* ਕੋਵਿਡ ਮਰੀਜ਼ਾਂ ਸਮੇਤ ਪੱਛਮੀ ਏਸ਼ੀਆ ਤੋਂ ਸੁਰੱਖਿਅਤ ਕੱਢੇ ਗਏ
ਨਵੀਂ ਦਿੱਲੀ, 30 ਨਵੰਬਰ (ਪੋਸਟ ਬਿਊਰੋ)- ਇੱਕਵਿਸ਼ੇਸ਼ ਬਚਾਓ ਮੁਹਿੰਮ ਦੌਰਾਨ ਪੱਛਮੀ ਏਸ਼ੀਆ ਦੇ ਇੱਕ ਦੇਸ਼ ਵਿੱਚ ਫਸੇ ਭਾਰਤੀ ਵਿਗਿਆਨੀਆਂ ਨੂੰ ਭਾਰਤੀ ਹਵਾਈ ਫੌਜ ਸੁਰੱਖਿਅਤ ਕੱਢ ਲੈ ਕੇ ਆਈ ਹੈ। ਇਹ ਮੁਹਿੰਮ ਇਸ ਪੱਖੋਂ ਖਾਸ ਸੀ ਕਿ ਇਨ੍ਹਾਂ ਵਿੱਚੋਂ ਕੁਝ ਵਿਗਿਆਨੀ ਕੋਵਿਡ-19 ਨਾਲ ਇਨਫੈਕਟਿਡ ਸਨ।ਉਨ੍ਹਾਂ ਸਾਰਿਆਂ ਨੂੰ ਇਕੱਠਿਆਂ ਸੁਰੱਖਿਅਤ ਲਿਆਉਣ ਦੇ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਅਤੇ ਵਿਸ਼ੇਸ਼ ਸੀ-17 ਗਲੋਬਮਾਸਟਰ ਜਹਾਜ਼ ਨਾਲ ਏਅਰਲਿਫਟ ਕੀਤਾ ਗਿਆ ਹੈ। ਇਨ੍ਹਾਂ ਸਭ ਨੂੰ ਦੱਖਣੀ ਭਾਰਤ ਦੇ ਇੱਕ ਏਅਰਪੋਰਟ `ਤੇ ਲੈਂਡ ਕਰਵਾ ਕੇ ਕੁਆਰੰਟਾਈਨ ਕੀਤਾ ਗਿਆ ਹੈ।
ਜਾਣਕਾਰ ਸੂਤਰਾਂ ਮੁਤਾਬਕ ਹਵਾਈ ਫੌਜ ਦੀ ਸੀ-17 ਸਕਵਾਰਡਨ ਨੂੰ ਇਹੋ ਜਿਹੀਆਂ ਘਟਨਾਵਾਂ ਲਈ ਪਹਿਲਾਂ ਤੋਂ ਤਿਆਰ ਕੀਤਾ ਗਿਆ ਸੀ। ਹਰ ਕਿਸਮ ਦੀ ਕਲੀਅਰੈਂਸਤੋਂ ਬਾਅਦ ਨਵੰਬਰ ਦੇ ਪਹਿਲੇ ਹਫਤੇ ਵਿੱਚ ਸੀ-17 ਜਹਾਜ਼ ਭਾਰਤ ਤੋਂ ਉੱਡਿਆ। ਭਾਰਤੀ ਅਧਿਕਾਰੀਆਂ ਨੇ ਸਭ ਰਸਮੀ ਕਾਰਵਾਈਆਂ ਪੂਰੀਆਂ ਕਰ ਕੇ 50 ਭਾਰਤੀ ਵਿਗਿਆਨੀਆਂ ਨੂੰ ਜਹਾਜ਼ ਤਕ ਪਹੁੰਚਾਇਆ ਤੇ ਕੋਵਿਡ ਦੇ ਮਰੀਜ਼ਾਂ ਲਈ ਜਹਾਜ਼ ਵਿੱਚ ਵੱਖਰਾ ਕੰਪਾਰਟਮੈਂਟ ਬਣਾਇਆ ਗਿਆ। ਦੋ ਘੰਟੇ ਬਾਅਦ ਜਹਾਜ਼ ਉਥੋਂ ਦੇ ਏਅਰਪੋਰਟ ਤੋਂਚੱਲਿਆ ਅਤੇ ਫਿਰ ਇਨ੍ਹਾਂ ਵਿਗਿਆਨੀਆਂ ਨੂੰ ਦੱਖਣੀ ਭਾਰਤ ਵਿੱਚ ਕਿਸੇ ਥਾਂ ਲੈਂਡ ਕਰਵਾਇਆ ਗਿਆ। ਇਸ ਪੂਰੀ ਮੁਹਿੰਮ ਵਿੱਚ ਕੁੱਲ 20 ਘੰਟੇ ਦਾ ਸਮਾਂ ਲੱਗਾ।
ਭਾਰਤੀ ਹਵਾਈ ਫੌਜ ਨੇ ਅਫਸਰਾਂ ਅਤੇ ਬਚਾਏ ਗਏ ਵਿਗਿਆਨੀਆਂ ਦਾ ਵੇਰਵਾ ਨਹੀਂ ਦਿੱਤਾ ਅਤੇ ਘਟਨਾਕ੍ਰਮ ਦੀ ਪੁਸ਼ਟੀ ਵੀ ਨਹੀਂ ਕੀਤੀ। ਦੱਸਿਆ ਗਿਆ ਕਿ ਮੁਹਿੰਮ ਵਿੱਚ ਸ਼ਾਮਲ ਹਵਾਈ ਫੌਜ ਦੇ ਅਫਸਰਾਂ ਅਤੇ ਹੋਰ ਲੋਕਾਂ ਨੂੰ ਮੁਹਿੰਮ ਤੋਂ ਬਾਅਦ ਕੁਆਰੰਟਾਈਨ ਕਰਵਾਇਆ ਗਿਆ ਹੈ। ਜਾਣਕਾਰ ਸੂਤਰਾਂ ਦਾ ਕਹਿਣਾ ਹੈ ਕਿ ਇਹ ਸਾਰੇ ਭਾਰਤੀ ਵਿਗਿਆਨੀ ਭਾਰਤ ਅਤੇ ਪੱਛਮੀ ਏਸ਼ੀਆ ਦੇ ਇੱਕ ਦੇਸ਼ ਵਿਚਾਲੇ ਹੋਏ ਸਮਝੌਤੇ ਹੇਠ ਉਸ ਦੇਸ਼ ਵਿੱਚ ਗਏ ਸਨ। ਜਦੋਂ ਪਤਾ ਲੱਗਾ ਕਿ ਕੁਝ ਭਾਰਤੀ ਵਿਗਿਆਨੀ ਉਸ ਦੇਸ਼ ਵਿੱਚ ਕੋਰੋਨਾ ਤੋਂ ਇਨਫੈਕਟਿਡ ਹੋ ਗਏ ਹਨਉਨ੍ਹਾਂ ਸਾਰਿਆਂ ਨੂੰ ਵਾਪਸ ਲਿਆਉਣ ਦੇ ਪ੍ਰਬੰਧ ਕੀਤੇ ਗਏ। ਇਨ੍ਹਾਂ ਵਿਗਿਆਨੀਆਂ ਦੀ ਵਾਪਸੀ ਲਈ ਉਸ ਦੇਸ਼ ਵਿੱਚ ਮੌਜੂਦ ਭਾਰਤੀ ਦੂਤਘਰ ਨੇ ਹਵਾਈ ਫੌਜ ਨੂੰ ਕੋਵਿਡ ਮਰੀਜ਼ਾਂ ਸਮੇਤ ਭਾਰਤੀ ਵਿਗਿਆਨੀਆਂ ਨੂੰ ਵਾਪਸ ਲਿਆਉਣ ਲਈ ਕਿਹਾ। ਇਸ ਤੋਂ ਪਹਿਲਾਂ ਵੀ ਭਾਰਤੀ ਹਵਾਈ ਫੌਜ ਭਾਰਤੀ ਨਾਗਰਿਕਾਂ ਨੂੰ ਚੀਨ ਦੇ ਵੁਹਾਨ ਸ਼ਹਿਰ ਅਤੇ ਦੁਨੀਆ ਦੇ ਹੋਰ ਹਿੱਸਿਆਂ ਤੋਂ ਭਾਰਤ ਲਿਆ ਚੁੱਕੀ ਹੈ।