ਵਾਸ਼ਿੰਗਟਨ, 23 ਨਵੰਬਰ (ਪੋਸਟ ਬਿਊਰੋ) : ਅਮਰੀਕਾ ਦੇ ਨਵੇਂ ਚੁਣੇ ਗਏ ਰਾਸ਼ਟਰਪਤੀ ਜੋਅ ਬਾਇਡਨ ਵੱਲੋਂ ਵਿਦੇਸ਼ ਮੰਤਰੀ ਵਜੋਂ ਐਂਟਨੀ ਬਲਿੰਕਨ ਨੂੰ ਚੁਣੇ ਜਾਣ ਦੀ ਸੰਭਾਵਨਾ ਹੈ| ਇਹ ਖੁਲਾਸਾ ਬਾਇਡਨ ਦੀ ਟੀਮ ਸਬੰਧੀ ਯੋਜਨਾ ਬਾਰੇ ਸਮਝ ਰੱਖਣ ਵਾਲੇ ਕਈ ਲੋਕਾਂ ਨੇ ਕੀਤਾ|
58 ਸਾਲਾ ਬਲਿੰਕਨ ਓਬਾਮਾ ਪ੍ਰਸਾਸਨ ਦੌਰਾਨ ਡਿਪਟੀ ਵਿਦੇਸ਼ ਮੰਤਰੀ ਤੇ ਡਿਪਟੀ ਨੈਸ਼ਨਲ ਸਕਿਊਰਿਟੀ ਐਡਵਾਈਜ਼ਰ ਦੀ ਭੂਮਿਕਾ ਨਿਭਾਅ ਚੁੱਕੇ ਹਨ ਤੇ ਉਨ੍ਹਾਂ ਦੇ ਬਾਇਡਨ ਨਾਲ ਵੀ ਨੇੜਲੇ ਸਬੰਧ ਹਨ| ਜੇ ਉਨ੍ਹਾਂ ਨੂੰ ਨਾਮਜਦ ਕੀਤੇ ਜਾਣ ਤੋਂ ਬਾਅਦ ਉਨ੍ਹਾਂ ਦੇ ਨਾਂ ਦੀ ਪੁਸ਼ਟੀ ਵੀ ਹੋ ਜਾਂਦੀ ਹੈ ਤਾਂ ਅਮਰੀਕਾ ਦੇ ਪੂਰੀ ਦੁਨੀਆਂ ਨਾਲ ਸਬੰਧਾਂ ਦੀ ਦਿਸ਼ਾ ਤੈਅ ਕਰਨ ਵਿੱਚ ਉਹ ਕਾਫੀ ਅਹਿਮ ਭੂਮਿਕਾ ਨਿਭਾਅ ਸਕਦੇ ਹਨ|
ਬਲਿੰਕਨ ਨੂੰ ਨਾਮਜਦ ਕਰਨ ਨਾਲ ਬਾਇਡਨ ਦੋ ਹੋਰਨਾਂ ਉਮੀਦਵਾਰਾਂ ਸੂਜ਼ਨ ਰਾਈਸ ਤੇ ਸੈਨੇਟਰ ਕ੍ਰਿਸ ਕੂਨਜ਼ ਨੂੰ ਆਪਣਾ ਪੱਲਾ ਫੜਾਉਂਦੇ ਨਜ਼ਰ ਨਹੀਂ ਆ ਰਹੇ| ਬਾਇਡਨ ਵੱਲੋਂ ਆਪਣੇ ਮੰਤਰੀ ਮੰਡਲ ਦੇ ਨਾਂਵਾਂ ਦਾ ਖੁਲਾਸਾ ਹੌਲੀ ਹੌਲੀ ਕਿਸ਼ਤਾਂ ਵਿੱਚ ਕੀਤੇ ਜਾਣ ਦੀ ਸੰਭਾਵਨਾ ਹੈ| ਪਰ ਅਰਥਚਾਰੇ, ਨੈਸ਼ਨਲ ਸਕਿਊਰਿਟੀ ਤੇ ਪਬਲਿਕ ਹੈਲਥ ਲਈ ਨਾਂਵਾਂ ਦਾ ਖੁਲਾਸਾ ਇੱਕੋ ਵਾਰੀ ਕੀਤਾ ਜਾ ਸਕਦਾ ਹੈ|