ਮਿਸੀਸਾਗਾ, 12 ਨਵੰਬਰ (ਪੋਸਟ ਬਿਊਰੋ) : ਪੀਲ ਪੁਲਿਸ ਵੱਲੋਂ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਜਿਸ ਨੇ ਕਥਿਤ ਤੌਰ ਉੱਤੇ ਮਹਿਲਾ ਦੇ ਡਰਿੰਕ ਵਿੱਚ ਕੋਈ ਨਸ਼ੀਲੀ ਵਸਤੂ ਪਾਉਣ ਦੀ ਕੋਸ਼ਿਸ਼ ਕੀਤੀ ਜਦੋਂ ਉਹ ਰੈਸਟਰੂਮ ਦੀ ਵਰਤੋਂ ਕਰਨ ਲਈ ਗਈ|
ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ 22 ਅਕਤੂਬਰ ਨੂੰ ਉਹ ਮਹਿਲਾ ਤੇ ਇਹ ਵਿਅਕਤੀ ਮਿਸੀਸਾਗਾ ਵਿੱਚ ਸਿਟੀ ਸੈਂਟਰ ਡਰਾਈਵ ਤੇ ਸਕੁਏਅਰ ਵੰਨ ਡਰਾਈਵ ਇਲਾਕੇ ਵਿੱਚ ਸਥਿਤ ਇੱਕ ਰੈਸਟੋਰੈਂਟ ਵਿੱਚ ਡਿਨਰ ਕਰ ਰਹੇ ਸਨ| ਜਦੋਂ ਮਹਿਲਾ ਰੈਸਟਰੂਮ ਦੀ ਵਰਤੋਂ ਕਰਨ ਲਈ ਉੱਠੀ ਤਾਂ ਇਸ ਵਿਅਕਤੀ ਨੂੰ ਉਸ ਦੇ ਡਰਿੰਕ ਵਿੱਚ ਕੁੱਝ ਮਿਲਾਉਂਦਿਆਂ ਵੇਖਿਆ ਗਿਆ| ਇਸ ਸਾਰੀ ਘਟਨਾ ਨੂੰ ਆਪ ਵੇਖਣ ਵਾਲੀ ਵੇਟਰੈੱਸ ਨੇ ਉਸ ਮਹਿਲਾ ਨੂੰ ਇਸ ਸਾਰੀ ਘਟਨਾ ਦੀ ਜਾਣਕਾਰੀ ਦਿੱਤੀ| ਜਿਸ ਤੋਂ ਬਾਅਦ ਨਿਜੀ ਲਾਇਸੰਸ ਪਲੇਟ ਵਾਲ ਪੋਰਸ਼ਾ ਗੱਡੀ ਵਿੱਚ ਇਹ ਮਸ਼ਕੂਕ ਫਰਾਰ ਹੋ ਗਿਆ|
ਪੁਲਿਸ ਨੇ ਮਿਸੀਸਾਗਾ ਦੇ 51 ਸਾਲਾ ਤਾਰਿਕ ਨਵਾਜ਼ ਨੂੰ ਗ੍ਰਿਫਤਾਰ ਕਰ ਲਿਆ ਹੈ ਤੇ ਉਸ ਨੂੰ ਨਸ਼ੀਲੇ ਪਦਾਰਥ ਦੀ ਵਰਤੋਂ ਗਲਤ ਇਰਾਦੇ ਨਾਲ ਕਰਨ ਤੇ ਬ੍ਰੀਚ ਆਫ ਰੈਕੋਗਨਿਜੈਂਸ ਲਈ ਚਾਰਜ ਕੀਤਾ ਗਿਆ ਹੈ|ਨਵਾਜ਼ ਨੂੰ ਅਦਾਲਤ ਵਿੱਚ ਪੇਸ਼ ਹੋਣ ਦੀ ਸ਼ਰਤ ਉੱਤੇ ਰਿਹਾਅ ਕਰ ਦਿੱਤਾ ਗਿਆ ਤੇ ਹੁਣ ਉਸ ਨੂੰ 8 ਜਨਵਰੀ ਨੂੰ ਅਦਾਲਤ ਸਾਹਮਣੇ ਪੇਸ਼ ਕੀਤਾ ਜਾਵੇਗਾ| ਪੁਲਿਸ ਦਾ ਮੰਨਣਾ ਹੈ ਕਿ ਇਸ ਵਿਅਕਤੀ ਵੱਲੋਂ ਕਈ ਹੋਰ ਮਹਿਲਾਵਾਂ ਨੂੰ ਵੀ ਆਪਣਾ ਨਿਸ਼ਾਨਾ ਬਣਾਇਆ ਗਿਆ ਹੋ ਸਕਦਾ ਹੈ|