ਓਟਵਾ, 28 ਨਵੰਬਰ (ਪੋਸਟ ਬਿਊਰੋ) : ਫੈਡਰਲ ਸਰਕਾਰ ਦੇਸ਼ ਭਰ ਵਿੱਚ ਵਪਾਰ ਨਾਲ ਜੁੜੇ ਕੁੱਝ ਰੈਗੂਲੇਟਰੀ ਅੜਿੱਕਿਆਂ ਨੂੰ ਹਟਾਉਣ ਲਈ ਫੌਰੀ ਠੋਸ ਕਦਮ ਚੁੱਕ ਰਹੀ ਹੈ। ਸਰਕਾਰ ਇਹ ਆਸ ਵੀ ਕਰ ਰਹੀ ਹੈ ਕਿ ਪ੍ਰੋਵਿੰਸ ਵੀ ਇਸ ਮਿਸਾਲ ਨੂੰ ਅੱਗੇ ਤੋਰਨ।
ਸ਼ੁਰੂਆਤ ਕਰਨ ਵਾਲਿਆਂ ਲਈ ਸਰਕਾਰ ਨੈਸ਼ਨਲ ਬਿਲਡਿੰਗ ਕੋਡ ਮੁਫਤ ਕਰ ਰਹੀ ਹੈ, ਕੰਸਟ੍ਰਕਸ਼ਨ ਇੰਡਸਟਰੀ ਲਈ ਇੱਕ ਸੈੱਟ ਦੇ ਨਿਯਮਾਂ ਤੱਕ ਪਹੁੰਚ ਨੂੰ ਵੀ ਸੁਖਾਲਾ ਬਣਾਉਣ ਦੀ ਸਰਕਾਰ ਵੱਲੋਂ ਕੋਸਿ਼ਸ਼ ਕੀਤੀ ਜਾ ਰਹੀ ਹੈ। ਸਰਕਾਰ ਇਹ ਆਸ ਵੀ ਕਰ ਰਹੀ ਹੈ ਕਿ ਪ੍ਰੋਵਿੰਸਾਂ ਵੀ ਉਨ੍ਹਾਂ ਦੇ ਨਕਸ਼ੇ ਕਦਮਾਂ ਉੱਤੇ ਤੁਰਨ। ਇੱਥੇ ਦੱਸਣਾ ਬਣਦਾ ਹੈ ਕਿ ਕੋਡ ਨੂੰ ਡਾਊਨਲੋਡ ਕਰਨ ਉੱਤੇ ਹੀ 350 ਡਾਲਰ ਦੀ ਲਾਗਤ ਆਉਂਦੀ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਗਲੇ ਹਫਤੇ ਮੰਤਰੀਆਂ ਦੀ ਮੀਟਿੰਗ ਕਰਨ ਦੀ ਤਿਆਰੀ ਕਰ ਰਹੇ ਹਨ। ਇਸ ਮੀਟਿੰਗ ਦਾ ਮੁੱਖ ਏਜੰਡਾ ਪ੍ਰੋਵਿੰਸਾਂ ਦੇ ਵਿਚਾਲੇ ਮੌਜੂਦ ਟਰੇਡ ਅੜਿੱਕਿਆਂ ਨੂੰ ਖਤਮ ਕਰਨ ਉੱਤੇ ਜ਼ੋਰ ਦੇਣਾ ਹੋਵੇਗਾ। ਇੰਟਰਗਵਰਮੈਂਟਲ ਮਾਮਲਿਆਂ ਬਾਰੇ ਮੰਤਰੀ ਡੌਮੀਨਿਕ ਲੀਬਲਾਂਕ ਦਾ ਕਹਿਣਾ ਹੈ ਕਿ ਫੈਡਰਲ ਸਰਕਾਰ ਉਨ੍ਹਾਂ ਥਾਂਵਾਂ ਉੱਤੇ ਧਿਆਨ ਕੇਂਦਰਿਤ ਕਰ ਰਹੀ ਹੈ ਜਿੱਥੋਂ ਉਹ ਜਲਦ ਤੋਂ ਜਲਦ ਰੈਗੂਲੇਟਰੀ ਅੜਿੱਕਿਆਂ ਨੂੰ ਖਤਮ ਕਰ ਸਕੇ। ਇਨ੍ਹਾਂ ਕਾਰਨ ਹੀ ਪ੍ਰੋਵਿੰਸਾਂ ਤੇ ਟੈਰੇਟਰੀਜ਼ ਦਰਮਿਆ ਵਪਾਰ ਵਿੱਚ ਵਿਘਨ ਪੈਂਦਾ ਹੈ ਤੇ ਕਾਰੋਬਾਰਾਂ ਨੂੰ ਗੈਰਲੋੜੀਂਦੇ ਖਰਚੇ ਝੱਲਣੇ ਪੈਂਦੇ ਹਨ।
ਇਸ ਤੋਂ ਇਲਾਵਾ ਸਰਕਾਰ ਘਰਾਂ ਵਿੱਚ ਵਰਤੋਂ ਵਾਲੇ ਅਪਲਾਇੰਸਿਜ਼ ਉੱਤੇ ਫੈਡਰਲ ਐਨਰਜੀ ਐਫੀਸਿ਼ਐਂਸੀ ਰੈਗੂਲੇਸ਼ਜ ਼ਵਿੱਚ ਵੀ ਸੋਧ ਕਰ ਰਹੀ ਹੈ। ਇਸ ਦੇ ਨਾਲ ਹੀ ਫੂਡ ਲੇਬਲਿੰਗ ਨਿਯਮਾਂ ਨੂੰ ਵੀ ਸਪਸ਼ਟ ਕਰਨ ਦੀ ਕੋਸਿ਼ਸ ਕੀਤੀ ਜਾ ਰਹੀ ਹੈ ਤੇ ਮੀਟ ਦੀ ਜਾਂਚ ਸਬੰਧੀ ਰੈਗੂਲੇਸ਼ਨਜ਼ ਦਾ ਵੀ ਸਰਕਾਰ ਆਧੁਨਿਕੀਕਰਨ ਕਰਨ ਜਾ ਰਹੀ ਹੈ।