ਈਟਾਨਗਰ, 30 ਨਵੰਬਰ (ਪੋਸਟ ਬਿਊਰੋ)- ਅਰੁਣਾਚਲ ਪ੍ਰਦੇਸ਼ ਦੇ ਗਵਰਨਰ ਬ੍ਰਿਗੇਡੀਅਰ (ਸੇਵਾਮੁਕਤ) ਬੀ ਡੀ ਮਿਸ਼ਰਾ ਇਕ ਗਰਭਵਤੀ ਮਹਿਲਾ ਨੂੰ ਆਪਣੇ ਹੈਲੀਕਾਪਟਰ ਉੱਤੇ ਤਵਾਂਗ ਤੋਂ ਈਟਾਨਗਰ ਲੈ ਕੇ ਆਏ ਤਾਂ ਕਿ ਉਸ ਨੂੰ ਸਮੇਂ 'ਤੇ ਡਾਕਟਰੀ ਸਹਾਇਤਾ ਪ੍ਰਾਪਤ ਹੋ ਸਕੇ।
ਰਾਜ ਭਵਨ ਦੇ ਸੂਤਰਾਂ ਨੇ ਦੱਸਿਆ ਕਿ ਤਵਾਂਗ ਵਿੱਚ ਬੀਤੇ ਦਿਨੀਂ ਅਧਿਕਾਰਿਕ ਪ੍ਰੋਗਰਾਮ ਦੇ ਦੌਰਾਨ ਗਵਰਨਰ ਨੇ ਮੁੱਖ ਮੰਤਰੀ ਪੇਮਾ ਖਾਂਡੂ ਅਤੇ ਸਥਾਨਕ ਵਿਧਾਇਕ ਦੀ ਗੱਲਬਾਤ ਸੁਣੀ ਕਿ ਇਕ ਗਰਭਵਤੀ ਮਹਿਲਾ ਦੀ ਹਾਲਤ ਨਾਜ਼ੁਕ ਹੈ, ਪਰ ਤਵਾਂਗ ਅਤੇ ਗੁਹਾਟੀ ਦੇ ਵਿਚਾਲੇ ਅਗਲੇ ਤਿੰਨ ਦਿਨਾਂ ਤੱਕ ਕੋਈ ਹੈਲੀਕਾਪਟਰ ਸੇਵਾ ਨਹੀਂ ਹੈ। ਇਹ ਸੁਣਨ ਦੇ ਬਾਅਦ ਗਵਰਨਰ ਮਿਸ਼ਰਾ ਨੇ ਕਿਹਾ ਕਿ ਉਹ ਆਪਣੇ ਹੈਲੀਕਾਪਟਰ ਉਤੇ ਮਹਿਲਾ ਤੇ ਉਸ ਦੇ ਪਤੀ ਨੂੰ ਨਾਲ ਲੈ ਜਾਣਗੇ। ਜੋੜੇ ਲਈ ਹੈਲੀਕਾਪਟਰ ਵਿੱਚ ਜਗ੍ਹਾ ਬਣਾਉਣ ਲਈ ਗਵਰਨਰ ਨੇ ਆਪਣੇ ਦੋ ਅਧਿਕਾਰੀਆਂ ਨੂੰ ਤਵਾਂਗ ਵਿੱਚ ਛੱਡਣ ਦਾ ਫੈਸਲਾ ਲਿਆ। ਮਾਮਲਾ ਇਥੇ ਖਤਮ ਨਹੀਂ ਹੋਇਆ, ਮਿਸ਼ਰਾ ਦਾ ਹੈਲੀਕਾਪਟਰ ਅਸਮ ਦੇ ਤੇਜਪੁਰ ਵਿੱਚ ਤੇਲ ਭਰਨ ਨੂੰ ਉਤਰਿਆ। ਉਥੇ ਪਾਇਲਟ ਨੇ ਦੇਖਿਆ ਕਿ ਹੈਲੀਕਾਪਟਰ ਵਿੱਚ ਕੁਝ ਖਰਾਬੀ ਹੈ ਤੇ ਉਹ ਉੱਡ ਨਹੀਂ ਸਕਦਾ। ਮਹਿਲਾ ਦੀ ਹਾਲਤ ਤੋਂ ਪਰੇਸ਼ਾਨ ਗਵਰਨਰ ਨੇ ਤੇਜਪੁਰ ਦੇ ਹਵਾਈ ਫੌਜ ਬੇਸ ਦੇ ਕਮਾਂਡਿਗ ਅਫਸਰ ਤੋਂ ਦੂਸਰਾ ਹੈਲੀਕਾਪਟਰ ਮੰਗ ਲਿਆ ਅਤੇ ਮਹਿਲਾ ਅਤੇ ਉਸ ਦੇ ਪਤੀ ਨੂੰ ਰਵਾਨਾ ਕੀਤਾ। ਉਹ ਖੁਦ ਬਾਅਦ ਵਿੱਚ ਦੂਸਰੇ ਹੈਲੀਕਾਪਟਰ 'ਤੇ ਗਏ।