ਲੰਡਨ, 6 ਨਵੰਬਰ (ਪੋਸਟ ਬਿਊਰੋ)- ਲੰਡਨ ਬਾਰੋ ਆਫ ਈਲਿੰਗ ਕੌਂਸਲ ਨੇ ਪੰਜਾਬੀਆਂ ਦੇ ਗੜ੍ਹ ਸਾਊਥਾਲ ਦੀ ਹੈਨਰੀ ਹੈਵਲਾਕ ਦੇ ਨਾਂਅ ਉਤੇ ਬਣੀ ਹੈਵਲਕ ਰੋਡ ਦਾ ਨਾਂਅ ਬਦਲ ਕੇ ‘ਗੁਰੂ ਨਾਨਕ ਰੋਡ` ਰੱਖਣ ਲਈ ਲੋਕਾਂ ਨੂੰ ਆਪਣੀ ਪ੍ਰਤੀਕਿਰਿਆ ਦੇਣ ਲਈ ਨੋਟਿਸ ਦਿੱਤਾ ਹੈ। ਹੈਨਰੀ 1857 ਦੇ ਵਿਦਰੋਹ ਨੂੰ ਦਬਾਉਣ `ਚ ਸ਼ਾਮਲ ਬਸਤੀਵਾਦੀ ਫੌਜ ਦਾ ਜਨਰਲ ਸੀ। ਨਾਂਅ ਬਦਲੀ ਉੱਤੇ 21 ਨਵੰਬਰ ਤੱਕ ਇਤਰਾਜ਼ ਪ੍ਰਗਟ ਕਰਨ ਦਾ ਸੱਦਾ ਦਿੱਤਾ ਗਿਆ ਹੈ।
ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਸਾਊਥਾਲ ਵਿੱਚ ਹੈਵਲਾਕ ਰੋਡ ਉਤੇ ਹੈ। ਜੂਨ `ਚ ਐਲਾਨੇ ਗਏ ਇਸ ਕਦਮ ਨਾਲ ਉਨ੍ਹਾਂਲੋਕਾਂ ਦੇ ਪ੍ਰਸਤਾਵ ਨੂੰ ਸਮਰਥਨ ਮਿਲਿਆ, ਜਿਨ੍ਹਾਂ ਨੇ ਸ਼ੁਰੂਆਤੀ ਸਲਾਹ-ਮਸ਼ਵਰੇ ਉਤੇ ਪ੍ਰਤੀਕਿਰਿਆ ਦਿੱਤੀ ਸੀ। ਬਲੈਕ ਲਾਈਵਜ਼ ਮੈਟਰ ਮੁਹਿੰਮ ਦੇ ਪ੍ਰਸੰਗ ਵਿੱਚ ਇਸ ਯੋਜਨਾ ਦਾ ਉਦੋਂ ਐਲਾਨ ਕੀਤਾ ਗਿਆ ਸੀ, ਜਦੋਂ ਲੰਡਨ ਦੇ ਮੇਅਰ ਸਾਦਿਕ ਖਾਨ ਨੇ ਜਨਤਕ ਥਾਵਾਂ ਦੀ ਸਮੀਖਿਆ ਕਰਨ ਦਾ ਸੱਦਾ ਦਿੱਤਾ ਸੀ। ਈਲਿੰਗ ਕੌਂਸਲ ਲੰਡਨ ਬਿਲਡਿੰਗ (ਸੋਧ) ਐਕਟ, 1939 ਦਾ ਨੋਟਿਸ ਜਾਰੀ ਕਰਕੇ ਲੋਕਾਂ ਨਾਲ ਸਲਾਹ ਕਰ ਰਹੀ ਹੈ। ਨੋਟਿਸ `ਚ ਕਿਹਾ ਗਿਆ ਹੈ ਈਲਿੰਗ ਕੌਂਸਲ ਦਾ ਇਰਾਦਾ ਹੈ ਕਿ ਕਿੰਗ ਸਟ੍ਰੀਟ ਅਤੇ ਮੈਰਿਕ ਰੋਡ ਸਾਊਥਾਲ (ਮੌਜੂਦਾ ਸਮੇਂ) ਦੇ ਵਿਚਕਾਰ ਸੜਕ ਦੇ ਹਿੱਸੇ ਨੂੰ ਗੁਰੂ ਨਾਨਕ ਰੋਡ ਦਾ ਨਾਂਅ ਦਿੱਤਾ ਜਾਵੇ। ਕੌਂਸਲ ਨੇ ਕਿਹਾ ਕਿ ਅੰਤਿਮ ਫ਼ੈਸਲਾ ਸਟ੍ਰੀਟ ਨਾਮਕਰਨ ਪ੍ਰੋਟੋਕੋਲ ਦੇ ਮੁਤਾਬਕ ਲਿਆ ਜਾਵੇਗਾ। ਈਲਿੰਗ ਸਾਊਥਾਲ ਦੇ ਲੇਬਰ ਸੰਸਦ ਮੈਂਬਰ ਵਰਿੰਦਰ ਸ਼ਰਮਾ ਨੇ ਕੌਂਸਲ ਦੇ ਇਸ ਫ਼ੈਸਲੇ ਦਾ ਸਵਾਗਤ ਕੀਤਾ ਹੈ। ਸਲਾਹ ਮਸ਼ਵਰੇ `ਚ ਕਿਹਾ ਗਿਆ ਕਿ ਇੱਥੇ ਵੱਡੀ ਗਿਣਥੀ ਵਿਚ ਸਿੱਖ ਆਬਾਦੀ ਹੈ ਅਤੇ ਹੈਵਲਾਕ ਰੋਡ `ਤੇ ਯੂਰਪ ਦਾ ਸਭ ਤੋਂ ਵੱਡਾ ਗੁਰਦੁਆਰਾ ਹੈ।