ਇੱਕ ਮਈ 1988 ਨੂੰ ਅਯੁੱਧਿਆ ਵਿੱਚ ਆਸ਼ਿਮਾ ਸ਼ਰਮਾ ਤੇ ਕਰਨਲ ਅਜੈ ਕੁਮਾਰ ਸ਼ਰਮਾ ਦੀ ਬੇਟੀ ਵਜੋਂ ਜਨਮੀ ਅਭਿਨੇਤਰੀ ਅਨੁਸ਼ਕਾ ਸ਼ਰਮਾ ਨੇ ਆਪਣਾ ਫਿਲਮ ਕਰੀਅਰ ਆਦਿੱਤਯ ਚੋਪੜਾ ਦੀ ਫਿਲਮ ‘ਰਬ ਨੇ ਬਨਾ ਦੀ ਜੋੜੀ’ (2008) ਨਾਲ ਸ਼ੁਰੂ ਕੀਤਾ ਸੀ। ਇਸ ਵਿੱਚ ਉਹ ਸ਼ਾਹਰੁਖ ਦੇ ਆਪੋਜ਼ਿਟ ਲੀਡ ਰੋਲ ਵਿੱਚ ਸੀ। ਇਹ ਬਾਕਸ ਆਫਿਸ 'ਤੇ ਜ਼ਬਰਦਸਤ ਹਿੱਟ ਸਾਬਤ ਹੋਈ। ‘ਜਦ ਤਕ ਹੈ ਜਾਨ’ ਵਿੱਚ ਅਨੁਸ਼ਕਾ ਨੂੰ ਯਸ਼ ਚੋਪੜਾ ਦੇ ਨਿਰਦੇਸ਼ਨ ਵਿੱਚ ਕੰਮ ਕਰਨ ਦਾ ਮੌਕਾ ਮਿਲਿਆ। ਰਾਜ ਕੁਮਾਰ ਹਿਰਾਨੀ ਦੀ ਫਿਲਮ ‘ਪੀਕੇ’ ਵਿੱਚ ਉਹ ਆਮਿਰ ਖਾਨ ਦੀ ਹੀਰੋਇਨ ਬਣੀ। ‘ਸੁਲਤਾਨ’ ਵਿਚ ਉਹ ਸਲਮਾਨ ਦੇ ਆਪੋਜ਼ਿਟ ਸੀ। ਉਸ ਦੀਆਂ ਇਹ ਸਭ ਫਿਲਮਾਂ ਬਾਕਸ ਆਫਿਸ 'ਤੇ ਜ਼ਬਰਦਸਤ ਹਿੱਟ ਸਾਬਿਤ ਹੋਈਆਂ। ਅਨੁਸ਼ਕਾ ਸ਼ਰਮਾ ਇਸ ਸਾਲ ਰਿਲੀਜ਼ ‘ਅੰਗਰੇਜ਼ੀ ਮੀਡੀਅਮ’ ਦੇ ਇੱਕ ਸਪੈਸ਼ਲ ਗੀਤ ਵਿੱਚ ਨਜ਼ਰ ਆਈ ਸੀ। ਲੀਡ ਅਭਿਨੇਤਰੀ ਵਜੋਂ ਉਹ ਆਖਰੀ ਵਾਰ 2018 ਵਿੱਚ ਰਿਲੀਜ਼ ‘ਜ਼ੀਰੋ’ ਵਿੱਚ ਸ਼ਾਹਰੁਖ ਦੇ ਆਪੋਜ਼ਿਟ ਨਜ਼ਰ ਆਈ ਸੀ। ਉਸ ਨੇ ਭਾਵੇਂ ਐਕਟਿੰਗ ਤੋਂ ਬ੍ਰੇਕ ਲੈ ਲਿਆ ਹੋਵੇ, ਪਰ ਉਹ ਵੈੱਬ ਸੀਰੀਜ਼ ਅਤੇ ਫਿਲਮਾਂ ਬਣਾਉਣ ਵਿੱਚ ਪਹਿਲਾਂ ਤੋਂ ਵੱਧ ਸਰਗਰਮ ਹੈ। ਅਮੇਜਾਨ ਪ੍ਰਾਈਮ 'ਤੇ ਉਸ ਦੀ ਪਿਛਲੀ ਸੀਰੀਜ਼ ‘ਪਾਤਾਲ ਲੋਕ’ ਦੀ ਸਫਲਤਾ ਦੇ ਕੁਝ ਹੀ ਹਫਤਿਆ ਬਾਅਦ ਨੈੱਟਫਲਿਕਸ 'ਤੇ ਦੂਸਰੀ ਵੈੱਬ ਸੀਰੀਜ਼ ‘ਬੁਲਬੁਲ’ ਆਨ ਸਟਰੀਮ ਹੋਈ। ਪੇਸ਼ ਹਨ ਅਨੁਸ਼ਕਾ ਸ਼ਰਮਾ ਨਾਲ ਹੋਈ ਗੱਲਬਾਤ ਦੇ ਕੁਝ ਅੰਸ਼ :
* ‘ਪਾਤਾਲ ਲੋਕ’ ਦੇ ਬਾਅਦ ‘ਬੁਲਬੁਲ' ਤੋਂ ਦਰਸ਼ਕਾਂ ਨੂੰ ਬਹੁਤ ਜ਼ਿਆਦਾ ਉਮੀਦਾਂ ਸਨ, ਪਰ ਇਸ ਨੇ ਨਿਰਾਸ਼ ਕੀਤਾ?
-ਇਸ ਦਾ ਨਿਰਮਾਣ ਮੈਂ ਆਪਣੇ ਭਰਾ ਕਰਣੇਸ਼ ਨਾਲ ਮਿਲ ਕੇ ਕੀਤਾ ਸੀ। ਇਸ ਦਾ ਨਿਰਦੇਸ਼ਨ ਅਵਿੰਤਾ ਦੱਤਾ ਨੇ ਕੀਤਾ ਸੀ। ਅਭਿਨੇਤਰੀ ਹੋਣ ਦੇ ਬਾਵਜੂਦ ਮੈਂ ਇਸ ਵਿੱਚ ਕੋਈ ਕਿਰਦਾਰ ਨਹੀਂ ਨਿਭਾਇਆ ਕਿਉਂਕਿ ਅਸੀਂ ਚਾਹੁੰਦੇ ਸੀ ਕਿ ਬਤੌਰ ਮੇਕਰ ਇਸ 'ਤੇ ਵੱਧ ਧਿਆਨ ਦੇ ਸਕੀਏ ਅਤੇ ਅਸੀਂ ਇੰਝ ਕੀਤਾ ਵੀ। ਮੈਂ ਮੰਨਦੀ ਹਾਂ ਕਿ ਇਸ ਨੂੰ ‘ਪਾਤਾਲ ਲੋਕ’ ਜਿੰਨੀ ਕਾਮਯਾਬੀ ਨਹੀਂ ਮਿਲੀ, ਪਰ ਹਰ ਵਾਰ ਇਹ ਸੰਭਵ ਵੀ ਨਹੀਂ ਹੈ।
* ‘ਪਾਤਾਲ ਲੋਕ’ ਤਲਖ ਸੋਸ਼ਿਓ ਪਾਲੀਟਿਕਲ ਸੱਚਾਈ 'ਤੇ ਆਧਾਰਤ ਵੈੱਬ ਸੀਰੀਜ਼ ਸੀ, ਜਦ ‘ਬੁਲਬੁਲ’ ਇੱਕ ਬਾਲਿਕਾ ਵਧੂ, ਜੋ ਇੱਕ ਆਤਮਘਾਤੀ ਮਹਿਲਾ ਬਣ ਜਾਂਦੀ ਹੈ, ਦੀ ਕਹਾਣੀ 'ਤੇ ਆਧਾਰਤ ਸੀ। ਹਰ ਵਾਰ ਨਵੇਂ-ਨਵੇਂ ਸਬਜੈਕਟ ਕਿੱਥੋਂ ਲੱਭ ਕੇ ਲਿਆਉਂਦੇ ਹੋ?
- ਨਿਸ਼ਚਿਤ ਹੀ ਹਰ ਵਾਰ ਨਵਾਂ ਸਬਜੈਕਟ ਸਿਲੈਕਟ ਕਰਨਾ ਕਾਫੀ ਔਖਾ ਅਤੇ ਚੁਣੌਤੀ ਪੂਰਨ ਹੁੰਦਾ ਹੈ। ਮੇਰੀ ਕੋਸ਼ਿਸ਼ ਹੁੰਦੀ ਹੈ ਕਿ ਮੈਂ ਹਰ ਵਾਰ ਅਜਿਹਾ ਸਬਜੈਕਟ ਚੁਣਾਂ, ਜਿਸ ਨੂੰ ਪਹਿਲਾਂ ਕਿਸੇ ਨੇ ਨਾ ਕੀਤਾ ਹੋਵੇ। ਇਹ ਮੁਸ਼ਕਲ ਹੋਣ ਦੇ ਨਾਲ-ਨਾਲ ਜੋਖਿਮ ਪੂਰਨ ਵੀ ਹੁੰਦਾ ਹੈ ਜਿਵੇਂ ‘ਪਾਤਾਲ ਲੋਕ’ ਜ਼ਬਰਦਸਤ ਸਫਲ ਹੋਣ ਦੇ ਬਾਵਜੂਦ ਉਸ ਦਾ ਵਿਰੋਧ ਵੀ ਖੂਬ ਹੋਇਆ। ਉਹ ਅੱਜ ਵੀ ਪਾਲੀਟਿਕਸ ਦੀ ਹਕੀਕਤ ਨੂੰ ਬਿਆਨ ਕਰਦੀ ਸੀ, ਇਸ ਲਈ ਉਸ ਨੂੰ ਬੈਨ ਕਰਨ ਦੀ ਮੰਗ ਵੀ ਉਠੀ ਸੀ, ਪਰ ਦਰਸ਼ਕਾਂ ਵੱਲੋਂ ਮਿਲੇ ਸਮਰਥਨ ਦੇ ਕਾਰਨ ਉਸ ਨੂੰ ਬੈਨ ਕਰਨ ਦੀ ਮੰਗ ਬੇਅਸਰ ਹੀ ਸਾਬਿਤ ਹੋਈ।
* ਸਾਬਕਾ ਮਹਿਲਾ ਕ੍ਰਿਕਟ ਕਪਤਾਨ ਝੂਲਨ ਗੋਸਵਾਮੀ ਦੀ ਬਾਇਓਪਿਕ ਵਿੱਚ ਤੁਸੀਂ ਉਨ੍ਹਾਂ ਦਾ ਕਿਰਦਾਰ ਨਿਭਾਉਣ ਵਾਲੇ ਸੀ, ਉਸ ਫਿਲਮ ਦਾ ਕੀ ਹੋਇਆ?
- ਕੋਰੋਨਾ ਕਾਰਨ ਕਾਫੀ ਪ੍ਰੋਜੈਕਟ ਫਿਲਹਾਲ ਠੰਢੇ ਬਸਤੇ ਵਿੱਚ ਹਨ। ਉਨ੍ਹਾਂ ਵਿੱਚੋਂ ਇੱਕ ਇਹ ਵੀ ਹੈ। ਸਾਨੂੰ ਸਾਰਿਆਂ ਨੂੰ ਬੱਸ ਹਾਲਾਤ ਨਾਰਮਲ ਹੋਣ ਦਾ ਉਡੀਕ ਹੈ।
* ਐਕਟਿੰਗ ਵਿੱਚ ਤੁਹਾਡੀ ਗੱਡੀ ਖੂਬ ਚੱਲ ਰਹੀ ਸੀ, ਇਸ ਦੇ ਬਾਵਜੂਦ ਤੁਸੀਂ ਪ੍ਰੋਡਿਊਸਰ ਬਣਨ ਦਾ ਫੈਸਲਾ ਲੈ ਕੇ ਬੇਕਾਰ ਦਾ ਸਿਰਦਰਦ ਕਿਉਂ ਲੈ ਲਿਆ?
- ਮੈਂ ਹਮੇਸ਼ਾ ਕੁਝ ਨਵਾਂ ਕਰਨਾ ਚਾਹੁੰਦੀ ਸੀ ਤੇ ਮੈਨੂੰ ਲੱਗਦਾ ਹੈ ਕਿ ਮੇਰੀ ਇਸੀ ਦ੍ਰਿੜਤਾ ਨਾਲ ਅੱਜ ਮੈਂ ਇਸ ਮੁਕਾਮ 'ਤੇ ਹਾਂ। ਮੈਂ ਉਸ ਵਕਤ ਸਿਰਫ 25 ਸਾਲ ਦੀ ਸੀ। ਫਿਲਮ ਬਣਾਉਣ ਦਾ ਮੈਨੂੰ ਤਜਰਬਾ ਅਤੇ ਜਾਣਕਾਰੀ ਨਹੀਂ ਸੀ। ਇਸ ਦੇ ਬਾਵਜੂਦ ਮੈਂ ਪ੍ਰੋਡਿਊਸਰ ਬਣੀ ਤੇ ਮੈਨੂੰ ਕਾਮਯਾਬੀ ਮਿਲੀ। ਉਸ ਵਕਤ ਕਈ ਲੋਕਾਂ ਨੇ ਨੇ ਮੈਨੂੰ ਪ੍ਰੋਡਕਸ਼ਨ ਵਿੱਚ ਆਉਣ ਤੋਂ ਮਨ੍ਹਾ ਕੀਤਾ ਸੀ, ਪਰ ਮੈਂ ਕਿਸੇ ਦੀ ਨਾ ਮੰਨੀ ਅਤੇ ਸਿਰਫ ਆਪਣੇ ਦਿਲ ਦੀ ਸੁਣੀ। ਮੈਂ ਸ਼ੁਰੂ ਤੋਂ ਅਜਿਹੀ ਹੀ ਹਾਂ। ਲੋਕਾਂ ਦੀ ਘੱਟ ਅਤੇ ਆਪਣੇ ਦਿਲ ਦੀ ਜ਼ਿਆਦਾ ਸੁਣਦੀ ਹਾਂ।