ਟੋਕੀਓ, 10 ਨਵੰਬਰ (ਪੋਸਟ ਬਿਊਰੋ)- ਜਾਪਾਨ ਦੇ ਰਾਜ ਕੁਮਾਰ (ਕਰਾਊਨ ਪ੍ਰਿੰਸ) ਅਕੀਸ਼ੀਨੋ ਨੂੰ ਇੱਕ ਸਮਾਰੋਹ ਵਿੱਚ ਰਸਮੀ ਤੌਰ `ਤੇ ਕ੍ਰਾਈਸੇਂਥੇਮਸ ਸਿੰਘਾਸਨ ਦਾ ਪਹਿਲਾ ਵਾਰਸ ਐਲਾਨ ਕਰ ਦਿੱਤਾ ਗਿਆ ਹੈ। ਕੋਵਿਡ-19 ਮਹਾਂਮਾਰੀ ਦੇ ਕਾਰਨ ਇਹ ਸਮਾਰੋਹ ਕਈ ਮਹੀਨੇ ਲੇਟ ਹੋਇਆ ਹੈ।
ਦ ਜਾਪਾਨ ਟਾਈਮਜ਼ ਦੀ ਰਿਪੋਰਟ ਮੁਤਾਬਕ ਬੀਤੇ ਐਤਵਾਰ ਅਕੀਸ਼ੀਨੋ ਦੇ ਲਈ ਸ਼ਾਹੀ ਵਾਰਸ ਵਜੋਂ ਕੀਤੀ ਜਾਣ ਵਾਲੀ ਰਸਮ ‘ਰਿੱਕੋਸ਼ੀ ਨੋ ਰੀ` ਦੇ ਨਾਲ ਸੰਸਕਾਰਾਂ ਦੀ ਲੜੀ ਵੀ ਸਮਾਪਤ ਹੋ ਗਈ ਹੈ।ਮਈ 2019 ਵਿੱਚ ਉਨ੍ਹਾਂ ਦੇ 86 ਸਾਲਾ ਪਿਤਾ ਸਮਰਾਟ ਅਕੀਹੀਤੋ ਨੇ ਅਹੁਦਾ ਛੱਡ ਦਿੱਤਾ ਸੀ ਅਤੇ ਉਸ ਦੇ ਬਾਅਦ ਅਕੀਸ਼ੀਨੋ ਦੇ ਵੱਡੇ ਭਰਾ ਸਮਰਾਟ ਨਾਰੂਹੀਤੋ ਨੂੰ ਸਿੰਘਾਸਨ `ਤੇ ਬਿਠਾਇਆ ਗਿਆ ਸੀ। ਪਿਛਲੇ 200 ਸਾਲਾਂ ਵਿੱਚ ਅਕੀਹੀਤੋ ਪਹਿਲੇ ਜਾਪਾਨੀ ਸਮਰਾਟ ਹਨ, ਜਿਨ੍ਹਾਂ ਨੇ ਆਪਣਾ ਅਹੁਦਾ ਛੱਡਿਆ। ਇੰਪੀਰੀਅਲ ਪੈਲੇਸ ਵਿੱਚ ਹੋਏ ਇਸ ਸਮਾਰੋਹ ਦੌਰਾਨ ਸਮਰਾਟ ਨਾਰੂਹੀਤੋ ਨੇ ਜਾਪਾਨ ਅਤੇ ਦੁਨੀਆ ਦੇ ਲੋਕਾਂ ਲਈ ਸਿੰਘਾਸਨ ਦੀ ਕਤਾਰ ਵਿੱਚ ਪਹਿਲੇ ਵਾਰਸ ਵਜੋਂ ਅਕੀਸ਼ੀਨੋ ਦੇ ਨਾਂਅ ਦਾ ਐਲਾਨ ਕੀਤਾ ਹੈ। ਜਾਪਾਨ ਟਾਈਮਜ਼ ਨੇ 54 ਸਾਲਾ ਅਕੀਸ਼ੀਨੋ ਦੇ ਹਵਾਲੇ ਨਾਲ ਕਿਹਾ ਹੈ, ‘ਮੈਂ ਕਰਾਊਨ ਪ੍ਰਿੰਸ ਦੇ ਰੂਪ ਵਿੱਚ ਆਪਣੀਆਂ ਜ਼ਿੰਮੇਵਾਰੀਆਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਆਪਣੇ ਸਾਰੇ ਫਰਜ਼ਾਂ ਦਾ ਪਾਲਣ ਕਰਾਂਗਾ।``