪਤ ਕਰਨ ਵਾਲੇ ਵਿਦੇਸ਼ੀ ਵਿਦਿਆਰਥੀਆਂ ਦੀਆਂ ਪਹਿਲੀਆਂ 20 ਹਜ਼ਾਰ ਅਰਜ਼ੀਆਂ ਨੂੰ ਇਸ ਤੋਂ ਬਾਹਰ ਰੱਖਿਆ ਜਾਂਦਾ ਹੈ। ਨਵੇਂ ਮਤੇ ਵਿੱਚ ਇਹ ਨਿਯਮ ਬਦਲਣ ਦੀ ਗੱਲ ਹੈ। ਇਸ ਦੇ ਤਹਿਤ ਪਹਿਲਾਂ ਸਾਰੀਆਂ ਅਰਜ਼ੀਆਂ ਨੂੰ 65 ਹਜ਼ਾਰ ਦੀ ਹੱਦ 'ਚ ਰੱਖਿਆ ਜਾਵੇਗਾ। ਇਹ ਹੱਦ ਪੂਰੀ ਹੋਣ ਤੋਂ ਬਾਅਦ 20 ਹਜ਼ਾਰ ਵਾਲੀ ਹੱਦ ਪੂਰੀ ਕੀਤੀ ਜਾਵੇਗੀ। ਅਜਿਹਾ ਹੋਣ ਨਾਲ ਅਮਰੀਕੀ ਸੰਸਥਾਨਾਂ ਤੋਂ ਉਚ ਸਿਖਿਆ ਹਾਸਲ ਕਰਨ ਵਾਲੇ ਲੋਕਾਂ ਲਈ ਮੌਕਾ ਵਧ ਜਾਵੇਗਾ। ਡੀ ਐੱਚ ਐੱਸ ਦਾ ਅੰਦਾਜ਼ਾ ਹੈ ਕਿ ਨਿਯਮਾਂ ਬਦਲਣ ਨਾਲ ਅਮਰੀਕੀ ਸੰਸਥਾਨਾਂ ਤੋਂ ਉੱਚ ਸਿਖਿਆ ਪਾਉਣ ਵਾਲੇ ਕਰੀਬ 5340 ਵਾਧੂ ਵਿਦੇਸ਼ੀ ਵਿਦਿਆਰਥੀਆਂ ਨੂੰ ਫਾਇਦਾ ਹੋਵੇਗਾ। ਨਵੇਂ ਨਿਯਮਾਂ ਤਹਿਤ ਕੰਪਨੀਆਂ ਨੂੰ ਬਿਨੈ ਲਈ ਪਹਿਲਾਂ ਯੂ ਐੱਸ ਸਿਟੀਜਨਸ਼ਿਪ ਐਂਡ ਇਮੀਗਰੇਸ਼ਨ ਸਰਵਿਸਿਜ਼ (ਯੂ ਐੱਸ ਸੀ ਆਈ ਐੱਸ) 'ਤੇ ਆਨਲਾਈਨ ਰਜਿਸਟਰੇਸ਼ਨ ਕਰਵਾਉਣੀ ਪਵੇਗੀ।
ਇਸ ਦੌਰਾਨ ਪਤਾ ਲੱਗਾ ਹੈ ਕਿ 2014 ਤੋਂ ਪਿੱਛੋਂ 20 ਹਜ਼ਾਰ ਤੋਂ ਵੱਧ ਭਾਰਤੀਆਂ ਨੇ ਅਮਰੀਕਾ ਦੀ ਸ਼ਰਨ ਮੰਗੀ ਹੈ। ਬੀਤੇ ਦੋ ਸਾਲਾਂ 'ਚ ਇਥੇ ਸ਼ਰਨ ਮੰਗਣ ਵਾਲੇ ਭਾਰਤੀਆਂ ਦੀ ਗਿਣਤੀ ਲਗਭਗ ਦੁੱਗਣੀ ਹੋ ਗਈ ਹੈ। ਡਿਪਾਰਟਮੈਂਟ ਆਫ ਹੋਮਲੈਂਡ ਸਕਿਓਰਿਟੀ ਵੱਲੋਂ ਨਾਰਥ ਅਮਰੀਕਨ ਪੰਜਾਬੀ ਐਸੋਸੀਏਸ਼ਨ (ਐੱਨ ਏ ਪੀ ਏ) ਨੂੰ ਦਿੱਤੇ ਅੰਕੜਿਆਂ ਵਿੱਚ ਇਹ ਗੱਲ ਸਾਹਮਣੇ ਆਈ ਹੈ। ਕੈਲੀਫੋਰਨੀਆ ਸਥਿਤ ਐੱਨ ਏ ਪੀ ਏ ਪੰਜਾਬ ਤੋਂ ਇਥੇ ਆਏ ਗੈਰ ਕਾਨੂੰਨੀ ਅਪ੍ਰਵਾਸੀਆਂ ਲਈ ਕੰਮ ਕਰਦੀ ਹੈ। ਐਸੋਸੀਏਸ਼ਨ ਨੂੰ ਮਿਲੇ ਅੰਕੜਿਆਂ ਮੁਤਾਬਕ ਇਕੱਲੇ ਇਸ ਸਾਲ ਦੀ ਜੁਲਾਈ ਤੱਕ 7214 ਭਾਰਤੀਆਂ ਨੇ ਸ਼ਰਨ ਮੰਗਣ ਲਈ ਬਿਨੈ ਕੀਤਾ ਸੀ। ਇਨ੍ਹਾਂ 'ਚੋਂ 296 ਔਰਤਾਂ ਹਨ। 2014 'ਚ 146 ਔਰਤਾਂ ਸਮੇਤ 2306 ਭਾਰਤੀਆਂ ਨੇ ਬਿਨੈ ਕੀਤਾ ਸੀ। ਜਦ ਕਿ 2015 'ਚ 96 ਔਰਤਾਂ ਸਮੇਤ 2971 ਭਾਰਤੀਆਂ ਨੇ ਅਮਰੀਕਾ ਵਿੱਚ ਸ਼ਰਨ ਮੰਗੀ ਸੀ। ਐੱਨ ਏ ਪੀ ਏ ਦੇ ਐੱਮ ਡੀ ਸਤਨਾਮ ਸਿੰਘ ਚਾਹਲ ਨੇ ਕਿਹਾ, ਅਮਰੀਕਾ ਵਿੱਚ ਨਿਵਾਸ ਲਈ ਸ਼ਰਨ ਮੰਗ ਰਹੇ ਭਾਰਤੀਆਂ ਦੀ ਵਧਦੀ ਗਿਣਤੀ ਸਾਡੇ ਲਈ ਚਿੰਤਾ ਦਾ ਕਾਰਨ ਹੈ।