ਡਿਜੀਟਲ ਪਲੇਟਫਾਰਮ 'ਤੇ ਕਰਾਈਮ ਅਤੇ ਪੁਲਸ ਦੀ ਦੁਨੀਆ ਨੂੰ ਕਾਫੀ ਐਕਸਪਲੋਰ ਕੀਤਾ ਜਾ ਰਿਹਾ ਹੈ। ਇਸ ਲੜੀ ਵਿੱਚ ਉੱਤਰ ਪ੍ਰਦੇਸ਼ ਦੇ ਸਾਹਸੀ ਪੁਲਸ ਅਧਿਕਾਰੀ ਅਵਿਨਾਸ਼ ਮਿਸ਼ਰਾ ਦੀ ਜ਼ਿੰਦਗੀ 'ਤੇ ਵੈੱਬ ਸੀਰੀਜ਼ ‘ਇੰਸਪੈਕਟਰ ਅਵਿਨਾਸ਼’ ਬਣਾਉਣ ਦੀ ਤਿਆਰੀ ਹੈ। ਉਸ ਵਿੱਚ ਅਵਿਨਾਸ਼ ਦੀ ਭੂਮਿਕਾ ਰਣਦੀਪ ਹੁੱਡਾ ਨਿਭਾਉਣਗੇ। ਜੀਓ ਸਟੂਡੀਓ ਦੇ ਨਿਰਮਾਣ ਵਾਲੀ ਇਸ ਵੈਬ ਸੀਰੀਜ ਦਾ ਨਿਰਦੇਸ਼ਨ ਨੀਰਜ ਪਾਠਕ ਕਰਨਗੇ। ਸ਼ੂਟਿੰਗ ਦਸੰਬਰ ਤੋਂ ਸ਼ੁਰੂ ਹੋਵੇਗੀ। ਹਮੀਰਪੁਰ ਨਾਲ ਸੰਬੰਧ ਰੱਖਣ ਵਾਲੇ ਅਵਿਨਾਸ਼ ਮਿਸ਼ਰਾ ਖਤਰਨਾਕ ਗੈਂਗਸਟਰ ਸ੍ਰੀਪ੍ਰਕਾਸ਼ ਸ਼ੁਕਲਾ ਦੇ ਐਨਕਾਊਂਟਰ ਟੀਮ ਵਿੱਚ ਸ਼ਾਮਲ ਰਹੇ ਹਨ।
ਨੀਰਜ ਮੁਤਾਬਕ ‘‘ਅਵਿਨਾਸ਼ ਐੱਸ ਟੀ ਐਫ ਵਿੱਚ ਲੰਮਾ ਸਮਾਂ ਰਹੇ। ਬਾਅਦ ਵਿੱਚ ਅੱਤਵਾਦ ਵਿਰੋਧੀ ਦਸਤੇ (ਏ ਟੀ ਐੱਸ) ਵਿੱਚ ਰਹਿੰਦੇ ਹੋਏ ਪੁਲਸ ਮੁਖੀ ਵਜੋਂ ਰਿਟਾਇਰ ਹੋਏ। ਉਨ੍ਹਾਂ ਨੂੰ ‘ਗੁਰੂ ਜੀ’ ਦੇ ਤੌਰ 'ਤੇ ਸੰਬੋਧਨ ਕੀਤਾ ਜਾਂਦਾ ਹੈ। ਮੇਰੀ ਉਨ੍ਹਾਂ ਨਾਲ ਮੁਲਾਕਾਤ ਤਿੰਨ ਸਾਲ ਪਹਿਲਾਂ ਹੋਈ ਸੀ। ਮੈਨੂੰ ਉਨ੍ਹਾਂ ਦਾ ਵਿਅਕਤੀਤਵ ਬਹੁਤ ਪ੍ਰਭਾਵੀ ਲੱਗਾ ਸੀ। ਦੋ-ਤਿੰਨ ਮੁਲਾਕਾਤਾਂ ਦੇ ਬਾਅਦ ਮੈਨੂੰ ਲੱਗਾ ਕਿ ਉਨ੍ਹਾਂ 'ਤੇ ਫਿਲਮ ਜਾਂ ਵੈੱਬ ਸੀਰੀਜ਼ ਬਣਨੀ ਚਾਹੀਦੀ ਹੈ। ਉਨ੍ਹਾਂ ਨੇ ਇਸ ਦੀ ਇਜਾਜ਼ਤ ਦੇ ਦਿੱਤੀ। ਇਸ ਦੇ ਇਲਾਵਾ ਉਨ੍ਹਾਂ ਦੀ ਜ਼ਿੰਦਗੀ 'ਤੇ ਕਿਤਾਬ ਲਿਖੀ ਜਾ ਰਹੀ ਹੈ। ਉਸ ਨੂੰ ਵੀ ਵੈਬ ਸੀਰੀਜ਼ ਦੇ ਨਾਲ ਰਿਲੀਜ਼ ਕਰਨ ਦੀ ਯੋਜਨਾ ਹੈ। ਸ਼ੋਅ ਨੂੰ ਅਗਲੇ ਸਾਲ ਰਿਲੀਜ਼ ਕੀਤਾ ਜਾਏਗਾ।”