-ਆਲੋਕ ਪੁਰਾਣਿਕ
ਕੋਰੋਨਾ ਤੋਂ ਦੁਖੀ ਪਬਲਿਕ ਨੇ ਕ੍ਰਿਕਟ ਆਈ ਪੀ ਐੱਲ ਬਹੁਤ ਦੇਖਿਆ। ਟੀ ਵੀ 'ਤੇ ਦਰਸ਼ਕ ਗਿਣਤੀ ਦੇ ਰਿਕਾਰਡ ਟੁੱਟ ਗਏ। ਪ੍ਰਸਾਰਕ ਦੀ ਝੋਲੀ ਭਰ ਗਈ ਤਾਂ ਜ਼ਾਹਿਰ ਹੈ ਉਸ ਦੀ ਮੁਸਕਾਨ ਚੌੜੀ ਹੋ ਗਈ ਹੋਵੇਗੀ, ਪਰ ਮੈਂ ਸੋਚਾਂ ਵਿੱਚ ਪੈ ਗਿਆ ਕਿ ਆਈ ਪੀ ਐੱਲ ਦੇ ਕਾਰੋਬਾਰੀ ਦੁਆ ਨਾ ਕਰਨ ਲੱਗ ਜਾਣ ਕਿ ਹਰ ਸਾਲ ਕੁਝ ਇਸੇ ਤਰ੍ਹਾਂ ਦਾ ਮਾਮਲਾ ਬਣ ਜਾਏ। ਆਖਿਰ ਕੋਰੋਨਾ ਟਾਈਪ ਹਾਲਾਤ ਵਿੱਚ ਆਈ ਪੀ ਐੱਲ ਕ੍ਰਿਕਟ ਜੇ ਧੂੰਆਂਧਾਰ ਕਮਾਈ ਦੇ ਗਿਆ, ਤਾਂ ਕੋਰੋਨਾ ਦੀ ਕਾਮਨਾ ਕੋਈ ਕਿਉਂ ਨਾ ਕਰੇ। ਕੈਮਿਸਟ ਤੇ ਹਸਪਤਾਲਾਂ ਦੇ ਬਾਅਦ ਆਈ ਪੀ ਐੱਲ ਵਾਲੇ ਕੋਰੋਨਾ ਦੇ ਲਾਭ ਲੈਣ ਵਾਲਿਆਂ ਵਿੱਚ ਸ਼ਾਮਲ ਹੋ ਗਏ। ਕੋਰੋਨਾ ਦਾ ਟੀਕਾ ਵਿਕਸਤ ਕਰਨ ਵਾਲੇ ਚਿੰਤਾ ਪ੍ਰਗਟਾ ਰਹੇ ਹਨ ਕਿ ਕਿਤੇ ਟੀਕੇ ਤੋਂ ਪਹਿਲਾਂ ਹੀ ਕੋਰੋਨਾ ਵਿਦਾ ਹੋ ਗਿਆ ਤਾਂ ਫਿਰ ਉਨ੍ਹਾਂ ਦੇ ਇਨਵੈਸਟਮੈਂਟ ਦਾ ਕੀ ਹੋਵੇਗਾ?
ਅਸਲੀ ਦੇ ਨਾਂਅ 'ਤੇ ਨਕਲੀ ਵੇਚਣ ਵਾਲਿਆਂ ਦੀਆਂ ਵਾਛਾਂ ਖਿੜੀਆਂ ਹੋਈਆਂ ਹਨ। ਅਜਿਹੇ ਹੀ ਇੱਕ ਨਕਲਚੀ ਨੇ ਕਿਹਾ ਕਿ ਜਿੰਨੀ ਅਸਲੀ ਵੈਕਸੀਨ ਵਿਕੇਗੀ, ਉਸ ਤੋਂ ਕਈ ਗੁਣਾ ਅਸੀਂ ਨਕਲੀ ਵੇਚਾਂਗਾ ਅਤੇ ਲੋਕਾਂ ਨੂੰ ਅਸਲੀ ਵੈਕਸੀਨ ਤੋਂ ਹੋਣ ਵਾਲੇ ਸਾਈਡ ਇਫੈਕਟ ਦੀ ਟੈਨਸ਼ਨ ਵੀ ਨਹੀਂ ਲੈਣੀ ਪਵੇਗੀ। ਅਸਲ ਵਿੱਚ ਕੋਰੋਨਾ ਵੈਕਸੀਨ ਤੋਂ ਜਿੰਨੀ ਉਮੀਦ ਪਬਲਿਕ ਨੇ ਨਹੀਂ ਲਾਈ, ਉਸ ਤੋਂ ਜ਼ਿਆਦਾ ਨਕਲਚੀਆਂ ਨੇ ਲਾਈ ਹੋਈ ਹੈ। ਪੂਰੀਆਂ ਤਿਆਰੀਆਂ ਹਨ। ਇਸ ਮੁਲਕ ਦੇ ਨਕਲਚੀ ਇੰਨੇ ਸਮਾਰਟ ਹਨ ਕਿ ਕਿਤੇ ਇਹ ਲੋਕ ਵੈਕਸੀਨ ਹੀ ਪਹਿਲਾਂ ਨਾ ਉਤਾਰ ਦੇਣ। ਕੋਰੋਨਾ ਵੈਕਸੀਨ ਵਿੱਚ ਕਿਸੇ ਦਾ 95 ਫੀਸਦੀ ਰਿਜ਼ਲਟ ਹੈ, ਕਿਸੇ ਦਾ ਨੱਬੇ ਫੀਸਦੀ। ਕੋਰੋਨਾ ਦੀ ਨਕਲੀ ਵੈਕਸੀਨਾਂ ਵਿੱਚ 2900 ਫੀਸਦੀ ਰਿਜ਼ਲਟ ਆਏਗਾ। ਮੈਨੂੰ ਅਜਿਹੇ ਇੱਕ ਨਕਲਚੀ ਨੇ ਦੱਸਿਆ ਕਿ 100 ਦਾ ਮਾਲ 3000 ਦਾ ਵਿਕੇਗਾ। ਬੜੇ ਆਸ਼ਾਵਾਦੀ ਹਨ ਲੋਕ। ਕੋਰੋਨਾ ਵਾਇਰਸ ਜੇ ਸੁਣ ਰਿਹਾ ਹੈ ਤਾਂ ਸਮਝ ਸਕਦਾ ਹੈ ਕਿ ਹਰ ਕੋਈ ਉਸ ਦਾ ਬੁਰਾ ਨਹੀਂ ਸੋਚਦਾ।
ਭਾਰਤੀਆਂ ਨੂੰ ਸਮਝਣਾ ਆਸਾਨ ਨਹੀਂ। ਕੋਰੋਨਾ ਦੀ ਚਿੰਤਾ ਹੈ, ਪਰ ਆਈ ਪੀ ਐੱਲ ਕ੍ਰਿਕਟ 'ਤੇ ਵੀ ਧਿਆਨ ਪੂਰਾ ਦਿੱਤਾ। ਉਸ ਦੇ ਬਾਅਦ ਸੈਲੇਬ੍ਰਿਟੀ ਵੀ ਘੱਟ ਨਹੀਂ। ਇੱਕ ਸੈਲੇਬ੍ਰਿਟੀ ਨੂੰ ਗਾਂਜੇ ਨਾਲ ਗ੍ਰਿਫਤਾਰ ਕੀਤਾ ਗਿਆ ਤਾਂ ਉਹ ਵੀ ਕੋਰੋਨਾ ਬਾਰੇ ਚਿੰਤਤ ਦਿਸੀ ਅਤੇ ਮਾਸਕ ਲਾ ਕੇ ਗ੍ਰਿਫਤਾਰ ਹੋਈ। ਗਾਂਜਾ ਸਿਹਤ ਨੂੰ ਨੁਕਸਾਨ ਪਹੁੰਚਾ ਦੇਵੇ, ਪਰ ਕੋਰੋਨਾ ਨੂੰ ਨੁਕਾਸਨ ਨਹੀਂ ਕਰਨ ਦੇਣਗੇ। ਗਾਂਜੇ ਦਾ ਦਮ ਵੀ ਮਾਸਕ ਲਾ ਕੇ ਹੀ ਲਾਇਆ ਜਾਏ ਅਤੇ ਕੋਰੋਨਾ ਚੇਤਨਾ ਕੀ ਹੁੰਦੀ ਹੈ, ਇਸ ਚੇਤਨਾ ਦਾ ਇਸਤੇਮਾਲ ਹੋਣਾ ਚਾਹੀਦਾ ਹੈ। ਇਨ੍ਹਾਂ ਸੈਲੇਬ੍ਰਿਟੀ ਨੂੰ ਇਸ਼ਤਿਹਾਰ ਵਿਚ ਦਿਖਾਇਆ ਜਾਏ-ਗਾਂਜਾ ਫੂਕਦੇ ਹੋਏ, ਫਿਰ ਮਾਸਕ ਲਾਉਂਦੇ ਹੋਏ, ਮਾਸਕ ਉਤਾਰ ਕੇ ਫਿਰ ਗਾਂਜਾ ਫੂਕਦੇ ਹੋਏ-ਮਾਸਕ ਹੈ ਜ਼ਰੂਰੀ-ਦਾ ਸੰਦੇਸ਼ ਨਾਲ ਚੱਲੇ। ਕੋਰੋਨਾ ਦੀ ਚਿੰਤਾ ਨਾਲ ਚੱਲਦੀ ਹੈ, ਗਾਂਜਾ ਵੀ ਨਾਲ ਚੱਲਦਾ ਹੈ। ਗਾਂਜੇ ਦੀ ਤਲਬ ਤੇ ਮਾਸਕ ਚੇਤਨਾ ਨਾਲ ਹੀ ਚੱਲਦੀ ਹੈ।
ਗਾਂਜਾ ਫੂਕਣ ਵਾਲਿਆਂ ਨੂੰ ਕੀ ਚਿੰਤਾ ਫੇਫੜਿਆਂ ਦੀ, ਪਰ ਕੋਰੋਨਾ ਮਾਸਕ ਦੀ ਚੇਤਨਾ ਹੈ, ਫੇਫੜੇ ਤਬਾਹ ਹੋਣ ਤਾਂ ਗਾਂਜੇ ਨਾਲ ਹੋਣ, ਕੋਰੋਨਾ ਨੂੰ ਤਬਾਹੀ ਨਹੀਂ ਮਚਾਉਣ ਦੇਣਗੇ। ਕਾਮੇਡੀਅਨ ਦੀ ਗ੍ਰਿਫਤਾਰੀ ਗਾਂਜੇ ਦੇ ਚੱਕਰ ਵਿੱਚ ਹੋਵੇ ਤਾਂ ਸੋਚਣਾ ਪੈਂਦਾ ਹੈ ਕਿ ਹੱਸਣ-ਹਸਾਉਣ ਵਾਲੇ ਲੋਕ ਵੀ ਗਾਂਜੇ ਦੇ ਚੱਕਰ ਵਿੱਚ ਕਿਉਂ ਪੈਂਦੇ ਹਨ। ਜਵਾਬ ਮਿਲ ਸਕਦਾ ਹੈ ਕਿ ਜਿਵੇਂ ਚੁਟਕਲਿਆਂ 'ਤੇ ਹੱਸਣ-ਹਸਾਉਣ ਦੀ ਕੋਸ਼ਿਸ਼ ਕਈ ਕਾਮੇਡੀਅਨ ਕਰਦੇ ਹਨ, ਉਨ੍ਹਾਂ 'ਤੇ ਹੱਸਣ ਦੇ ਲਈ ਸੁਣਨ ਵਾਲਿਆਂ ਦਾ ਵੀ ਗਾਂਜਾ ਪੀਣਾ ਜ਼ਰੂਰੀ ਹੈ। ਆਮ ਆਦਮੀ ਚੁਟਕਲਿਆਂ 'ਤੇ ਹੱਸ ਨਹੀਂ ਸਕਦਾ। ਜਿਨ੍ਹਾਂ ਔਰਤਾਂ ਦਾ ਕਿਸੇ ਰੋਗ, ਕਿਸੇ ਕਮਜ਼ੋਰੀ ਦਾ ਪੁਰਜ਼ੋਰ ਮਜ਼ਾਕ ਉਡਾਇਆ ਜਾਏ, ਉਨ੍ਹਾਂ 'ਤੇ ਹੱਸਣ ਲਈ ਅਣਮਨੁੱਖਤਾ ਦਾ ਅੰਸ਼ ਜ਼ਰੂਰੀ ਹੈ, ਇਹ ਅੰਸ਼ ਗਾਂਜੇ ਜਾਂ ਚਰਸ ਤੋਂ ਆ ਸਕਦਾ ਹੈ। ਕਾਮੇਡੀਅਨਾਂ ਦਾ ਗਾਂਜਾ ਲਾਉਣਾ ਏਦਾਂ ਸਮਝ ਵਿੱਚ ਆ ਸਕਦਾ ਹੈ।
ਇਧਰ ਗੌਰ ਨਾਲ ਦੇਖੋ ਤਾਂ ਕਈ ਤਰ੍ਹਾਂ ਦੇ ਅਪਰਾਧੀ ਮਾਸਕ ਲਾ ਕੇ ਫੋਟੋ ਖਿਚਵਾਉਂਦੇ ਹਨ। ਮਾਸਕ ਲਾ ਕੇ ਫੋਟੋ ਖਿਚਾਉਣ ਨਾਲ ਅਪਰਾਧੀ ਇਕਦਮ ਜਾਗਰੂਕ ਟਾਈਪ ਲੱਗਦਾ ਹੈ ਤੇ ਇੱਕ ਤਰ੍ਹਾਂ ਉਸ ਦੀ ਬਚਤ ਵੀ ਹੋ ਜਾਂਦੀ ਹੈ, ਕੋਈ ਪੂਰੀ ਤਰ੍ਹਾਂ ਪਛਾਣ ਨਹੀਂ ਸਕਦਾ। ਇਸ ਤਰ੍ਹਾਂ ਨਾਲ ਅੱਜ ਦਾ ਮਾਸਕਧਾਰੀ ਜੇਬਕਤਰਾ ਕੱਲ੍ਹ ਵਿਧਾਇਕ ਬਣਨ ਦੀ ਤਿਆਰੀ ਕਰ ਸਕਦਾ ਹੈ। ਕਾਮੇਡੀਅਨ ਵੀ ਮਾਸਕ ਵਿੱਚ, ਨੇਤਾ ਵੀ ਮਾਸਕ ਵਿੱਚ, ਆਮ ਆਦਮੀ ਵੀ ਮਾਸਕ ਵਿੱਚ ਹੈ, ਬੱਸ ਕੋਰੋਨਾ ਵਾਇਰਸ ਖੁੱਲ੍ਹੇਆਮ ਘੁੰਮ ਰਿਹਾ ਹੈ। ਕਿਉਂਕਿ ਸਾਲ ਖਤਮ ਹੋਣ ਵਾਲਾ ਹੈ ਤਾਂ ਸਾਲ ਦੇ ਤਮਾਮ ਪਹਿਲੂਆਂ ਦੀ ਚਰਚਾ ਵੀ ਸੁਭਾਵਿਕ ਹੋਵੇਗੀ। ਅਜਿਹੇ ਵਿੱਚ 2020 ਦਾ ਵਰਡ ਆਫ ਦ ਈਅਰ, ਸੈਲੇਬ੍ਰਿਟੀ ਆਫ ਦਿ ਈਅਰ ਦਾ ਖਿਤਾਬ ਕੋਰੋਨਾ ਦੀ ਝੋਲੀ ਵਿੱਚ ਹੀ ਜਾਏਗਾ। ਜਿਵੇਂ ਕਵੀ ਤੇ ਨੇਤਾ ਮੰਚ ਛੱਡਣ ਨੂੰ ਤਿਆਰ ਨਹੀਂ ਹੁੰਦੇ, ਉਵੇਂ ਹੀ ਇਹ ਮੋਇਆ ਵਾਇਰਸ ਵੀ ਪਿੱਛਾ ਛੱਡਣ ਦਾ ਨਾਂਅ ਨਹੀਂ ਲੈ ਰਿਹਾ।