ਓਸ਼ਵਾ, 25 ਨਵੰਬਰ (ਪੋਸਟ ਬਿਊਰੋ) : ਵੱਖ ਵੱਖ ਸਰੋਤਾਂ ਤੋਂ ਇਹ ਪਤਾ ਲੱਗਿਆ ਹੈ ਕਿ ਜਨਰਲ ਮੋਟਰਜ਼ ਓਸ਼ਵਾ, ਓਨਟਾਰੀਓ ਵਿਚਲੇ ਆਪਣੇ ਸਾਰੇ ਆਪਰੇਸ਼ਨ ਬੰਦ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਇਸ ਨਾਲ ਵੱਧ ਤਨਖਾਹ ਵਾਲੀਆਂ ਕਈ ਨੌਕਰੀਆਂ ਖੁੱਸਣ ਦਾ ਵੀ ਡਰ ਪੈਦਾ ਹੋ ਗਿਆ ਹੈ।
ਟੋਰਾਂਟੋ ਦੇ ਪੂਰਬ ਵਿੱਚ 60 ਕਿਲੋਮੀਟਰ ਦੀ ਦੂਰੀ ਉੱਤੇ ਸਥਿਤ 159,000 ਲੋਕਾਂ ਦੀ ਆਬਾਦੀ ਵਾਲੇ ਇਸ ਸ਼ਹਿਰ ਵਿੱਚ ਇਸ ਸਬੰਧ ਵਿੱਚ ਐਲਾਨ ਸੋਮਵਾਰ ਨੂੰ ਕੀਤੇ ਜਾਣ ਦੀ ਸੰਭਾਵਨਾ ਹੈ। ਸੂਤਰਾਂ ਦਾ ਕਹਿਣਾ ਹੈ ਕਿ ਜੀਐਮ ਵੱਲੋਂ ਓਸ਼ਵਾ ਵਿੱਚ ਆਪਣਾ ਕੰਮਕਾਜ ਬੰਦ ਕਰਨ ਦੀ ਕਵਾਇਦ ਅਸਲ ਵਿੱਚ ਗਲੋਬਲ ਪੁਨਰਗਠਨ ਦਾ ਹੀ ਹਿੱਸਾ ਹੈ।
ਇਸ ਸਮੇਂ ਓਸ਼ਵਾ ਏਰੀਆ ਵਿੱਚ ਕੰਪਨੀ ਦੀਆਂ 2500 ਯੂਨੀਅਨ ਪੁਜ਼ੀਸ਼ਨਾਂ ਹਨ ਤੇ 300 ਦੇ ਲੱਗਭਗ ਤਨਖਾਹਯਾਫਤਾ ਕਰਮਚਾਰੀ ਹਨ। ਇਸ ਤੋਂ ਇਲਾਵਾ ਇੰਗਰਸੋਲ, ਮਾਰਖਮ ਤੇ ਸੇਂਟ ਕੈਥਰੀਨਜ਼ ਵਿੱਚ ਵੀ ਜੀਐਮ ਦੇ ਕਈ ਹੋਰ ਕਰਮਚਾਰੀ ਕੰਮ ਕਰਦੇ ਹਨ। ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਹੈ ਕਿ ਕੀ ਇਨ੍ਹਾਂ ਅਹੁਦਿਆਂ ਉੱਤੇ ਵੀ ਕੰਪਨੀ ਦੇ ਇਸ ਫੈਸਲੇ ਦਾ ਕੋਈ ਅਸਰ ਪਵੇਗਾ।
ਓਸ਼ਵਾ ਦੇ ਸਾਬਕਾ ਮੇਅਰ ਜੌਹਨ ਹੈਨਰੀ ਦਾ ਕਹਿਣਾ ਹੈ ਕਿ ਉਹ ਆਸ ਕਰ ਰਹੇ ਹਨ ਕਿ ਇਹ ਅਫਵਾਹ ਹੀ ਹੋਵੇ ਕਿਉਂਕਿ ਕਮਿਊਨਿਟੀ ਲਈ ਜੀਐਮ ਵੱਡਾ ਆਰਥਿਕ ਇੰਜਣ ਹੈ। ਇੱਕ ਸਮਾਂ ਸੀ ਜਦੋਂ ਓਸ਼ਵਾ ਇਲਾਕੇ ਵਿੱਚ ਜੀਐਮ ਦੇ 40,000 ਕਰਮਚਾਰੀ ਸਨ। ਹੈਨਰੀ ਨੇ ਦੱਸਿਆ ਕਿ ਉਨ੍ਹਾਂ ਦੇ ਸਾਰੇ ਪਰਿਵਾਰ ਨੇ ਹੀ ਜੀਐਮ ਵਿੱਚ ਕੰਮ ਕੀਤਾ ਹੈ। ਪਰ ਉਨ੍ਹਾਂ ਇਹ ਵੀ ਦੱਸਿਆ ਕਿ ਹੁਣ ਓਸਵਾ ਦਾ ਅਰਥਚਾਰਾ ਸਿਰਫ ਆਟੋ ਸਨਅਤ ਉੱਤੇ ਹੀ ਨਿਰਭਰ ਨਹੀਂ ਕਰਦਾ।