ਟੋਰਾਂਟੋ, 10 ਨਵੰਬਰ (ਪੋਸਟ ਬਿਊਰੋ) : ਟੋਰਾਂਟੋ ਐਮਪੀ ਦਾ ਕਹਿਣਾ ਹੈ ਕਿ ਆਪਣੇ ਹਲਕਾ ਆਫਿਸ ਵਿੱਚ ਰਿਸ਼ਤੇਦਾਰ ਨੂੰ ਨੌਕਰੀ ਦੇਣ ਦੇ ਲੱਗ ਰਹੇ ਦੋਸ਼ਾਂ ਤੋਂ ਬਾਅਦ ਉਹ ਲਿਬਰਲ ਕਾਕਸ ਤੋਂ ਅਸਤੀਫਾ ਦੇ ਰਹੀ ਹੈ|
ਯਾਸਮਿਨ ਰਤਾਂਸੀ, ਜੋ ਕਿ ਲਿਬਰਲਾਂ ਲਈ ਡੌਨ ਵੈਲੀ ਈਸਟ ਦੀ ਨੁਮਾਇੰਦਗੀ ਕਰਦੀ ਸੀ, ਨੇ ਕੱਲ੍ਹ ਰਾਤ ਫੇਸਬੁੱਕ ਉੱਤੇ ਪਾਈ ਗਈ ਪੋਸਟ ਵਿੱਚ ਇਹ ਮੰਨਿਆ ਕਿ ਉਸ ਨੇ ਆਪਣੇ ਆਫਿਸ ਵਿੱਚ ਆਪਣੀ ਭੈਣ ਨੂੰ ਨੌਕਰੀ ਦੇ ਕੇ ਬੱਜਰ ਗਲਤੀ ਕੀਤੀ ਹੈ| ਰਤਾਂਸੀ ਨੇ ਇਹ ਵੀ ਦੱਸਿਆ ਕਿ ਆਪਣੇ ਇਸ ਫੈਸਲੇ ਬਾਰੇ ਉਨ੍ਹਾਂ ਪ੍ਰਧਾਨ ਮੰਤਰੀ ਆਫਿਸ ਤੇ ਸਪੀਕਰ ਨੂੰ ਵੀ ਜਾਣਕਾਰੀ ਦੇ ਦਿੱਤੀ ਹੈ| ਉਨ੍ਹਾਂ ਆਪਣੇ ਹਲਕਾ ਵਾਸੀਆਂ ਤੋਂ ਵੀ ਮੁਆਫੀ ਮੰਗੀ ਤੇ ਆਖਿਆ ਕਿ ਹੁਣ ਉਹ ਇੰਡੀਪੈਂਡੈਂਟ ਊਮੀਦਵਾਰ ਵਜੋਂ ਆਪਣਾ ਅਗਲਾ ਪੈਂਡਾ ਤੈਅ ਕਰੇਗੀ|
ਇਹ ਮੁੱਦਾ ਆਫਿਸ ਆਫ ਦ ਕੌਨਫਲਿਕਟ ਆਫ ਇੰਟਰਸਟ ਐਂਡ ਐਥਿਕਸ ਕਮਿਸ਼ਨਰ ਕੋਲ ਵੀ ਪਹੁੰਚ ਚੁੱਕਿਆ ਹੈ ਤੇ ਰਤਾਂਸੀ ਉਨ੍ਹਾਂ ਦੀਆਂ ਸਿਫਾਰਸ਼ਾਂ ਦੀ ਉਡੀਕ ਕਰ ਰਹੀ ਹੈ| ਰਤਾਂਸੀ ਵੱਲੋਂ 2015 ਵਿੱਚ ਓਨਟਾਰੀਓ ਦੇ ਇਸ ਹਲਕੇ ਦੀ ਨੁਮਾਇੰਦਗੀ ਕੀਤੀ ਗਈ ਤੇ ਇਸ ਤੋਂ ਪਹਿਲਾਂ 2004 ਤੋਂ 2011 ਤੱਕ ਵੀ ਇਹ ਸੀਟ ਉਸ ਕੋਲ ਹੀ ਸੀ|