ਬਲੂਮਬਰਗ, 8 ਨਵੰਬਰ (ਪੋਸਟ ਬਿਊਰੋ) : ਅਮਰੀਕਾ ਦੇ 46ਵੇਂ ਰਾਸ਼ਟਰਪਤੀ ਚੁਣੇ ਗਏ ਜੋਅ ਬਾਇਡਨ ਨੇ ਜਿੱਤਣ ਤੋਂ ਬਾਅਦ ਆਖਿਆ ਕਿ ਦੇਸ਼ ਦੇ ਲੋਕਾਂ ਨੇ ਸਾਡੇ ਹੱਕ ਵਿੱਚ ਫਤਵਾ ਦਿੱਤਾ ਹੈ| ਉਨ੍ਹਾਂ ਆਖਿਆ ਕਿ ਉਹ ਵੰਡੀਆਂ ਪਾਉਣ ਵਾਲੇ ਨਹੀਂ ਸਗੋਂ ਦੇਸ਼ ਨੂੰ ਇੱਕਜੁੱਟ ਕਰਕੇ ਰੱਖਣ ਵਾਲੇ ਰਾਸ਼ਟਰਪਤੀ ਬਣਨਗੇ| ਉਨ੍ਹਾਂ ਇਹ ਵੀ ਆਖਿਆ ਕਿ ਉਹ ਸਟੇਟਸ ਨੂੰ ਰਿਪਬਲਿਕਨਾਂ ਦੀ ਬਹੁਗਿਣਤੀ ਜਾਂ ਡੈਮੋਕ੍ਰੈਟਸ ਦੀ ਬਹੁਗਿਣਤੀ ਦੇ ਅਧਾਰ ਉੱਤੇ ਨਹੀਂ ਵੇਖਣਗੇ ਸਗੋਂ ਯੂਨਾਈਟਿਡ ਸਟੇਟਸ ਵਜੋਂ ਹੀ ਵੇਖਣਗੇ|
ਉਨ੍ਹਾਂ ਆਖਿਆ ਕਿ ਸਾਨੂੰ ਇੱਕ ਦੂਜੇ ਨੂੰ ਇੱਕ ਮੌਕਾ ਦੇਣਾ ਚਾਹੀਦਾ ਹੈ| ਹੁਣ ਅਮਰੀਕਾ ਦੇ ਜ਼ਖ਼ਮ ਭਰਨ ਤੇ ਇਸ ਨੂੰ ਸਿਹਤਮੰਦ ਕਰਨ ਦਾ ਸਮਾਂ ਆ ਗਿਆ ਹੈ| ਉਹ ਸਾਡੇ ਦੁਸ਼ਮਣ ਨਹੀਂ ਹਨ, ਉਹ ਸਾਰੇ ਅਮੈਰੀਕਨਜ਼ ਹਨ| ਬਾਇਡਨ ਨੇ ਸੱਭ ਤੋਂ ਪਹਿਲਾਂ ਸੋਮਵਾਰ ਨੂੰ ਹੀ ਸਾਇੰਟਿਸਟਸ ਤੇ ਮਾਹਿਰਾਂ ਦੀ ਟੀਮ ਦੀ ਚੋਣ ਕਰਨ ਦਾ ਵਾਅਦਾ ਕੀਤਾ ਤਾਂ ਕਿ ਕਰੋਨਾਵਾਇਰਸ ਮਹਾਂਮਾਰੀ ਨਾਲ ਨਜਿੱਠਿਆ ਜਾ ਸਕੇ| ਉਨ੍ਹਾਂ ਆਖਿਆ ਕਿ ਇਸ ਸਬੰਧ ਵਿੱਚ ਸਿਆਸਤ ਦੇ ਹਿਸਾਬ ਨਾਲ ਨਹੀਂ ਸਗੋਂ ਵਿਗਿਆਨ ਦੇ ਹਿਸਾਬ ਨਾਲ ਫੈਸਲੇ ਲਏ ਜਾਣਗੇ|
ਸਟੇਜ ਉੱਤੇ ਬਾਇਡਨ ਦਾ ਬੜੇ ਜੋਸ਼ੋ ਖਰੋਸ਼ ਨਾਲ ਸਵਾਗਤ ਕੀਤਾ ਗਿਆ| ਸਮਰਥਕਾਂ ਨੇ ਗੱਡੀਆਂ ਦੇ ਹਾਰਨ ਵਜਾ ਕੇ ਬਾਇਡਨ ਦਾ ਸਵਾਗਤ ਕੀਤਾ| ਲੋਕਾਂ ਨੇ ਡਾਂਸ ਕੀਤਾ ਤੇ ਕਈ ਥਾਂਵਾਂ ਉੱਤੇ ਬਾਇਡਨ ਦੀ ਜਿੱਤ ਦੀ ਖੁਸ਼ੀ ਵਿੱਚ ਪਟਾਕੇ ਵੀ ਚਲਾਏ ਗਏ|ਇਸ ਦੌਰਾਨ 56 ਸਾਲਾ ਉੱਪ ਰਾਸ਼ਟਰਪਤੀ ਕਮਲਾ ਹੈਰਿਸ, ਜੋ ਕਿ ਉੱਪ ਰਾਸ਼ਟਰਪਤੀ ਬਣਨ ਵਾਲੀ ਪਹਿਲੀ ਬਲੈਕ ਤੇ ਇੰਡੀਅਨ ਅਮੈਰੀਕਨ ਮਹਿਲਾ ਹੈ, ਨੇ ਵੀ ਸਟੇਜ ਉੱਤੇ ਪਹੁੰਚ ਕੇ ਬਾਇਡਨ ਨੂੰ ਵਧਾਈ ਦਿੱਤੀ| ਸਾਰਿਆਂ ਨੇ ਮਾਸਕ ਵੀ ਪਾਏ ਹੋਏ ਸਨ|
ਇਸ ਮੌਕੇ ਹੈਰਿਸ ਨੇ ਆਖਿਆ ਕਿ ਸਾਡੀ ਜਮਹੂਰੀਅਤ ਦੀ ਹਿਫਾਜ਼ਤ ਕਰਨ ਲਈ ਸੰਘਰਸ਼ ਕਰਨਾ ਪਵੇਗਾ| ਸਾਨੂੰ ਕੁਰਬਾਨੀ ਵੀ ਦੇਣੀ ਹੋਵੇਗੀ ਪਰ ਇਸ ਵਿੱਚ ਵੀ ਵੱਖਰੀ ਖੁਸ਼ੀ ਹੈ| ਅਸੀਂ ਬਿਹਤਰ ਭਵਿੱਖ ਦਾ ਨਿਰਮਾਣ ਕਰਾਂਗੇ|ਉਨ੍ਹਾਂ ਆਖਿਆ ਕਿ ਹੋ ਸਕਦਾ ਹੈ ਕਿ ਉਹ ਇਸ ਮੁਕਾਮ ਤੱਕ ਪਹੁੰਚਣ ਵਾਲੀ ਪਹਿਲੀ ਮਹਿਲਾ ਹੋਵੇ ਪਰ ਉਹ ਆਖਰੀ ਨਹੀਂ ਹੋਵੇਗੀ|