ਜੈਪੁਰ, 28 ਅਕਤੂਬਰ (ਪੋਸਟ ਬਿਊਰੋ)- ਪੰਜਾਬ ਦੇ ਲੁਧਿਆਣਾ ਕਮਿਸ਼ਨਰੇਟ ਦੀ ਪੁਲਸ ਨੇ ਜੈਪੁਰ ਵਿੱਚ ਆ ਕੇ ਵੱਡੀ ਕਾਰਵਾਈ ਕਰਦੇ ਹੋਏ ਇਥੋਂ ਨਸ਼ੀਲੀਆਂ ਦਵਾਈਆਂ ਦੀ ਵੱਡੀ ਖੇਪ ਫੜੀ ਹੈ। ਬਰਾਮਦ ਦਵਾਈਆਂ ਦੀ ਕੀਮਤ ਸਾਢੇ ਛੇ ਕਰੋੜ ਰੁਪਏ ਤੋਂ ਵੱਧ ਦੱਸੀ ਜਾ ਰਹੀ ਹੈ। ਪੁਲਸ ਨੇ ਕਰੀਬ ਚਾਰ ਕਰੋੜ ਰੁਪਏ ਕੀਮਤ ਦੀਆਂ ਗਰਭਪਾਤ ਦੇ ਕੰਮ ਆਉਣ ਵਾਲੀਆਂ ਐਮ ਟੀ ਪੀ ਕਿੱਟਾਂ ਵੀ ਬਰਾਮਦ ਕੀਤੀਆਂ ਹਨ।
ਪਤਾ ਲੱਗਾ ਹੈ ਕਿ ਪੰਜਾਬ ਪੁਲਸ ਨੇ ਜੈਪੁਰ ਵਿੱਚ ਨਸ਼ੇ ਦੇ ਕਾਰੋਬਾਰ ਵਿੱਚ ਸ਼ਾਮਲ ਦੋਸ਼ੀ ਪ੍ਰੇਮ ਪ੍ਰਕਾਸ਼ ਦੇ ਟਿਕਾਣੇ `ਤੇ ਤਲਾਸ਼ੀ ਮੁਹਿੰਮ ਚਲਾਈ ੀ। ਲੁਧਿਆਣਾ ਪੁਲਸ ਦੀ 15 ਮੈਂਬਰੀ ਟੀਮ ਨੇ ਜੈਪੁਰ ਵਿੱਚ ਕਰਣੀ ਵਿਹਾਰ ਥਾਣਾ ਇਲਾਕੇ ਦੇ ਮਯੂਰ ਵਿਹਾਰ ਵਿੱਚ ਇਹ ਕਾਰਵਾਈ ਕੀਤੀ, ਜਿੱਥੇ ਇੱਕ ਮਕਾਨ ਦੇ ਬੇਸਮੈਂਟ ਵਿੱਚ ਨਸ਼ੇ ਦਾ ਕਾਰੋਬਾਰ ਚੱਲਦਾ ਸੀ। ਇਸ ਦੌਰਾਨ ਲੁਧਿਆਣਾ ਦੀ ਪੁਲਸ ਨੇ ਮੌਕੇ ਤੋਂ 10 ਲੱਖ ਤੋਂ ਵੱਧ ਅਲਪ੍ਰਾਜੋਲਮ ਟੈਬਲੇਟ, 80 ਹਜ਼ਾਰ ਤੋਂਵੱਧ ਕੋਡੀਨ ਸਿਰਪ ਅਤੇ 16 ਹਜ਼ਾਰ ਟ੍ਰਾਮਾਡਾਲ ਦੇ ਇੰਜੈਕਸ਼ਨ ਬਰਾਮਦ ਕੀਤੇ ਹਨ। ਇਨ੍ਹਾਂ ਦੀ ਬਾਜ਼ਾਰ ਵਿੱਚ ਕੀਮਤ ਕਰੀਬ 6.5 ਕਰੋੜ ਰੁਪਏ ਤੋਂ ਵੱਧ ਦੱਸੀ ਗਈ ਹੈ। ਇਹ ਦਵਾਈਆਂ ਐਨ ਡੀ ਪੀ ਐਸ ਐਕਟ ਹੇਠ ਫੜੀਆਂ ਗਈਆਂ ਹਨ। ਇਸ ਦੇ ਨਾਲ ਪੁਲਸ ਨੇ ਮੌਕੇੇ ਤੋਂ ਵੱਡੀ ਗਿਣਤੀ ਵਿੱਚ ਗਰਭਪਾਤ ਦੇ ਕੰਮ ਆਉਣ ਵਾਲੀਆਂ ਐਮ ਟੀ ਪੀ ਕਿੱਟਾਂ ਬਰਾਮਦ ਕੀਤੀਆਂ ਹਨ। ਇਨ੍ਹਾਂ ਨੂੰ ਡਰੱਗ ਐਂਡ ਕਾਸਮੈਟਿਕ ਐਕਟ ਹੇਠ ਜ਼ਬਤ ਕੀਤਾ ਗਿਆ ਹੈ। ਪੰਜਾਬ ਪੁਲਸ ਦੀ ਇਸ ਕਾਰਵਾਈ ਨਾਲ ਰਾਜਸਥਾਨ ਪੁਲਸ `ਤੇ ਵੀ ਸਵਾਲ ਖੜੇ ਹੋ ਗਏ ਹਨ। ਵਰਨਣ ਯੋਗ ਹੈ ਕਿ ਪੰਜਾਬ ਪੁਲਸ ਨੇ ਮਸਾਂ 15 ਦਿਨਾਂ ਵਿੱਚ ਇਥੇ ਦੂਸਰੀ ਵੱਡੀ ਕਾਰਵਾਈ ਕੀਤੀ ਹੈ। ਪੰਜਾਬ ਨਾਲ ਲੱਗਦੇ ਰਾਜਸਥਾਨ ਦੇ ਸ੍ਰੀਗੰਗਾਨਗਰ ਅਤੇ ਹਨੂਮਾਨਗੜ੍ਹ ਇਲਾਕਿਆਂ ਵਿੱਚ ਕਈ ਵਾਰ ਨਸ਼ੀਲੀਆਂ ਦਵਾਈਆਂ ਦੀ ਖੇਪ ਫੜੀ ਗਈ ਹੈ।