ਲਾਸ ਏਂਜਲਸ, 10 ਨਵੰਬਰ (ਪੋਸਟ ਬਿਊਰੋ)- ਅਜਿਹਾ ਫਿਲਮਾਂ ਵਿੱਚ ਹੁੰਦਾ ਹੈ, ਪਰ ਅਸਲ ਜ਼ਿੰਦਗੀ ਵਿੱਚ ਪਹਿਲੀ ਵਾਰ ਹੋਇਆ ਹੈ। ਲਾਸ ਏਂਜਲਸ ਵਿੱਚ ਹੈਲੀਕਾਪਟਰ ਐਂਬੂਲੈਂਸ ਉਤੇ ਲਿਆਂਦਾ ਜਾ ਰਿਹਾ ਦਿੱਲ ਟਰਾਂਸਪਲਾਂਟ ਤੋਂ ਪਹਿਲਾਂ ਹਾਦਸੇ ਦਾ ਸ਼ਿਕਾਰ ਹੋ ਗਿਆ, ਪਰ ਸਿਹਤ ਮੁਲਾਜ਼ਮਾਂ ਅਤੇ ਫਾਇਰ ਬ੍ਰਿਗੇਡ ਮੁਲਾਜ਼ਮਾਂ ਦੀ ਸਮਝਦਾਰੀ ਅਤੇ ਹੁਸ਼ਿਆਰੀ ਸਦਕਾ ਉਸ ਨੂੰ ਤੁਰੰਤ ਟਰਾਂਸਪਲਾਂਟ ਦੀ ਉਡੀਕ ਕਰਦੇ ਮਰੀਜ਼ ਤੱਕ ਪਹੁੰਚਾ ਦਿੱਤਾ ਗਿਆ।
ਅਸਲ ਵਿੱਚ ਹੈਲੀਕਾਪਟਰ ਨੇ ਟਰਾਂਸਪਲਾਂਟ ਦੇ ਲਈ ਦਿੱਲ ਲੈ ਕੇ ਸੈਨ ਡਿਏਗੋ ਤੋਂ ਪੂਰਬੀ ਲਾਸ ਏਂਜਲਸ ਦੇ ਲਈ ਉਡਾਣ ਭਰੀ ਸੀ ਤਾਂ ਦੁਪਹਿਰ ਕਰੀਬ 3.15 ਵਜੇ ਹਸਪਤਾਲ ਦੀ ਛੱਤ ਉਤੇ ਬਣੇ ਹੈਲੀਪੈਡ `ਤੇ ਲੈਂਡਿੰਗ ਤੋਂ ਪਹਿਲਾਂ ਉਹ ਅਚਾਨਕ ਘੁੰਮਣ ਲੱਗਾ ਅਤੇ ਕ੍ਰੈਸ਼ ਹੋ ਗਿਆ। ਅੱਠ ਸੀਟਰ ਅਗਸਤਾ ਵੈਸਟਲੈਂਡ ਹੈਲੀਕਾਪਟਰ ਦੇ ਪਰਖੱਚੇ ਪੂਰੀ ਛੱਤ `ਤੇ ਫੈਲ ਗਏ। ਖੁਸ਼ਕਿਸਮਤੀ ਨਾਲ ਪਾਇਲਟ ਨੂੰ ਮਾਮੂਲੀ ਸੱਟਾਂ ਲੱਗੀਆਂ। ਝਟਾਪਟ ਪਹੁੰਚੇ ਬਚਾਅ ਮੁਲਾਜ਼ਮ ਨੇ ਹਾਈਡ੍ਰੋਲਿਕ ਜੰਤਰ ਨਾਲ ਹੈਲੀਕਾਪਟਰ ਨੂੰ ਕੱਟਿਆ ਅਤੇ ਦਿੱਲ ਵਾਲਾ ਬਾਕਸ ਕੱਢਿਆ, ਜੋ ਅੰਦਰ ਸੁਰੱਖਿਅਤ ਪਿਆ ਸੀ। ਉਨ੍ਹਾਂ ਨੇ ਬਾਕਸ ਦੂਸਰੇ ਸਿਹਤ ਮੁਲਾਜ਼ਮ ਨੂੰ ਦਿੱਤਾ ਅਤੇ ਉਹ ਆਪਰੇਸ਼ਨ ਥੀਏਟਰ ਵੱਲ ਭੱਜਣ ਦੇ ਲਈ ਤੇਜ਼ੀ ਨਾਲ ਮੁੜਿਆ, ਪਰ ਹੈਲੀਕਾਪਟਰ ਦੇ ਮਲਬੇ ਨਾਲ ਟਕਰਾ ਕੇ ਡਿੱਗ ਪਿਆ। ਦਿੱਲ ਵਾਲਾ ਬਾਕਸ ਵੀ ਜ਼ਮੀਨ ਉਤੇ ਡਿੱਗ ਗਿਆ। ਖੁਸ਼ਕਿਸਮਤੀ ਨਾਲ ਦਿਲ ਫਿਰ ਵੀ ਸੁਰੱਖਿਅਤ ਰਿਹਾ। ਸਿਹਤ ਮੁਲਾਜ਼ਮ ਨੇ ਤੁਰੰਤ ਆਪਣੇ ਆਪ ਨੂੰ ਸੰਭਾਲਿਆ ਅਤੇ ਫਿਰ ਅਪਰੇਸ਼ਨ ਥੀਏਟਰ ਵੱਲ ਦੌੜ ਪਿਆ। ਇਸ ਦੇ ਬਾਅਦ ਦਿੱਲ ਨੂੰ ਸਫਲਤਾ ਪੂਰਵਕ ਟਰਾਂਸਪਲਾਂਟ ਕਰ ਦਿੱਤਾ ਗਿਆ। ਹਸਪਤਾਲ ਦੇ ਸਟਾਫ ਨੇ ਕਿਹਾ ਕਿਹੈਲੀਕਾਪਟਰ ਹਾਦਸੇ ਦੌਰਾਨ ਅਜਿਹਾ ਲੱਗਾ ਸੀ, ਜਿਵੇਂ ਭੂਚਾਲ ਦਾ ਝਟਕਾ ਆਇਆ ਹੋਵੇ।