ਮੁੰਬਈ, 30 ਨਵੰਬਰ (ਪੋਸਟ ਬਿਊਰੋ)- ਮਰਹੂਮ ਸੰਗੀਤਕਾਰ ਵਾਜਿਦ ਖਾਨ ਦੀ ਪਤਨੀ ਕਮਲਰੁਖ ਖਾਨ ਦਾ ਦਾਅਵਾ ਹੈ ਕਿ ਇਸਲਾਮ ਗ੍ਰਹਿਣ ਕਰਨ ਤੋਂ ਇਨਕਾਰ ਕਰਨ `ਤੇ ਉਸ ਦੇ ਸੱਸ-ਸਹੁਰੇ ਨੇ ਉਸ ਨੂੰ ‘ਭੈਅ ਭੀਤ ਕਰਨ ਦੀ ਰਣਨੀਤੀ` ਅਪਣਾ ਕੇ ਨਿਖੇੜਨ ਦੀ ਕੋਸ਼ਿਸ਼ ਕੀਤੀ ਸੀ। ਵਰਨਣ ਯੋਗ ਹੈ ਕਿ ਸੰਗੀਤਕਾਰ ਸਾਜਿਦ-ਵਾਜਿਦ ਦੀ ਜੋੜੀ ਵਾਲੇ ਵਾਜਿਦ ਖਾਨ ਦਾ ਇਸ ਸਾਲ ਜੂਨ ਵਿੱਚ ਦਿਹਾਂਤ ਹੋ ਗਿਆ ਸੀ।
ਇੰਸਟਾਗ੍ਰਾਮ ਦੇ ਰਾਹੀਂ ਆਪਣਾ ਅਨੁਭਵ ਸਾਂਝਾ ਕਰਦੇ ਹੋਏ ਕਮਲਰੁਖ ਨੇ ਕਿਹਾ ਕਿ ਉਹ ਪਾਰਸੀ ਹੈ ਅਤੇ ਉਸ ਨੇ ‘ਦਬੰਗ` ਫਿਲਮ ਦੇ ਸੰਗੀਤਕਾਰ ਨਾਲ ਸਪੈਸ਼ਲ ਮੈਜਿਰ ਐਕਟ ਹੇਠ ਵਿਆਹ ਕੀਤਾ ਸੀ। ਸੋਸ਼ਲ ਮੀਡੀਆ ਉੱਤੇ ਦਿੱਤੀ ਜਾਣਕਾਰੀ ਮੁਤਾਬਕ ਕਮਲਰੁਖ ਮਾਨਸਿਕ ਰੋਗਾਂ ਦੀ ਮਾਹਰ ਹੈ। ਉਸਨੇ ਇੱਕ ਲੰਬੀ ਪੋਸਟ ਵਿੱਚ ਕਿਹਾ ਹੈ ਕਿ ਉਹ ਉਸ ਪਰਵਾਰ ਵਿੱਚ ਪਲੀ ਅਤੇ ਵੱਡੀ ਹੋਈ ਹੈ, ਜਿੱਥੇ ਸਿੱਖਿਆ, ਵਿਚਾਰਾਂ ਦੀ ਆਜ਼ਾਦੀ ਅਤੇ ਲੋਕਤੰਤਰਿਕ ਕਦਰਾਂ-ਕੀਮਤਾਂ ਨੂੰ ਹੱਲਾਸ਼ੇਰੀ ਦਿੱਤੀ ਜਾਂਦੀ ਹੈ, ਪਰ ਇਹ ਸਭ ਉਸ ਦੇ ਪਤੀ ਦੇ ਪਰਵਾਰ ਨਾਲ ਮੇਲ ਨਹੀਂ ਖਾਂਦਾ ਸੀ।ਕਮਲਰੁਖ ਦਾ ਦਾਅਵਾ ਹੈ ਕਿ ਉਨ੍ਹਾਂ ਨੂੰ ਪੜ੍ਹੀ ਲਿਖੀ ਤੇ ਆਜ਼ਾਦ ਵਿਚਾਰਾਂ ਵਾਲੀ ਮਹਿਲਾ ਸਵੀਕਾਰ ਨਹੀਂ ਸੀ ਅਤੇ ਧਰਮ ਪਰਿਵਰਤਨ ਦੇ ਦਬਾਅ ਦਾ ਵਿਰੋਧ ਕਰਨਾ ਪਾਪ ਵਾਂਗ ਸੀ, ਜਦ ਕਿ ਮੈਂ ਹਮੇਸ਼ਾ ਸਾਰੇ ਉਤਸਵਾਂ ਦਾ ਸਨਮਾਨ ਕੀਤਾ, ਵੱਧ-ਚੜ੍ਹ ਕੇ ਹਿੱਸਾ ਲਿਆ। ਉਸ ਨੇ ਕਿਹਾ ਕਿ ਧਰਮ ਪਰਿਵਰਤਨ ਤੋਂ ਇਨਕਾਰ ਕਰਨਾ, ਮੇਰੇ ਤੇ ਮੇਰੇ ਪਤੀ ਵਿੱਚ ਦੂਰੀਆਂ ਵਧਣ ਦਾ ਕਾਰਨ ਬਣਨ ਲੱਗਾ ਅਤੇ ਪਤੀ-ਪਤਨੀ ਦੇ ਸੰਬੰਧਾਂ ਦੇ ਤੌਰ `ਤੇ ਇਸ ਨੂੰ ਬਰਬਾਦ ਕਰਨ ਦੇ ਲਈ ਜ਼ਹਿਰ ਭਰਿਆ ਗਿਆ।