ਵੈਨਕੂਵਰ, 28 ਅਕਤੂਬਰ (ਪੋਸਟ ਬਿਊਰੋ) :  ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਸਰਹੱਦੋਂ ਪਾਰ ਅਮਰੀਕਾ ਵਾਲੇ ਪਾਸੇ ਨਸ਼ੀਲੇ ਪਦਾਰਥਾਂ ਨਾਲ ਭਰੇ ਪੰਜ ਬੈਗ ਮਿਲਣ ਤੋਂ ਬਾਅਦ ਪੁਲਿਸ ਅਧਿਕਾਰੀਆਂ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ|
ਯੂਐਸ ਕਸਟਮਜ਼ ਐਂਡ ਬਾਰਡਰ ਪ੍ਰੋਟੈਕਸ਼ਨ ਦਾ ਕਹਿਣਾ ਹੈ ਕਿ ਇਹ ਬੈਗ ਕ੍ਰੈਸਟਨ, ਬੀਸੀ ਦੇ ਦੱਖਣ ਵੱਲ ਬੋਨਰਜ਼ ਫੈਰੀ, ਇਦਾਹੋ ਨੇੜੇ ਮਿਲੇ| ਇਸ ਹਫਤੇ ਦੇ ਸ਼ੁਰੂ ਵਿੱਚ ਸੀ ਬੀ ਪੀ ਨੇ ਇੱਕ ਨਿਊਜ਼ ਰਲੀਜ਼ ਵਿੱਚ ਦੱਸਿਆ ਕਿ ਉਨ੍ਹਾਂ ਦੇ ਏਜੰਟਾਂ ਨੂੰ ਬਾਰਡਰ ਲਾਗੇ ਦੂਰ ਦਰਾਜ ਦੀ ਫੌਰੈਸਟ ਸਰਵਿਸ ਰੋਡ ਉੱਤੇ ਸ਼ੱਕੀ ਗਤੀਵਿਧੀ ਬਾਰੇ ਜਾਣਕਾਰੀ ਮਿਲੀ ਸੀ|
ਸੀ ਬੀ ਪੀ ਨੇ ਦੱਸਿਆ ਕਿ ਉਸ ਇਲਾਕੇ ਵਿੱਚ ਇੱਕ ਏਜੰਟ ਨੂੰ ਭੇਜਿਆ ਗਿਆ ਸੀ ਤੇ ਉੱਥੇ ਦੋ ਵਿਅਕਤੀ ਲੁਕਣ ਦੀ ਕੋਸ਼ਿਸ਼ ਕਰ ਰਹੇ ਸਨ| ਨਿਊਜ਼ ਰਲੀਜ਼ ਅਨੁਸਾਰ ਪਹੁੰਚ ਕਰਨ ਉੱਤੇ ਇਹ ਜੋੜਾ ਕੈਨੇਡਾ ਵਿੱਚ ਫਰਾਰ ਹੋ ਗਿਆ ਪਰ ਇਹ ਬੈਗ ਉੱਥੇ ਬਰਫ ਵਿੱਚ ਪਏ ਮਿਲੇ ਜਿੱਥੇ ਇਹ ਜੋੜਾ ਲੁਕਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ|
ਕਸਟਮਜ਼ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਬੈਗਜ਼ ਵਿੱਚ 84 ਪਾਊਂਡ ਕੋਕੀਨ ਪਾਈ ਗਈ ਹੈ ਜਿਸ ਦੀ ਬਾਜ਼ਾਰ ਵਿੱਚ ਕੀਮਤ 1æ2 ਮਿਲੀਅਨ ਡਾਲਰ ਹੈ| ਇਨ੍ਹਾਂ ਵਿੱਚ 198 ਪਾਊਂਡ ਮੈਥਾਮਫੈਟਾਮਾਈਨ ਵੀ ਪਾਈ ਗਈ, ਜਿਸ ਦੀ ਕੀਮਤ ਅੰਦਾਜ਼ਨ 960,000 ਅਮਰੀਕੀ ਡਾਲਰ ਦੱਸੀ ਜਾਂਦੀ ਹੈ|
ਸੀ ਬੀ ਪੀ ਨੇ ਦੱਸਿਆ ਕਿ ਏਜੰਟ ਨੇ ਉਸ ਇਲਾਕੇ ਨੂੰ ਛੱਡ ਕੇ ਜਾਂਦੀ ਇੱਕ ਗੱਡੀ ਵੇਖੀ ਤੇ ਇੱਕ ਮਸ਼ਕੂਕ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਹੈ| ਆਰਸੀਐਮਪੀ ਵੱਲੋਂ ਦੋ ਮਸ਼ਕੂਕਾਂ ਦੀ ਪੈੜ ਵੀ ਨੱਪ ਲਈ ਗਈ ਹੈ ਤੇ ਉਨ੍ਹਾਂ ਨੂੰ ਕੈਨੇਡਾ ਵਿੱਚ ਗ੍ਰਿਫਤਾਰ ਕਰਕੇ ਉਨ੍ਹਾਂ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ|