ਤਿਜੁਆਨਾ, 25 ਨਵੰਬਰ (ਪੋਸਟ ਬਿਊਰੋ) : ਮੈਕਸਿਕੋ ਤੋਂ ਅਮਰੀਕੀ ਸਰਹੱਦ ਲਾਗੇ ਪਹੁੰਚੇ ਮਾਈਗ੍ਰੈਂਟਸ ਨੂੰ ਐਤਵਾਰ ਨੂੰ ਉਸ ਸਮੇਂ ਅੱਥਰੂ ਗੈਸ ਦਾ ਸਾਹਮਣਾ ਕਰਨਾ ਪਿਆ ਜਦੋਂ ਉਨ੍ਹਾਂ ਵਿੱਚੋਂ ਕੁੱਝ ਨੇ ਦੋਵਾਂ ਮੁਲਕਾਂ ਨੂੰ ਵੱਖ ਕਰਨ ਵਾਲੀ ਵਾੜ ਨੂੰ ਟੱਪਣ ਦੀ ਕੋਸਿ਼ਸ਼ ਕੀਤੀ।
ਮੌਕੇ ਉੱਤੇ ਮੌਜੂਦ ਪੱਤਰਕਾਰਾਂ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਅਮਰੀਕੀ ਏਜੰਟਾਂ ਵੱਲੋਂ ਇਨ੍ਹਾਂ ਮਾਈਗ੍ਰੈਂਟਸ ਉੱਤੇ ਅੱਥਰੂ ਗੈਸ ਦੇ ਗੋਲੋ ਸੁੱਟੇ ਗਏ। ਜਿਸ ਕਾਰਨ ਪਰੇਸ਼ਾਨ ਬੱਚਿਆਂ ਨੇ ਚੀਕਣਾਂ ਤੇ ਖੰਘਣਾਂ ਸੁ਼ਰੂ ਕਰ ਦਿੱਤਾ। 23 ਸਾਲਾ ਐਨਾ ਜੁਨੀਗਾ ਨੇ ਦੱਸਿਆ ਕਿ ਉਹ ਵੀ ਮੌਕੇ ਉੱਤੇ ਮੌਜੂਦ ਸੀ ਤੇ ਉਸ ਨੇ ਦੇਖਿਆ ਕਿ ਮਾਈਗ੍ਰੈਂਟਸ ਨੇ ਵਾੜ ਵਿੱਚ ਥੋੜ੍ਹੀ ਜਿਹੀ ਥਾਂ ਬਣਾ ਲਈ ਸੀ ਤੇ ਇਸੇ ਥਾਂ ਵਿੱਚੋਂ ਹੀ ਏਜੰਟਾਂ ਨੇ ਅੱਥਰੂ ਗੈਸ ਦੇ ਗੋਲੇ ਦਾਗੇ। ਇਸ ਮਗਰੋਂ ਸਾਰੇ ਭੱਜਣ ਲੱਗੇ। ਉਸ ਨੇ ਦੱਸਿਆ ਕਿ ਉਸ ਦੀ 3 ਸਾਲਾ ਬੱਚੀ ਵੀ ਉਸ ਨਾਲ ਸੀ ਤੇ ਸੱਭ ਦਾ ਹੀ ਬੁਰਾ ਹਾਲ ਹੋ ਗਿਆ।
ਮੈਕਸਿਕੋ ਦੇ ਮਿਲੇਨੀਓ ਟੀਵੀ ਉੱਤੇ ਵੀ ਕਈ ਮਾਈਗ੍ਰੈਂਟਸ ਦੀਆਂ ਸਰਹੱਦ ਉੱਤੇ ਲੱਗੀ ਵਾੜ ਟੱਪਦਿਆਂ ਦੀਆਂ ਤਸਵੀਰਾਂ ਹਨ। ਅਮਰੀਕੀ ਪਾਸੇ ਵੱਲ ਵੀ ਕੁੱਝ ਗਜ਼ ਦੀ ਦੂਰੀ ਉੱਤੇ ਸਥਿਤ ਸ਼ਾਪਿੰਗ ਮਾਲ ਵਿੱਚੋਂ ਕਈ ਲੋਕ ਚੀਕਦੇ ਹੋਏ ਬਾਹਰ ਆਉਂਦੇ ਨਜ਼ਰ ਆ ਰਹੇ ਹਨ। ਸੈਨ ਡਿਏਗੋ ਦੇ ਬੌਰਡਰ ਪੋਰਟਲ ਆਫਿਸ ਵੱਲੋਂ ਟਵਿੱਟਰ ਰਾਹੀਂ ਇਹ ਜਾਣਕਾਰੀ ਦਿੱਤੀ ਗਈ ਹੈ ਕਿ ਸੈਨ ਯਸਿਡਰੋ ਪੋਰਟ ਉੱਤੇ ਪੂਰਬੀ ਤੇ ਪੱਛਮੀ ਫੈਸਿਲਿਟੀਜ਼ ਉੱਤੇ ਬਾਰਡਰ ਕਰਾਸਿੰਗ ਬੰਦ ਕਰ ਦਿੱਤੀ ਗਈ ਹੈ ਤੇ ਉੱਤਰ ਤੇ ਦੱਖਣ ਵੱਲ ਜਾਣ ਵਾਲੇ ਟਰੈਫਿਕ ਨੂੰ ਵੀ ਰੋਕ ਦਿੱਤਾ ਗਿਆ ਹੈ।
ਇਸ ਤੋਂ ਪਹਿਲਾ ਐਤਵਾਰ ਨੂੰ ਕਈ ਸੈਂਟਰਲ ਅਮੈਰੀਕਨ ਮਾਈਗ੍ਰੈਂਟਸ ਨੇ ਕੌਮਾਂਤਰੀ ਬਾਰਡਰ ਕਰਾਸਿੰਗ ਨੇੜੇ ਖੜ੍ਹੀ ਮੈਕਸਿਕੋ ਪੁਲਿਸ ਵੱਲੋਂ ਲਾਏ ਅੜਿੱਕੇ ਨੂੰ ਪਾਰ ਕਰ ਲਿਆ। ਉਨ੍ਹਾਂ ਇਸ ਲਈ ਕਿਸੇ ਤਰ੍ਹਾਂ ਦੀ ਹਿੰਸਾ ਦੀ ਵਰਤੋਂ ਨਹੀਂ ਕੀਤੀ। ਇਹ ਮੁਜ਼ਾਹਰਾਕਾਰੀ ਅਮਰੀਕਾ ਨੂੰ ਉਨ੍ਹਾਂ ਨੂੰ ਪਨਾਹ ਦੇਣ ਲਈ ਦਬਾਅ ਪਾਉਣਾ ਚਾਹੁੰਦੇ ਸੀ। ਉਨ੍ਹਾਂ ਕੋਲ ਹੱਥ ਲਿਖਤ ਝੰਡੇ ਵੀ ਸਨ ਜਿਨ੍ਹਾਂ ਉੱਤੇ ਲਿਖਿਆ ਸੀ ਕਿ ਅਸੀਂ ਮੁਜਰਮ ਨਹੀਂ ਸਗੋਂ ਕੌਮਾਂਤਰੀ ਵਰਕਰ ਹਾਂ।