ਡਿਜੀਟਲ ਪਲੇਟਫਾਰਮ ਨੈੱਟਫਲਿਕਸ 'ਤੇ ਰਿਲੀਜ਼ ਹੋਈ ਫਿਲਮ ‘ਕਾਲੀ ਖੂਹੀ’ ਵਿੱਚ ਸੰਜੀਦਾ ਸ਼ੇਖ਼ ਅਹਿਮ ਭੂਮਿਕਾ ਵਿੱਚ ਹੈ। ਇਸ ਤੋਂ ਪਹਿਲਾਂ ਉਹ ਜੀ 5 'ਤੇ ਰਿਲੀਜ਼ ਫਿਲਮ ‘ਤੈਸ਼' ਵਿੱਚ ਵੀ ਨਜ਼ਰ ਆਈ ਹੈ। ‘ਤੈਸ਼' ਉਸ ਦੀ ਪਹਿਲੀ ਫਿਲਮ ਹੈ, ਜਦ ਕਿ ‘ਕਾਲੀ ਖੂਹੀ' ਨਾਲ ਉਸ ਨੂੰ ਹਾਰਰ ਜਾਨਰ ਨੂੰ ਐਕਸਪਲੋਰ ਕਰਨ ਦਾ ਮੌਕਾ ਮਿਲਿਆ। ਪੇਸ਼ ਹਨ ਸੰਜੀਦਾ ਸ਼ੇਖ਼ ਨਾਲ ਹੋਈ ਗੱਲਬਾਤ ਦੇ ਕੁਝ ਅੰਸ਼ :
* ਦੋਵੇਂ ਫਿਲਮਾਂ ਡਿਜੀਟਲ 'ਤੇ ਰਿਲੀਜ਼ ਹੋਈਆਂ ਹਨ। ਫਿਲਮਾਂ ਰਿਲੀਜ਼ ਜ਼ਿਆਦਾ ਮਾਇਨੇ ਰੱਖਦੀ ਹੈ ਜਾਂ ਪਲੇਟਫਾਰਮ?
- ਰਿਲੀਜ਼ ਮਾਇਨੇ ਨਹੀਂ ਰੱਖਦੀ ਹੈ, ਚਾਹੇ ਮਾਧਿਅਮ ਕੋਈ ਵੀ ਹੋਵੇ। ਕਰੀਅਰ ਦੇ ਇਸ ਮੁਕਾਮ 'ਤੇ ਆਉਣ ਦੇ ਬਾਅਦ ਮੈਂ ਕੁਝ ਅਜਿਹਾ ਕਰਨਾ ਚਾਹੁੰਦੀ ਸੀ, ਜਿੱਥੇ ਖੁਦ ਨੂੰ ਦੇਖ ਕੇ ਖੁਸ਼ੀ ਮਿਲੇ। ਡਾਰਕ ਡਰਾਮਾ ਅਤੇ ਹਾਰਰ ਮੇਰਾ ਪਸੰਦੀਦਾ ਜਾਨਰ ਰਿਹਾ ਹੈ।
* ਤੁਸੀਂ ਲੰਮੇ ਸਮੇਂ ਤੋਂ ਐਕਟਿੰਗ ਕਰ ਰਹੇ ਹੋ, ਫਿਲਮ ਕਰਨ ਵਿੱਚ ਇੰਨੀ ਦੇਰ ਕਿਉਂ ਕੀਤੀ?
- ਜ਼ਿੰਦਗੀ ਵਿੱਚ ਸਭ ਕੁਝ ਸਹੀ ਵਕਤ 'ਤੇ ਹੁੰਦਾ ਹੈ। ਮੈਂ ਬਹੁਤ ਪਾਜ਼ੀਟਿਵ ਲੜਕੀ ਹਾਂ। ਜਦ ਐਕਟਿੰਗ ਵਿੱਚ ਕਦਮ ਰੱਖਿਆ ਤਾਂ ਇਹੀ ਗੱਲ ਮਨ ਵਿੱਚ ਸੀ ਕਿ ਹਰ ਪ੍ਰੋਜੈਕਟ ਵਿੱਚ ਸਾਬਤ ਕਰਨਾ ਹੈ ਕਿ ਚੰਗਾ ਕੰਮ ਕਰ ਸਕਦੀ ਹਾਂ। ਮੇਰਾ ਫਿਲਮੀ ਪਿਛੋਕੜ ਨਹੀਂ, ਇਸ ਲਈ ਫਿਲਮਾਂ ਵਿੱਚ ਮੌਕੇ ਹਾਸਲ ਕਰਨ ਵਿੱਚ ਮੁਸ਼ਕਲਾਂ ਆਈਆਂ। ਮੈਂ ਮਿਹਨਤ ਦੇ ਬਲ 'ਤੇ ਵਧੀ ਹਾਂ। ਮੰਜ਼ਿਲ ਤੱਕ ਪਹੁੰਚਣ ਦੀ ਪ੍ਰਕਿਰਿਆ ਕਿੰਨੀ ਮੁਸ਼ਕਲ ਕਿਉਂ ਨਾ ਹੋਵੇ, ਕੰਮ ਕਰਦੇ ਰਹਿਣਾ ਚਾਹੀਦਾ ਹੈ।
* ਦੋਵਾਂ ਹੀ ਫਿਲਮਾਂ ਵਿੱਚ ਤੁਹਾਡੇ ਕਿਰਦਾਰ ਸੰਜੀਦਾ ਹਨ...
- ਮੇਰੇ ਕਿਰਦਾਰ ਸੰਜੀਦਾ ਹਨ, ਪਰ ਕਾਫੀ ਕੁਝ ਨਵਾਂ ਕਰਨ ਨੂੰ ਸੀ। ‘ਤੈਸ਼’ ਦੇ ਲਈ ਕਾਲ ਆਇਆ ਤਾਂ ਮੈਂ ਅੰਮ੍ਰਿਤਸਰ ਵਿੱਚ ਕਿਸੇ ਪ੍ਰੋਜੈਕਟ ਦੀ ਸ਼ੂਟਿੰਗ ਕਰ ਰਹੀ ਸੀ। ਫਿਲਮ ਡਾਇਰੈਕਟਰ ਬਿਜਾਏ ਨਾਂਬੀਆਰ ਨੇ ਮੁੰਬਈ ਆ ਕੇ ਆਡੀਸ਼ਨ ਦੇਣ ਲਈ ਕਿਹਾ। ਮੈਂ ਆਡੀਸ਼ਨ ਦਿੱਤਾ ਅਤੇ ਮੈਨੂੰ ਚੁਣ ਲਿਆ ਗਿਆ। ਦੋਵਾਂ ਫਿਲਮਾਂ ਨੇ ਮੈਨੂੰ ਐਕਟਿੰਗ ਵਿੱਚ ਅੱਗੇ ਵਧਣ ਦਾ ਮੌਕਾ ਦਿੱਤਾ।
* ਫਿਲਮ ‘ਕਾਲੀ ਖੂਹੀ’ ਕਰਨ ਦੇ ਪਿੱਛੇ ਕੀ ਕਾਰਨ ਰਿਹਾ?
- ਇਹ ਅਜਿਹੇ ਪਰਵਾਰ ਦੀ ਕਹਾਣੀ ਹੈ, ਜਿਸ ਨਾਲ ਕਈ ਅਣਸੁਖਾਵੀਆਂ ਘਟਨਾਵਾਂ ਵਾਪਰਦੀਆਂ ਹਨ। ਪੂਰਾ ਪਰਵਾਰ ਉਨ੍ਹਾਂ ਨਾਲ ਲੜਨ ਦੀ ਕੋਸ਼ਿਸ਼ ਕਰਦਾ ਹੈ। ਇਸ ਫਿਲਮ ਨਾਲ ਇੱਕ ਸਮਾਜਕ ਸੰਦੇਸ਼ ਵੀ ਜੁੜਿਆ ਹੈ। ਫਿਲਮ ਦੀ ਸ਼ੂਟਿੰਗ ਅੰਮ੍ਰਿਤਸਰ ਦੇ ਇੱਕ ਪਿੰਡ ਵਿੱਚ ਹੋਈ ਹੈ। ਜਿਸ ਘਰ ਵਿੱਚ ਅਸੀਂ ਸ਼ੂਟਿੰਗ ਕਰ ਰਹੇ ਸੀ, ਉਥੇ ਇੱਕ ਵਾਈਬਸ ਬਹੁਤ ਹੀ ਪਾਜ਼ੀਟਿਵ ਸੀ। ਕਾਫੀ ਕੁਝ ਸਿੱਖਣ ਨੂੰ ਮਿਲਿਆ। ਉਥੇ ਲੋਕ ਛੋਟੀਆਂ-ਛੋਟੀਆਂ ਗੱਲਾਂ 'ਤੇ ਖੁਸ਼ ਰਹਿੰਦੇ ਹਨ।
* ਸ਼ਬਾਨਾ ਆਜ਼ਮੀ ਦੇ ਨਾਲ ਕੰਮ ਕਰਨ ਦਾ ਅਨੁਭਵ ਕਿਹੋ ਜਿਹਾ ਰਿਹਾ?
- ਸ਼ਬਾਨਾ ਆਜ਼ਮੀ ਨਾਲ ਕੰਮ ਕਰਨਾ ਐਕਟਿੰਗ ਸਕੂਲ ਦੀ ਤਰ੍ਹਾਂ ਸੀ। ਮੈਂ ਉਨ੍ਹਾਂ ਦੇ ਸਾਹਮਣੇ ਨਰਵਸ ਸੀ। ਅਜਿਹਾ ਹੋਣਾ ਸੁਭਾਵਿਕ ਸੀ, ਪਰ ਮੈਂ ਚੰਗਾ ਕਰਨ ਦੀ ਕੋਸ਼ਿਸ਼ ਕੀਤੀ। ਥੋੜ੍ਹੀ ਨਰਵਸਨੈਸ ਜ਼ਰੂਰੀ ਹੈ, ਵਰਨਾ ਤੁਸੀਂ ਓਵਰ ਕਾਨਫੀਡੈਂਸ ਦੇ ਸ਼ਿਕਾਰ ਹੋ ਜਾਂਦੇ ਹੋ।
* ਹਾਰਰ ਫਿਲਮਾਂ ਦੇਖਣਾ ਕਿੰਨਾ ਪਸੰਦ ਹੈ? ਅਸਲ ਜ਼ਿੰਦਗੀ ਵਿੱਚ ਕਿਸ ਗੱਲ ਤੋਂ ਡਰ ਲੱਗਦਾ ਹੈ?
- ਮੈਂ ਹਾਰਰ ਫਿਲਮਾਂ ਬਹੁਤ ਦੇਖਦੀ ਹਾਂ। ਰਾਮ ਗੋਪਾਲ ਵਰਮਾ ਦੀਆਂ ਹਾਰਰ ਫਿਲਮਾਂ ਦੀ ਫੈਨ ਰਹੀ ਹਾਂ। ‘ਕਾਲੀ ਖੂਹੀ' ਵਿੱਚ ਅਸੀਂ ਪ੍ਰਫਾਰਮੈਂਸ ਬਹੁਤ ਆਮ ਰੱਖੀ ਹੈ। ਬੇਵਜ੍ਹਾ ਦੀਆਂ ਅਜੀਬ ਸ਼ਕਲਾਂ ਨਹੀਂ ਬਣਾਈਆਂ। ਕੋਈ ਡਰਾਉਣਾ ਸਾਊਂਡ ਨਹੀਂ ਹੈ, ਉਸ ਦੇ ਬਾਵਜੂਦ ਡਰ ਲੱਗਦਾ ਹੈ। ਰਹੀ ਗੱਲ ਅਸਲ ਜ਼ਿੰਦਗੀ ਵਿੱਚ ਡਰ ਦੀ ਤਾਂ, ਡਰ ਤਾਂ ਨਹੀਂ ਲੱਗਦਾ, ਪਰ ਝੂਠ ਬੋਲਣ ਵਾਲਿਆਂ 'ਤੇ ਗੁੱਸਾ ਜ਼ਰੂਰ ਆਉਂਦਾ ਹੈ।