ਨਵੀਂ ਦਿੱਲੀ, 29 ਨਵੰਬਰ (ਪੋਸਟ ਬਿਊਰੋ)- ਸਿੱਖ ਰੈਜੀਮੈਂਟ ਦੀ 6ਵੀਂ ਬਟਾਲੀਅਨ ਨੇ ਰਾਸ਼ਟਰਪਤੀ ਭਵਨ ਦੇ ਗਾਰਡ ਦਾ ਚਾਰਜ ਸੰਭਾਲ ਲਿਆ ਹੈ। ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਨੇ ਬੀਤੇ ਦਿਨੀਂ ਰਾਸ਼ਟਰਪਤੀ ਭਵਨ ਵਿੱਚ ਤੈਨਾਤ ਆਰਮੀ ਗਾਰਡ ਬਦਲਾਅ ਦੇ ਇਸ ਮਹੱਤਵ ਪੂਰਨ ਸਮਾਗਮ ਨੂੰ ਖੁਦ ਵੇਖਿਆ।
ਅਧਿਕਾਰਤ ਬਿਆਨ ਮੁਤਾਬਕ ਪਹਿਲੀ ਗੋਰਖਾ ਰਾਈਫਲਜ਼ ਦੀ ਪੰਜਵੀਂ ਬਟਾਲੀਅਨ ਨੇ ਰਸਮੀ ਆਰਮੀ ਗਾਰਡ ਬਟਾਲੀਅਨ ਵਜੋਂ ਸਾਢੇ ਤਿੰਨ ਸਾਲ ਦਾ ਸਮਾਂ ਪੂਰਾ ਕਰਨ ਦੇ ਬਾਅਦ ਸਿੱਖ ਰੈਜੀਮੈਂਟ ਦੀ 6ਵੀਂ ਬਟਾਲੀਅਨ ਨੂੰ ਚਾਰਜ ਦੇ ਦਿਤਾ। ਫੌਜ ਦੀਆਂ ਵੱਖ-ਵੱਖ ਯੂਨਿਟਾਂ ਵਾਰੀ ਨਾਲ ਇਹ ਕੰਮ ਕਰਦੀਆਂ ਹਨ।ਰਾਸ਼ਟਰਪਤੀ ਭਵਨ ਨੇ ਬਿਆਨ ਜਾਰੀ ਕਰ ਕੇ ਕਿਹਾ ਕਿ ਆਰਮੀ ਗਾਰਡ ਬਟਾਲੀਅਨ ਵੱਖ-ਵੱਖ ਮਹੱਤਵਪੂਰਨ ਸਮਾਗਮਾਂ ਜਿਵੇਂ ਪ੍ਰਮੁੱਖ ਹਸਤੀਆਂ ਨੂੰ ਗਾਰਡ ਆਫ ਆਨਰ ਦੇਣਾ, ਗਣਤੰਤਰ ਦਿਵਸ ਪਰੇਡ, ਸੁਤੰਤਰਤਾ ਦਿਵਸ ਪਰੇਡ, ਬੀਟਿੰਗ ਰਿਟਰੀਟ ਸਮਾਗਮ ਆਦਿ ਵਿੱਚ ਰਸਮੀ ਕਰਤੱਵ ਵੀ ਨਿਭਾਉਂਦੇ ਹਨ ਅਤੇ ਇਹ ਮਾਣ ਵਾਲੀ ਜਿ਼ਮੇਵਾਰੀ ਸਮਝੀ ਜਾਂਦੀ ਹੈ।