ਹਾਲਟਨ, 29 ਅਕਤੂਬਰ (ਪੋਸਟ ਬਿਊਰੋ) : ਓਕਵਿੱਲ ਹਾਈ ਸਕੂਲ ਵਿੱਚ ਹੋ ਰਹੇ ਪ੍ਰਣਾਲੀਗਤ ਪੱਖਪਾਤ ਦੇ ਸਬੰਧ ਵਿੱਚ ਮਿਲ ਰਹੀਆਂ ਦਰਜਨਾਂ ਸ਼ਿਕਾਇਤਾਂ ਤੋਂ ਬਾਅਦ ਹਾਲਟਨ ਡਿਸਟ੍ਰਿਕਟ ਸਕੂਲ ਬੋਰਡ ਵੱਲੋਂ ਤੀਜੀ ਧਿਰ ਤੋਂ ਜਾਂਚ ਕਰਵਾਉਣ ਦਾ ਫੈਸਲਾ ਕੀਤਾ ਗਿਆ ਹੈ|
ਓਕਵਿੱਲ ਦੇ ਟਰੈਫਲਗਰ ਹਾਈ ਸਕੂਲ ਦੇ 12ਵੀਂ ਕਲਾਸ ਦੀ ਵਿਦਿਆਰਥਣ ਨੇ ਦੱਸਿਆ ਕਿ ਯੂਨੀਵਰਸਿਟੀ ਐਪਲੀਕੇਸ਼ਨ ਲਈ ਉਸ ਨੂੰ ਜਿੰਨੇਂ ਅੰਕ ਚਾਹੀਦੇ ਸਨ ਉਨ੍ਹਾਂ ਨੂੰ ਗਾਈਡੈਂਸ ਕਾਉਂਸਲਰ ਵੱਲੋਂ ਮਨਮਾਨੇ ਢੰਗ ਨਾਲ ਘਟਾਇਆ ਗਿਆ|ਸਬੰਧਤ ਵਿਦਿਆਰਥਣ ਨੂੰ ਯੂਕੇ ਦੇ ਸਕੂਲ ਵਿੱਚ ਦਾਖਲੇ ਲਈ ਖਾਸ ਗ੍ਰੇਡਜ਼ ਚਾਹੀਦੇ ਸਨ ਪਰ ਐਂਟੀ ਬਲੈਕ ਨਸਲਵਾਦ ਕਾਰਨ ਉਸ ਨੂੰ ਘੱਟ ਅੰਕ ਦਿੱਤੇ ਗਏ|
ਇਨਸਟਾਗ੍ਰਾਮ ਉੱਤੇ ਇੱਕ ਪੋਸਟ ਵਾਇਰਲ ਹੋਣ ਤੋਂ ਬਾਅਦ ਮੈਡੀਨਾ ਜੋਨਜ਼ ਨੇ ਆਖਿਆ ਕਿ ਕਈ ਪੁਰਾਣੇ ਤੇ ਨਵੇ ਵਿਦਿਆਰਥੀਆਂ ਨੇ ਨਸਲਵਾਦ ਨਾਲ ਜੁੜੀਆਂ ਆਪਣੀਆਂ ਸਟੋਰੀਜ਼ ਪਾਉਣੀਆਂ ਸ਼ੁਰੂ ਕਰ ਦਿੱਤੀਆਂ|ਇਸ ਲੜਕੀ ਤੇ ਉਸ ਦੀ ਮਾਂ ਨੇ ਡਾਇਰੈਕਟਰ ਆਫ ਐਜੂਕੇਸ਼ਨ ਨਾਲ ਮੁਲਾਕਾਤ ਕੀਤੀ, ਜਿਸ ਨੇ ਦੱਸਿਆ ਕਿ ਇਸ ਮਾਮਲੇ ਦੀ ਜਾਂਚ ਕਰਵਾਈ ਜਾਵੇਗੀ|
ਹਾਲਟਨ ਸਕੂਲ ਬੋਰਡ ਦੇ ਬੁਲਾਰੇ ਨੇ ਦੱਸਿਆ ਕਿ ਇੱਕ ਸਟਾਫ ਮੈਂਬਰ ਨੂੰ ਪ੍ਰਸ਼ਾਸਕੀ ਛੁੱਟੀ ਉੱਤੇ ਭੇਜਿਆ ਗਿਆ ਹੈ| ਪਰ ਉਨ੍ਹਾਂ ਇਹ ਵੀ ਆਖਿਆ ਕਿ ਕੰਮ ਵਾਲੀ ਥਾਂ ਉੱਤੇ ਹੋਣ ਵਾਲੀ ਜਾਂਚ ਗੁਪਤ ਰੱਖੀ ਜਾਵੇਗੀ|