ਡਿਟਰੌਇਟ, 10 ਨਵੰਬਰ (ਪੋਸਟ ਬਿਊਰੋ) : ਜਨਰਲ ਮੋਟਰਜ ਵੱਲੋਂ ਅਮਰੀਕਾ ਤੇ ਕੈਨੇਡਾ ਵਿੱਚ 217,000 ਕਾਰਾਂ ਤੇ ਐਸਯੂਵੀਜ਼ ਨੂੰ ਵਾਪਿਸ ਮੰਗਵਾਇਆ ਜਾ ਰਿਹਾ ਹੈ| ਤੇਲ ਲੀਕ ਹੋਣ ਦੀਆਂ ਮਿਲੀਆਂ ਸ਼ਿਕਾਇਤਾਂ ਕਰਕੇ ਇਨ੍ਹਾਂ ਗੱਡੀਆਂ ਨੂੰ ਵਾਪਿਸ ਮੰਗਵਾਉਣ ਦਾ ਫੈਸਲਾ ਕੀਤਾ ਗਿਆ ਹੈ| ਇਸ ਦਿੱਕਤ ਨਾਲ ਜਾਂ ਤਾਂ ਗੱਡੀਆਂ ਚੱਲਦੀਆਂ ਚੱਲਦੀਆਂ ਰੁਕ ਜਾਂਦੀਆਂ ਹਨ ਤੇ ਜਾਂ ਫਿਰ ਅੱਗ ਵੀ ਫੜ੍ਹ ਸਕਦੀਆਂ ਹਨ|
ਇਨ੍ਹਾਂ ਗੱਡੀਆਂ ਵਿੱਚ 2018 ਤੋਂ 2020 ਤੱਕ ਦੇ ਮਾਡਲ ਦੀਆਂ ਸ਼ੈਵਰਲੇ ਇਕੁਈਨੌਕਸ, ਟਰੈਵਰਸ ਦੇ ਨਾਲ ਨਾਲ ਜੀ ਐਮ ਸੀ ਟੈਰੇਨ ਵੀ ਸ਼ਾਮਲ ਹਨ| ਇਨ੍ਹਾਂ ਤੋਂ ਇਲਾਵਾ 2018 ਦੇ ਮਾਡਲ ਦੀ ਸ਼ੈਵਰਲੇ ਮਾਲੀਬੂ ਤੇ 2018 ਤੇ 2019 ਦੇ ਮਾਡਲ ਵਾਲੀਆਂ ਸ਼ੈਵਰਲੇ ਕਰੂਜ਼ ਤੇ ਬੁਇਕ ਲਾਕਰੌਸ ਨੂੰ ਵੀ ਵਾਪਿਸ ਮੰਗਵਾਇਆ ਗਿਆ ਹੈ| ਇਨ੍ਹਾਂ ਦੇ ਨਾਲ 2019 ਤੋਂ 2020 ਤੱਕ ਬਣੀਆਂ ਬੁਇਕ ਐਨਕੌਰ ਤੇ ਐਨਕਲੇਵ, ਕੈਡੀਲੈਕ ਐਕਸ ਟੀ 4, ਜੀ ਐਮ ਸੀ ਅਕੈਡੀਆ ਤੇ ਸੈæਵਰਲੇ ਬਲੇਜ਼ਰ ਵੀ ਵਾਪਿਸ ਮੰਗਵਾਈਆਂ ਗਈਆਂ ਹਨ| 2020 ਮਾਡਲ ਵਾਲੀ ਕੈਡੀਲੈਕ ਐਕਸ ਟੀ 6 ਨੂੰ ਵੀ ਵਾਪਿਸ ਮੰਗਵਾਈਆਂ ਗਈਆਂ ਗੱਡੀਆਂ ਵਿੱਚ ਸ਼ਾਮਲ ਕੀਤਾ ਗਿਆ ਹੈ|
ਜੀਐਮ ਨੇ ਵੀਕੈਂਡ ਉੱਤੇ ਪੋਸਟ ਕੀਤੇ ਸਰਕਾਰੀ ਦਸਤਾਵੇਜ਼ਾਂ ਵਿੱਚ ਆਖਿਆ ਕਿ ਗੱਡੀਆਂ ਦੇ ਸਟੌਪ ਸਟਾਰਟ ਮੈਕੇਨਿਜ਼ਮ ਵਿੱਚੋਂ ਦੋ ਬੋਲਟ ਗਾਇਬ ਹਨ ਜਿਨ੍ਹਾਂ ਕਾਰਨ ਫਲੂਅਡ ਲੀਕ ਹੁੰਦਾ ਹੈ| ਕੰਪਨੀ ਨੇ ਇਹ ਵੀ ਆਖਿਆ ਹੈ ਕਿ ਇਸ ਦੌਰਾਨ ਉਨ੍ਹਾਂ ਨੂੰ ਕਿਸੇ ਵੀ ਤਰ੍ਹਾਂ ਦੇ ਹਾਦਸੇ, ਅੱਗ ਲੱਗਣ ਜਾਂ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਖਬਰ ਨਹੀਂ ਮਿਲੀ ਹੈ| ਡੀਲਰਜ਼ ਇਸ ਮੈਕੇਨਿਜ਼ਮ ਦੀ ਜਾਂਚ ਕਰਨਗੇ ਤੇ ਲੋੜ ਪੈਣ ਉੱਤੇ ਬੋਲਟ ਬਦਲ ਦਿੱਤੇ ਜਾਣਗੇ ਜਾਂ ਨਵੇਂ ਲਾ ਦਿੱਤੇ ਜਾਣਗੇ| ਇਹ ਗੱਡੀਆਂ 14 ਦਸੰਬਰ ਤੋਂ ਵਾਪਿਸ ਮੰਗਵਾਈਆਂ ਜਾਣਗੀਆਂ|