ਓਨਟਾਰੀਓ, 15 ਨਵੰਬਰ (ਪੋਸਟ ਬਿਊਰੋ) : ਵਾਇਰਸ ਨੂੰ ਫੈਲਣ ਤੋਂ ਰੋਕਣ ਲਈ ਪੀਲ ਰੀਜਨ ਵਿੱਚ ਨਿਯਮਾਂ ਨੂੰ ਅੱਖੋਂ ਪਰੋਖੇ ਕਰਨ ਵਾਲਿਆਂ ਲਈ ਆਉਣ ਵਾਲੇ ਹਫਤਿਆਂ ਵਿੱਚ ਸਖ਼ਤ ਜੁਰਮਾਨੇ ਲਾਏ ਜਾਣਗੇ| ਓਨਟਾਰੀਓ ਵਿੱਚ ਇੱਕ ਦਿਨ ਦੇ ਅੰਦਰ ਕੋਵਿਡ-19 ਦੇ ਨਵੇਂ ਮਾਮਲਿਆਂ ਵਿੱਚ ਹੋਏ ਰਿਕਾਰਡ ਵਾਧੇ ਤੋਂ ਬਾਅਦ ਸ਼ਨਿੱਚਰਵਾਰ ਨੂੰ ਰੀਜਨ ਦੇ ਉੱਘੇ ਡਾਕਟਰ ਨੇ ਇਹ ਐਲਾਨ ਕੀਤਾ|
ਪੀਲ ਰੀਜਨ ਦੇ ਚੀਫ ਮੈਡੀਕਲ ਆਫੀਸਰ ਆਫ ਹੈਲਥ ਡਾæ ਲਾਰੈਂਸ ਲੋਹ ਨੇ ਦੱਸਿਆ ਕਿ ਇਨ੍ਹਾਂ ਨਿਯਮਾਂ ਦੀ ਉਲੰਘਣਾਂ ਕਰਨ ਵਾਲੇ ਕਾਰੋਬਾਰਾਂ ਨੂੰ 5000 ਡਾਲਰ ਤੱਕ ਦਾ ਜੁਰਮਾਨਾ ਹੋ ਸਕੇਗਾ| ਕੰਮ ਵਾਲੀਆਂ ਥਾਂਵਾਂ ਉੱਤੇ ਹੋ ਰਹੀਆਂ ਆਊਟਬ੍ਰੇਕਸ ਅਚਾਨਕ ਵੱਧ ਜਾਣ ਕਾਰਨ ਇਨ੍ਹਾਂ ਮਾਮਲਿਆਂ ਦੀ ਗਿਣਤੀ ਵਿੱਚ ਵਾਧਾ ਦਰਜ ਕੀਤਾ ਗਿਆ ਹੈ| ਪਿਛਲੇ 24 ਘੰਟਿਆਂ ਵਿੱਚ ਪ੍ਰੋਵਿੰਸ ਭਰ ਵਿੱਚ ਕੋਵਿਡ-19 ਦੇ ਦਰਜ ਕੀਤੇ ਗਏ 1581 ਮਾਮਲਿਆਂ ਵਿੱਚੋਂ 497 ਨਵੇਂ ਮਾਮਲੇ ਇੱਕਲੇ ਪੀਲ ਵਿੱਚ ਹੀ ਪਾਏ ਗਏ ਹਨ| ਇਸ ਤੋਂ ਬਾਅਦ ਹੀ ਲੋਹ ਵੱਲੋਂ ਜੁਰਮਾਨੇ ਲਾਉਣ ਵਾਲਾ ਨਵਾਂ ਪਬਲਿਕ ਹੈਲਥ ਸਿਸਟਮ ਲਿਆਉਣ ਦਾ ਫੈਸਲਾ ਕੀਤਾ ਗਿਆ ਹੈ|
ਸ਼ਨਿੱਚਰਵਾਰ ਨੂੰ ਪੀਲ ਰੀਜਨ ਨੇ ਆਖਿਆ ਕਿ ਪਹਿਲੀ ਸਤੰਬਰ ਤੋਂ 13 ਨਵੰਬਰ ਤੱਕ ਕੰਮ ਵਾਲੀਆਂ ਥਾਂਵਾਂ ਉੱਤੇ 116 ਆਊਟਬ੍ਰੇਕਸ ਰਿਕਾਰਡ ਕੀਤੀਆਂ ਗਈਆਂ| ਰੀਜਨ ਨੇ ਆਖਿਆ ਕਿ ਉਨ੍ਹਾਂ ਵੱਲੋਂ ਕੰਮ ਵਾਲੀਆਂ ਥਾਂਵਾਂ ਉੱਤੇ ਕੋਵਿਡ-19 ਦੇ 1500 ਮਾਮਲਿਆਂ ਦੀ ਜਾਂਚ ਕੀਤੀ ਜਾ ਚੁੱਕੀ ਹੈ| ਉਤਪਾਦਨ, ਫੂਡ ਪ੍ਰੋਸੈਸਿੰਗ, ਡਿਸਟ੍ਰੀਬਿਊਸ਼ਨ ਤੇ ਟਰਾਂਸਪੋਰਟੇਸ਼ਨ ਸੈਕਟਰਾਂ ਵਿੱਚ 60 ਫੀ ਸਦੀ ਤੱਕ ਆਊਟਬ੍ਰੇਕਸ ਹੋਈਆਂ ਹਨ|
ਲੋਹ ਨੇ ਇੰਪਲੌਇਰਜ਼ ਨੂੰ ਵੀ ਅਪੀਲ ਕੀਤੀ ਹੈ ਕਿ ਜੇ ਉਨ੍ਹਾਂ ਦੇ ਵਰਕਰਾਂ ਵਿੱਚ ਕੋਵਿਡ-19 ਦੇ ਲੱਛਣ ਪਾਏ ਜਾਂਦੇ ਹਨ ਜਾਂ ਉਹ ਕੋਵਿਡ-19 ਪਾਜ਼ੀਟਿਵ ਆਉਂਦੇ ਹਨ ਤਾਂ ਉਹ ਆਪਣੇ ਵਰਕਰਾਂ ਨੂੰ ਬਿਮਾਰੀ ਦੀ ਛੁੱਟੀ ਤਨਖਾਹ ਸਮੇਤ ਦਿਆ ਕਰਨ ਤਾਂ ਕਿ ਵਾਇਰਸ ਉਨ੍ਹਾਂ ਦੇ ਮੁਲਾਜ਼ਮਾਂ ਰਾਹੀਂ ਅੱਗੇ ਨਾ ਫੈਲੇ| ਇੱਥੇ ਦੱਸਣਾ ਬਣਦਾ ਹੈ ਕਿ ਸੋਮਵਾਰ ਤੋਂ ਹੈਮਿਲਟਨ, ਹਾਲਟਨ ਤੇ ਯੌਰਕ ਰੀਜਨ ਵੀ ਰੈੱਡ ਜ਼ੋਨ ਵਿੱਚ ਜਾਣਗੇ|