ਓਟਵਾ, 27 ਨਵੰਬਰ (ਪੋਸਟ ਬਿਊਰੋ) : ਆਪਣੀ ਬਰੈਂਪਟਨ ਈਸਟ ਵਾਲੀ ਸੀਟ ਤੋਂ ਅਸਤੀਫਾ ਦੇਣ ਲਈ ਲਿਬਰਲ ਐਮਪੀ ਰਾਜ ਗਰੇਵਾਲ ਨੇ ਅਜੇ ਸਹੀ ਪਾਰਲੀਆਮੈਂਟਰੀ ਪ੍ਰਕਿਰਿਆ ਨਹੀਂ ਅਪਣਾਈ।ਇਸ ਕਾਰਨ ਉਹ ਇਸ ਹਲਕੇ ਤੋਂ ਐਮਪੀ ਬਣੇ ਰਹਿਣਗੇ। ਇਸ ਦੀ ਪੁਸ਼ਟੀ ਇਲੈਕਸ਼ਨਜ਼ ਕੈਨੇਡਾ ਵੱਲੋਂ ਕੀਤੀ ਗਈ।
ਇਸ ਤੋਂ ਪਹਿਲਾਂ 22 ਨਵੰਬਰ ਨੂੰ ਰਾਜ ਗਰੇਵਾਲ ਨੇ ਇਹ ਐਲਾਨ ਕੀਤਾ ਸੀ ਕਿ ਉਨ੍ਹਾਂ ਵੱਲੋਂ ਆਪਣੇ ਅਸਤੀਫੇ ਦੇ ਸਬੰਧ ਵਿੱਚ ਨੋਟਿਸ ਦਿੱਤਾ ਜਾ ਚੁੱਕਿਆ ਹੈ ਪਰ ਉਹ ਸਹੀ ਢੰਗ ਨਾਲ ਇਸ ਲਈ ਅਪਣਾਈ ਜਾਣ ਵਾਲੀ ਪ੍ਰਕਿਰਿਆ ਪੂਰੀ ਨਹੀਂ ਕਰ ਸਕੇ। ਇਲੈਕਸ਼ਨ ਕੈਨੇਡਾ ਦੇ ਬੁਲਾਰੇ ਨੇ ਆਖਿਆ ਕਿ ਬਰੈਂਪਟਨ ਈਸਟ ਤੋਂ ਸਾਨੂੰ ਕੋਈ ਵਾਰੰਟ ਹਾਸਲ ਨਹੀਂ ਹੋਇਆ ਹੈ।
22 ਨਵੰਬਰ ਨੂੰ ਗਰੇਵਾਲ ਨੇ ਫੇਸਬੁੱਕ ਉੱਤੇ ਇਹ ਚਿੱਠੀ ਪੋਸਟ ਕੀਤੀ ਸੀ ਕਿ ਉਨ੍ਹਾਂ ਵੱਲੋਂ ਅਸਤੀਫਾ ਦੇਣ ਦੇ ਆਪਣੇ ਫੈਸਲੇ ਬਾਰੇ ਸਰਕਾਰੀ ਵ੍ਹਿਪ ਮਾਰਕ ਹੌਲੈਂਡ ਨੂੰ ਜਾਣਕਾਰੀ ਦਿੱਤੀ ਜਾ ਚੁੱਕੀ ਹੈ ਤੇ ਉਹ ਨਿਜੀ ਤੇ ਮੈਡੀਕਲ ਕਾਰਨਾਂ ਕਰਕੇ ਅਸਤੀਫਾ ਦੇ ਰਹੇ ਹਨ। ਪਰ ਬਾਅਦ ਵਿੱਚ ਪ੍ਰਧਾਨ ਮੰਤਰੀ ਦੇ ਆਫਿਸ ਵੱਲੋਂ ਇਹ ਪੁਸ਼ਟੀ ਕੀਤੀ ਗਈ ਕਿ ਗਰੇਵਾਲ ਜੂਏ ਦੀ ਲਤ ਕਾਰਨ ਇਹ ਅਸਤੀਫਾ ਦੇ ਰਹੇ ਹਨ।
ਅਸਤੀਫਾ ਦੇਣ ਲਈ ਪਾਰਲੀਆਮੈਂਟਰੀ ਪ੍ਰਕਿਰਿਆ ਅਨੁਸਾਰ ਜਿਹੜਾ ਐਮਪੀ ਅਸਤੀਫਾ ਦੇਣਾ ਚਾਹੁੰਦਾ ਹੈ ਉਸ ਨੂੰ ਜਾਂ ਤਾਂ ਹਾਊਸ ਆਫ ਕਾਮਨਜ਼ ਵਿੱਚ ਇਸ ਸਬੰਧ ਵਿੱਚ ਬਿਆਨ ਦੇਣਾ ਹੁੰਦਾ ਹੈ ਤੇ ਜਾਂ ਫਿਰ ਆਪਣੇ ਅਸਤੀਫੇ ਬਾਰੇ ਲਿਖਤੀ ਤੌਰ ਉੱਤੇ ਸਪੀਕਰ ਨੂੰ ਇਸ ਫੈਸਲੇ ਬਾਰੇ ਦੱਸਣਾ ਹੁੰਦਾ ਹੈ। ਸਬੰਧਤ ਐਮਪੀ ਤੋਂ ਨੋਟਿਸ ਮਿਲਣ ਤੋਂ ਬਾਅਦ ਸਪੀਕਰ ਚੀਫ ਇਲੈਕਟੋਰਲ ਆਫਿਸਰ ਨੂੰ ਇਸ ਬਾਰੇ ਜਾਣਕਾਰੀ ਦਿੰਦੇ ਹਨ। ਜਿਸ ਤੋਂ ਬਾਅਦ ਇਲੈਕਸ਼ਨ ਕੈਨੇਡਾ ਰਸਮੀ ਤੌਰ ਉੱਤੇ ਸੀਟ ਨੂੰ ਖਾਲੀ ਐਲਾਨਦੀ ਹੈ ਤੇ ਜਿ਼ਮਨੀ ਚੋਣ ਲਈ ਰਿੱਟ ਜਾਰੀ ਕਰਦੀ ਹੈ। ਪਰ ਗਰੇਵਾਲ ਵੱਲੋਂ ਇਹ ਸ਼ਰਤਾਂ ਪੂਰੀਆਂ ਨਹੀਂ ਕੀਤੀਆਂ ਗਈਆਂ ਜਦੋਂ ਉਨ੍ਹਾਂ ਵੱਲੋਂ ਹੌਲੈਂਡ ਨੂੰ ਦੱਸਿਆ ਗਿਆ।
ਕੰਜ਼ਰਵੇਟਿਵ ਵ੍ਹਿਪ ਮਾਰਕ ਸਟਰਾਹਲ ਤੇ ਐਨਡੀਪੀ ਐਮਪੀ ਨਥਾਨ ਕੁਲਨ ਵੱਲੋਂ ਹਾਊਸ ਆਫ ਕਾਮਨਜ਼ ਦੇ ਸਪੀਕਰ ਜੈੱਫ ਰੀਗਨ ਨੂੰ ਗਰੇਵਾਲ ਦੇ ਅਸਤੀਫੇ ਸਬੰਧੀ ਸਥਿਤੀ ਸਪਸ਼ਟ ਕਰਨ ਲਈ ਆਖਿਆ ਗਿਆ। ਜਿਸ ਦੇ ਉੱਤਰ ਵਜੋਂ ਉਨ੍ਹਾਂ ਦੱਸਿਆ ਕਿ ਇਸ ਸਬੰਧ ਵਿੱਚ ਉਨ੍ਹਾਂ ਨੂੰ ਕੋਈ ਨੋਟੀਫਿਕੇਸ਼ਨ ਨਹੀਂ ਮਿਲਿਆ ਹੈ।